اسلام آباد: فیکٹری میں خاتون ورکر کا ریپ: لیڈی رائیڈر کو ڈاکوئوں نے لوٹ لیا

اسلام آباد(مانیٹرنگ ڈیسک)وفاقی دارالحکومت اسلام آباد کی ایک فیکٹری میں ایک خاتون ورکر کا گینگ ریپ کردیا گیا جب کہ ایک اور واقعے میں مسلح افراد آن لائن ڈیلیوری سروس کی خاتون رائڈر کو لوٹ کر فرار ہوگئے۔
انگریزی اخبار کے مطابق شمس کالونی تھانے کی حدود میں واقع ایک فیکٹری میں 2 سالہ بچے کی ماں کا اس کے ساتھیوں نے گینگ ریپ کیا۔
ایک سال قبل شوہر سے علیحدگی اختیار کرنے والی خاتون کو تقریباً ایک ہفتے قبل ہی اس فیکٹری میں ملازمت پر رکھا گیا تھا، اس کے ساتھ فیکٹری میں کام کرنے والا ایک شخص خاتون کو ایک کمرے میں لے گیا جہاں اس نے اپنے دیگر دو ساتھیوں کے ساتھ مل کر ان کے ساتھ جنسی زیادتی کی۔
ملزمان نے متاثرہ خاتون کی ویڈیو بھی بنائی اور انہیں دھمکی دی کہ وہ اس واقعے کی کسی سے شکایت نہ کریں۔
ادھر اسلام آباد کے سیکٹر آئی ٹین فور میں مسلح افراد نے I-10 /4 علاقے میں آن لائن ڈیلیوری سروس کے لیے کام کرنے والی خاتون رائڈر کو لوٹ لیا۔
خاتون رائیڈر پارسل پہنچانے کے لئے پہنچی تو ایک موٹر سائیکل پر سوار تین افراد نے پستول نکال کر ان سے 31 ہزار 340 روپے اور موبائل چھین لیا اور فرار ہو گئے۔