سیاسی جماعتیں ایک دوسرے کے لئے گنجائش پیدا کریں،مولانافضل الرحمان

جمعیت علمائے اسلام ( ف) کے سربراہ مولانا فضل الرحمان نے سیاسی ماحول میں تلخی کم کرنے کا فارمولہ پیش کردیا
اسلام آباد میں صحافیوں سے گفتگو کرتے ہوئے مولانا فضل الرحمان نے کہا’ وقت آگیا ہے کہ سیاستدان اور سیاسی جماعتیں بالغ نظری کا مظاہرہ کریں، سیاسی جماعتیں ایک دوسرے کے لئے گنجائش پیدا نہیں کریں گی تو نقصان سب کا ہوگا۔ اختلاف رائے کے باوجود سیاسی گنجائش پیدا کرنی چاہیئے۔
مولانا فضل الرحمان نے کہا کہ افسوس خود سیاستدانوں کے سبب ماضی اور حال میں جمہوریت کیلئے مشکلات آئیں، اب سنبھلنا ہوگا، سب کے ماضی کا علم ہے مگر اب جمہوریت کی مضبوطی کیلئے سیاسی گنجائش کے فارمولے کیساتھ آگے بڑھنا ہوگا۔
انہوں نے کہا کہ سیاسی انتشار اور خلفشار سے نہ جمہوریت مضبوط ہوگی نہ ملکی مسائل حل ہوں گے۔ سیاستدان کسی سے بھی اختلاف رائے یا الگ موقف رکھ سکتا ہے مگر اسے سیاسی انتشار کا شکار نہیں ہونا چاہیے، جمہوریت کی مضبوطی ضد اور ہٹ دھرمی میں نہیں بلکہ جمہوری رویوں کی مضبوطی میں ہے۔
مولانا فضل الرحمان کا کہنا تھا کہ آصف علی زرداری اور بھٹو خاندان کیساتھ سیاسی اختلاف کے باوجود پرانے تعلقات ہیں، ہم ایک دوسرے کی خوشی و غمی میں شرکت کرتے ہیں۔
واضح رہے کہ مولانا فضل الرحمان کا یہ بیان ایسے وقت سامنے آیا ہے جب ایک روز قبل سابق صدر آصف زرداری کے ساتھ ان کی ایک اہم ملاقات ہوئی تھی۔