نگران وزیر اعظم انوار الحق کاکڑ نے کہا ہے کہ چیئرمین پی ٹی آئی الیکشن سے پہلے رہا ہوں گے یا نہیں فیصلہ عدالت نے کرنا ہے، ہم نے نہیں۔

 ایک انٹرویو میں انوار الحق کاکڑ نے کہا کہ آرمی چیف سویلین بالا دستی پر یقین رکھتے ہیں، ورلڈکپ میں شائقین کو ویزے نہ دینے کے حوالے سے وزیراعظم نے کہا کہ بھارت کو چاہیے کہ  پاکستانی کرکٹ شائقین کو ویزے دے، اگر ایسا ایونٹ پاکستان میں ہوتا تو بھارتی شائقین کو ضرور ویزے دیتے۔

 انہوں نے کہا کہ مجھے نگران وزیراعظم بننے کی اطلاع سابق وزیراعظم نے دی، دریں اثنا نیشنل ریزیلینس ڈے کے موقع پر اپنے پیغام میں انوار الحق کاکڑ کا کہنا تھا کہ نیشنل ڈیزاسٹر مینجمنٹ اتھارٹی اور صوبائی ڈیزاسٹرمینجمنٹ اتھارٹیز کی صورت میں آفات سے نمٹنے کیلئے ایک مضبوط اور متحرک ادارہ جاتی ڈھانچہ موجود ہے، ضلعی سطح پر آفات سے نمٹنے کے انتظام وانصرام کے نظام کو مضبوط کرنے کی ضرورت ہے.

جمعیت علماءاسلام کے سربراہ مولانافضل الرحمان نے کہا ہے کہ ہم نے ہمیشہ فلسطینیوں کے موقف کو صحیح سمجھا ہے۔  جےیوآئی تسلسل کےساتھ فلسطینیوں کےموقف کےشانہ بشانہ کھڑی رہی ہے ، آج بھی  فلسطینی بھائیوں کے ساتھ ہیں فلسطینی مجاہدین کا اسرائیل پرحملہ تاریخی کامیابی اورمعرکہ ہے۔

انہوں نے کہا کہ  غاصبانہ قبضے سے اپنے علاقوں کو چھڑانے پر فلسطینی مجاہدین اور فلسطینی عوام کو مبارکباد پیش کرتا ہوں دنیا سمجھ رہی تھی کہ مسئلہ فلسطین مردہ بن چکا ہے۔ ہمارے ہاں ایک طبقے نے اسرائیل کو تسلیم کرانے کی ناکام کوشش کی ہے۔ تازہ واقعے نے ثابت کیا کہ مسئلہ فلسطین مردہ نہیں ہوا۔

جےیوآئی سربراہ نے کہا کہ حماس کے حملے نے اسرائیل کے دفاعی نظام اوران کے گھمنڈ کو زمین بوس کر دیا ہے ، اقوام متحدہ اپنا فرض پوراکرکے 1967 کی قراردادوں پر عملدرآمد کرائے، آئندہ جمعے کو ملک بھر میں اہل فلسطین کےساتھ اظہار یکجہتی کریں گے۔

ملک کے بیشتر علاقوں میں موسم خشک اور گرم رہے گا تاہم بعض مقامات پر بارش کا امکان ہے۔

محکمہ موسمیات کے مطابق آئندہ چوبیس گھنٹوں کے دوران اسلام آباد، کشمیر،گلگت بلتستان ،بالائی خیبر پختونخوا ،بالائی پنجاب اورم خطہ پوٹھوہار میں مطلع ابر آلود رہنے کے علاوہ تیز ہواؤں / آندھی اور گرج چمک کے ساتھ بارش کا امکان ہے ۔

محکمہ موسمیات کے مطابق گزشتہ 24 گھنٹوں کے دوران ملک کے زیادہ تر علاقوں میں موسم خشک اور جنوبی علاقوں میں گرم رہا،اتوار کو سب سے زیادہ درجہ حرارت  شہید بینظیرآباد،سبی 42 اور تربت میں 41  ڈگری سینٹی گریڈ ریکارڈ کیا گیا۔

مسلم لیگ ن کی سینئر نائب صدر اور چیف آرگنائزر مریم نواز نے کہا ہے کہ نوازشریف کے بغیر ملک رل گیا، ہم لوگوں کے دلوں کو جوڑیں گے۔

 لاہور میں جلسہ سے خطاب کرتے ہوئے مریم نواز نے کہا کہ سمجھ نہیں آ رہی، آج 8 اکتوبر ہے یا 21 اکتوبر، آج ایک حلقے کا یہ عالم ہے تو 21 اکتوبر کو کیا عالم ہو  گا، 21 اکتوبر کو پاکستان کا لیڈر نوازشریف واپس آ رہا ہے۔

انہوں نے کہا کہ جو شخص 21 اکتوبر کو واپس آرہا ہے اس نے عوام کی خاطر اقتدار کے دن کم اور مشکلات کے زیادہ دیکھے، 7 سال سے جو اداسی پاکستان پر چھائی تھی وہ امید میں بدلتی جارہی ہے،مریم نواز نے کہا کہ شیر کو ہرانے اور مٹانے والے کئی آئے اور کئی گئے، شیر وہیں کھڑا ہے۔

انہوں نے کہا کہ  آج پاکستان کے کونے کونے سے آوازیں آ رہی ہیں وزیراعظم نوازشریف، آج سفید پوش کے گھر بیماری آجائے تو سوچتا ہے بل ادا کروں یا دوائی لوں، سازش کے ذریعے نوازشریف کو 2017ء میں اقتدار سے نہ نکالا جاتا تو آج پاکستان کا یہ حال ہوتا؟

مریم نواز نے کہا کہ گزشتہ 4 سال جوکروں کی حکومت تھی، گزشتہ حکومت میں جو جتنی بڑی گالی دیتا تھا اس کو اتنی بڑی وزارت ملتی تھی۔ جنہوں نے خدمت کرنی تھی وہ گالی دیتے رہے اور الزامات لگاتے رہے، ہم کسی کو گالی نہیں دیتے، نوازشریف اس بار پھر آئیں گے اور ملک کو ٹھیک کرکے دکھائیں گے، نوازشریف نے کسی سے شاباش نہیں لینی کیونکہ وہ اس مٹی کا بیٹا ہے۔

انہوں نے مزید کہا کہ  نوازشریف باہر سے امپورٹ ہو کر نہیں آئے، نوازشریف کو کسی نے فارن فنڈنگ کے ذریعے ملک میں لانچ نہیں کیا، یہ مٹی ہماری ہے اور ہم نے ٹھیک کرنا، انشاءاللہ کر کے دکھائیں گے، نوازشریف واپس آرہے ہیں اور اس ملک کے اچھے دن بھی۔

کراچی میں  سولر پینلز کی درآمدات کی آڑ میں 13 ارب  روپے کی منی لانڈرنگ کا انکشاف ہوا ہے۔

 ایف بی آر کی  رپورٹ میں بتایا گیا ہے کہ  منی لانڈرنگ مافیا اور اوور انوائسنگ کے خلاف کارروائیوں کے نتیجے میں ڈائریکٹوریٹ پوسٹ کلیئرنس آڈٹ نے سولرپینلز کی مزید 6 فرضی کمپنیاں بے نقاب کر دی ہیں۔ فرضی کمپنیوں نے سولرپینلز کی آڑ میں 13ارب روپے کا کالا دھن بیرون ملک منتقل کیا، ان  6 فرضی کمپنیوں میں سے 3 کا  تعلق کراچی اور  دیگر 3 کا تعلق کوئٹہ سے ہے۔

دستاویزات میں بتایا گیا ہے کہ6 فرضی کمپنیوں نے گڈز ڈیکلیئریشن میں 9 ارب روپے کی اصل ویلیو کے سولر پینلزکی مالیت 13ارب ظاہر کی، ایف بی آر حکام  نے بتایا کہ  کسٹمز پوسٹ کلیئرنس آڈٹ کی ٹیم نے 6 نئے مقدمات درج کرکے گرفتاریوں کیلیے ٹیمیں بنا دی ہیں، ایک فرضی کمپنی کا مالک گرفتار کرکے عدالت سے 6 دن کا ریمانڈ بھی لے لیا ہے۔