جمعیت علما اسلام کے سربراہ مولانا فضل الرحمن نے مسلم لیگ (ن) کے صدر شہبازشریف سے ملاقات کی، ملاقات میں مجموعی سیاسی صورتحال اور شفاف، آزادانہ اور منصفانہ انتخابات کے حوالے سے تبادلہ خیال کیا اور مشاورت و اشتراک کے عمل سے آگے بڑھنے کا فیصلہ کیا،دونوں قائدین نے اتفاق کیا کہ ملک کو بحرانوں سے متحد ہو کر نمٹا جاسکتا ہے۔
مولانا فضل الرحمن نے نوازشریف کی وطن واپسی کے حوالے سے نیک تمناﺅں کا اظہار کیا ، جبکہ شہباز شریف نے کہا کہ 16 20 میں پاکستان کو دیوالیہ ہونے سے بچانے میں آپ نے بھرپور تعاون کیا، تمام جماعتوں نے 16 ماہ میں سیاست کا نہیں، صرف ریاست بچانے کا سوچا، پاکستان کو اتحاد، مشاورت اور اشتراک عمل ہی بحرانوں سے نکال سکتا ہے، شہباز شریف نے کہا کہ نوازشریف کی وطن واپسی کے بعد سیاسی وجمہوری نظام مضبوط ہو گا۔
جے یو آئی سربراہ نے کہا کہ نوازشریف کی وطن واپسی پاکستان کے لئے اچھی خبر ہے، سچ بے نقاب ہوچکا ہے کہ نوازشریف سیاسی انتقام کا نشانہ بنائے گئے، نوازشریف اور ان کے خاندان کو ناحق ستایا گیا، یہ تاریخ کا سیاہ اور افسوسناک باب رہے گا۔
فضل الرحمن نے کہا کہ نوازشریف نے خیبرپختونخوا میں پی ٹی آئی کا مینڈیٹ تسلیم کیا لیکن نوازشریف کو ہی سیاسی نظام سے باہر کر دیا گیا، سیاسی رہنماﺅں کو ناحق چور ڈاکو کہنا سیاسی انجینئرنگ کا کھیل تھا۔
