نواز شریف نے لندن چھوڑ دیا ، وطن واپسی کا سفر شروع

مسلم لیگ ن کے قائد اورسابق وزیراعظم نوازشریف وطن واپسی کے لئے لندن سے روانہ ہوگئے۔
نوازشریف وطن واپسی کے لئے لندن میں اپنی رہائش گاہ سے ہیتھرو ایئرپورٹ کے لئے نکلے تو کارکنوں کی ایک بڑی تعداد انہیں الوداع کرنے کے لئے موجود تھی ۔
وطن واپسی کے سفر پر نوازشریف کی پہلی منزل سعودی عرب ہے جہاں وہ کچھ دن قیام کریں گے ، نوازشریف عمرہ ادا کریں گے اور روضہ رسول صل اللہ علیہ وآلہ سلم پر بھی حاضری دیں گے۔ مسلم لیگ ن کے ذرائع کے مطابق نوازشریف سعودی عرب میں قیام کے دوران برادر ملک کی اہم شخصیات سے بھی ملاقاتیں کریں گے۔
سعودی عرب کے بعد نوازشریف کی اگلی منزل متحدہ عرب امارات ہے جہاں وہ دبئی میں قیام کریں گے اور اماراتی حکام سے بھی ملاقاتیں کریں گے۔
نوازشریف کی وطن واپسی کے لئے دبئی میں خصوصی طیارہ بھی بک کرلیاگیا ہے۔ اس طیارے میں نوازشریف کے ساتھ ملکی اور عالمی میڈیا کے نمائندے بھی موجود ہوں گے۔
شیڈول کے مطابق نوازشریف 21 اکتوبر کولاہور پہنچیں گے جہاں مینار پاکستان گرائونڈ میں مسلم لیگ ن ایک بڑے استقبالی جلسے کی تیاریاں کررہی ہے۔
سابق وزیرداخلہ رانا ثنا اللہ کے مطابق نوازشریف مینارپاکستان جلسے میں آئندہ کے لائحہ عمل اورملک کوبحرانوں سے نکالنے کاپلان دیں گے۔