حکومت پاکستان کی جانب سے غیرقانونی تارکین وطن کو ملک سے جانے کے لیے دی گئی ڈیڈ لائن میں ایک ہفتہ باقی رہ گیا ہے۔
غیرملکی تارکین وطن کی بے دخلی کے فیصلے پر جہاں افغان حکومت نے پالیسی پر نظرثانی کا مطالبہ کیا ہے وہیں اب افغان فنکاروں نے پشاور ہائیکورٹ سے رجوع کر لیا ہے۔
پشاور ہائیکورٹ میں دائر کی گئی درخواست میں افغان فنکاروں نے موقف اختیار کیا ہے کہ حکومت پاکستان یو این ایچ سی کے ساتھ 2003 کے معاہدے کے بعد اس بات کی پابند ہے کہ مہاجرین کو جبری طور پر ملک سے نہیں نکالے گی۔
درخواست میں موقف اختیار کیا گیا ہے کہ حکومت افغان مہاجرین کی پکڑ دھکڑ رکوائے اور یو این ایچ سی آر کے ساتھ کیے گئے معاہدے پر عملدرآمد کا حکم دیا جائے۔
درخواست میں کہا گیا ہے کہ حتمی فیصلے تک افغان مہاجرین کی گرفتاری اور انخلا روکنے کا حکم دیا جائے۔
