امیر جماعت اسلامی سراج الحق نے کہا ہے کہ نگران حکومت ہمارے راستے میں روڑے نہ اٹکائے، غزہ مارچ ہر صورت ہو گا۔
تفصیلات کے مطابق پریس کانفرنس کرتے ہوئے امیر جماعت اسلامی سراج الحق نےکہا کہ اسلام آباد میں غزہ مارچ کی تیاریاں جاری ہیں اور اس حوالے سے مقامی انتظامیہ کو بھی آگاہ کیا گیا تھا۔
دنیا بھر میں فلسطین کے حق اور اسرائیل کے خلاف احتجاجی مظاہرے ہو رہے ہیں۔ امریکہ کھلم کھلا اسرائیل سے تعاون کر رہا ہے اور ہمارے امریکی سفارتخانے کے سامنے احتجاج کے اعلان پر انتظامیہ کو تکلیف ہوئی ہے۔
غزہ کے لوگ لاوارث نہیں ہیں ہمارے دل ان کے ساتھ دھڑکتے ہیں۔ غزہ مارچ ہر حال میں ہو گا اور آئندہ کے لائحہ عمل کا اعلان غزہ مارچ میں کریں گے۔
