سعودی عرب کے دورے کے موقع پر امریکی وزیر خارجہ کو ہزیمت کا سامنا کرنا پڑ گیا۔
گزشتہ روز سعودی ولی عہد محمد بن سلمان سے امریکی وزیر خارجہ انٹونی بلنکن نے ریاض میں ملاقات کی تھی۔
امریکی اخبار واشنگٹن پوسٹ کے مطابق محمد بن سلمان نے پہلے تو (بروز ہفتہ) امریکی وزیر خارجہ انٹونی بلنکن کو ملاقات کے لیےگھنٹوں انتظار کروایا اور پھر اگلی صبح (اتوار) کو ملاقات کرکے غزہ کے معصوم فلسطینیوں کا قتل رکوانے پر زور دیا۔
واشنگٹن پوسٹ کے مطابق سعودی ولی عہد نے ملاقات میں اسرائیل فلسطین کی صورتحال پر سخت پیغام دیتے ہوئے غزہ میں فوجی آپریشن رکنے اور غزہ کا اسرائیلی محاصرہ ختم کروانے پر زور دیا۔
محمد بن سلمان نے کہا کہ اسرائیلی حملوں میں معصوم فلسطینی قتل ہو رہے ہیں، اسرائیل کو چاہیے کہ محاصرہ ختم کرکے غزہ کو پانی، بجلی اور ایندھن کی فراہمی بحال کرے۔
اس سے قبل ملاقات کے بعد امریکی وزیر خارجہ نے کہا تھا کہ سعودی ولی عہد سے آگے بڑھنے کیلئے کئی اچھی تجاویز پر بات ہوئی ہے۔
