ممبئی (این این آئی)لیجنڈ اداکار امیتابھ بچن گزشتہ روز 81 برس کے ہوگئے، انہیں ساتھی اداکاروں سمیت جونیئر اداکاروں نے بھی مبارک باد پیش کی۔
سینئر اداکارہ زینت امان نے امیتابھ بچن کو سالگرہ کی مبارک باد دیتے ہوئے کہا کہ میں انہیں گزشتہ روز پیغام دینا بھول گئی تھی تو اب میں ان کے متعلق ایک واقعہ بھی بتاتی ہوں۔
زینت امان نے فلم کا نام، سال، ڈائریکٹر یا پروڈیوسر کا نام بتائے بغیر کہا کہ اس روز ہماری صبح کی شفٹ تھی، میں پروڈیوسر کے ساتھ فلم کے سیٹ پر پہنچ گئی تھی۔
انہوں نے بتایا کہ ہمیشہ کی طرح میرے ہاتھ میں اسکرپٹ تھا اور میں اسٹوڈیو تک پہنچنے کے راستے میں ہی اپنی لائنز یاد کر رہی تھی۔
زینت امان کا کہنا تھا کہ سیٹ پر پہنچنے کے بعد میں سیدھی میک اپ روم گئی اور عملے کو بتایا کہ جب امیتابھ بچن شوٹ کیلئے تیار ہوجائیں تو مجھے اطلاع کردیں۔
انہوں نے کہا کہ ایک گھنٹے بعد ایک اسسٹنٹ ڈائریکٹر نے میک اپ روم کا دروازہ کھٹکھٹایا اور اطلاع دی کہ امیتابھ بچن آگئے ہیں اور اپنی گاڑی سے سیدھے سیٹ پر چلے گئے ہیں۔
زینت امان نے کہا کہ میں فوراً سیٹ پر گئی تو امیتابھ بچن نے ایسا تاثر بنا رکھا تھا جیسے میری وجہ سے شوٹنگ لیٹ ہوئی ہے، انہوں نے پروڈیوسر سے مجھے ڈانٹ پڑوا دی۔
میں پیر پٹخ کر واپس میک اپ روم گئی اور اسٹاف سے کہا کہ سامان باندھو اور واپس چلو۔
امیتابھ بچن نے اوپر آکر کمال مسکراہٹ کے ساتھ کہا کہ میری غلطی ہے، وہ بڈھا پروڈیوسر احمق ہے، چلو سب بھول جاؤ اور کام پر چلو۔
زینت امان نے امیتابھ کی معافی قبول کی اور شوٹنگ کیلئے آمادہ ہوگئیں۔
