اسلام آباد( این این آئی)پاکستان تحریک انصاف نے آئندہ انتخابات کے لیے سیاسی حکمت عملی مرتب کر لی۔
تحریک انصاف کے چیئرمین عمران خان نے انتخابی مہم کے حوالے سے پارٹی رہنماؤں کو ہدایات پہنچا دیں۔ انتخابات کی تاریخ کا اعلان ہوتے ہی پی ٹی آئی انتخابی مہم کا آغاز کردے گی۔
ذرائع کے مطابق ملک بھر میں ضلعی سطح پر ورکرز کنونشنز کروائے جائیں گے۔ روپوش رہنماؤں کو بھی ورکرز کنونشن کے لیے تیاریاں شروع کرنے کی ہدایت جاری کردی گئی ہے۔ انتخابات کی تاریخ کا اعلان ہوتے ہی روپوش رہنما بھی منظر عام پر آجائیں گے۔

چاغی (ویب ڈیسک) ضلع چاغی میں واقع چاغی بازار میں سڑک کنارے ہونے والے بم دھماکے میں 2 افراد جاں بحق ہوگئے۔
لیویز حکام کے مطابق دالبندین سے 60 کلومیٹر دور پاک افغان سرحدی علاقے میں واقع چاغی بازار میں سڑک کنارے نصب بارودی مواد پھٹنے سے اس وقت دھماکا ہوا جب ایک گاڑی وہاں سے گزر رہی تھی۔
لیویز حکام کے مطابق دھماکے کے نتیجے میں 2 افراد جاں بحق جب کہ تین زخمی ہوگئے۔
زخمیوں کو طبی امداد کے لیے دالبندین ہسپتال منتقل کردیا گیا ہے،لیویز اورایف سی نے علاقےکو گھیرے میں لےلیا ہے۔

اسلام آباد (این این آئی) پاکستان تحریک انصاف نے شعیب شاہین اور بیرسٹر گوہر کو عمران خان کا ترجمان نامزد کردیا۔
سیکرٹری جنرل عمرایوب کی طرف سے جاری نوٹیفکیشن کے مطابق ایڈووکیٹ شعیب شاہین اور بیرسٹر گوہر کوچیئرمین پی ٹی آئی عمران خان کا ترجمان نامزد کیا گیا ہے۔
واضح رہے کہ کچھ رون قبل پاکستان تحریک انصاف کی کورکمیٹی کے رکن اور عمران خان کے وکیل شیرافضل مروت نے الزام عائد کیا تھا شعیب شاہین ایڈووکیٹ پی ٹی آئی کے غدارہیں۔

کراچی (این این آئی) بلوچستان میں زلزلہ آنے کی پیش گوئی پرصوبے کے ماہر ارضیات کاموقف بھی سامنے آگیا۔

ماہر ارضیات پروفیسرڈاکٹردین محمد کاکڑ نے ایک انٹرویو میں کہا ہے کہ ڈچ سائنسدان کی طرف سے بلوچستان میں زلزلے کی پیشگوئی سے زیادہ پریشان ہونے کی ضرورت نہیں۔ 24 سے 48گھنٹے کے دوران زلزلے کی کم مدتی پیشگوئی ممکن نہیں۔

ڈاکٹر دین محمد کاکڑکاکہناتھا کہ چمن فالٹ لائن کابل کے جنوب سے شروع ہوتی ہے جو بلوچستان کے شہرچمن سے نوشکی قلات خضدار ،آواران سے بحیرہ عرب میں جاکر ختم ہوتی ہے۔ انہوں نے کہا کہ اس فالٹ لائن میں 1892 میں ایک بڑا زلزلہ آیا تھا جس سے پرانا چمن شہر تباہ ہوا تھا، انہوں نے کہا کہ س وقت چمن فالٹ لائن اگرچہ فعال ہوگئی ہے مگر یہ کہنا درست نہیں کہ اس سے ہنگامی طور پر زلزلہ آسکتا ہے ۔

دین محمد کاکڑ نے بتایا کہ چمن فالٹ لائن کوئٹہ کو براہ راست متاثر نہیں کرتی کیونکہ کوئٹہ کی اپنی فالٹ لائن موجود ہے۔انہوں نے کہاکہ کوئٹہ اورغزہ بند فالٹ لائن پر بھی خطرات موجود ہیں۔ انہوں نے مشورہ دیا کہ  کوئٹہ میں بلڈنگ کوڈ کی مکمل پاسداری اور زلزلے سے محفوظ بلڈنگیں بنانے کی اشد ضرورت ہے ۔

خیال رہے کہ رواں سال نیدرلینڈز سے تعلق رکھنے والے تحقیق کار فرینک ہوگر بیٹس نے 3 فروری کو ایک ٹوئٹ کی تھی اور بتایا تھا کہ جلد یا بدیر جنوبی وسطی ترکیہ، اردن، شام اور لبنان میں 7 اعشاریہ 5 شدت کا زلزلہ آئے گا، ان کی زلزلے سے متعلق پیشگوئی 3 روز بعد ہی سچ ثابت ہوئی تھی ترکیہ اور شام میں 6 فروری کو شدید ترین زلزلہ آیا تھا جس میں ہزاروں افراد ہلاک اور لاکھوں زخمی ہوئے تھے، اس کے علاوہ دیہات کے دیہات تباہ ہوگئے۔

ڈپٹی گورنر سٹیٹ بینک نے کہا ہے کہ بینکوں میں صرف پانچ لاکھ روپے تک کی رقوم کو قانونی تحفظ حاصل ہے۔

 سلیم مانڈوی والا کی زیرصدارت سینیٹ قائمہ کمیٹی خزانہ کے اجلاس میں شرکاء کو بریفنگ کے دوران  ڈپٹی گورنر سٹیٹ بینک نے بتایا  کہ کوئی بینک دیوالیہ، ڈوب جائے یا ناکام ہو جائے تو 5 لاکھ سے زیادہ  جمع رقم کو تحفظ حاصل نہیں۔ اکاؤنٹ میں موجود 5 لاکھ روپے سے زائد رقم محفوظ نہیں ۔

ڈپٹی گورنرسٹیٹ بینک نے مزید کہا کہ 5 لاکھ روپے تک کے ڈپازٹس رکھنے والے کھاتہ داروں کی شرح 94 فیصد ہے، صرف 6 فیصد اکاؤنٹ ہولڈرز کا بینک بیلنس 5 لاکھ روپے سے زیادہ ہے۔ 5 لاکھ روپے تک کے اکائونٹ ہولڈرز کو ڈیپازٹس پروٹیکشن کارپوریشن کے ذریعے ادائیگی کی جا سکتی ہے۔

۔