انڈیا کی سخت بندش کے باوجود بھی کچھ پاکستانی شائقین اسٹیڈیم میں بیٹھ کر میچ دیکھنے میں کامیاب ہو گئے۔
بھارتی شہر احمد آباد کے نریندر مودی گراؤنڈ میں اس وقت انڈیا پاکستان کا اہم ترین میچ جاری ہے اور اسٹیڈیم میں ہر جگہ انڈین ٹیم کو سپورٹ کرنے والوں کا ایک جم غفیر موجود ہے، وہیں اِکا دُکا پاکستانی سپورٹر بھی نظر آرہے ہیں۔
امریکی خبر رساں ایجنسی ”اے ایف پی“ کے مطابق ”سورماؤں“ کے مقابلے میں ”شاہین“ کے سپورٹر نہ ہونے کے برابر ہیں، انہی چند میں محمد عزیر اور آصف سید علی دو ایسے پاکستانی بھی موجود ہیں جنہیں میچ میں شاہینوں کو سپورٹ کرتے دیکھا جا سکتا ہے۔محمد عزیر امریکی نژاد پاکستانی ہیں اور انہوں نے بتایا کہ ’ہم یہاں بالآخر پہنچ تو گئے ہیں لیکن ہم کیسے پہنچے ہیں یہ مت پوچھیں؟ ویزے کا مرحلہ بہت لمبا اور تھکا دینے والا تھا لیکن نے ہم نے آخر ویزا حاصل کر لیا اور ہم یہاں پہنچ کر بہت خوش ہیں۔‘
ہاتھوں میں پاکستانی جھنڈا اٹھائے عزیر نے کہا کہ ’یہ بہت افسوس کی بات ہے کہ سٹیڈیم میں صرف کچھ ہی پاکستانی فینز ہیں لیکن ہم نعروں کے جواب میں نعرے لگانے کی بھرپور کوشش کریں گے‘
یہ دونوں دوست امریکہ کے شہر ہیوسٹن سے اپنے پسندیدہ کھلاڑیوں کو سپورٹ کرنے کے لئے ہفتے کو احمد آباد پہنچے تھے۔آصف سید علی نے دلچسپ انداز میں کہا کہ ’ہم لوگوں نے پاکستانی شرٹس کے نیچے انڈین شرٹ بھی پہنی ہوئی ہے، اگر ہم ہار گئے تو ہم وہ پہن کر گھومیں گے۔‘
احمدآباد کے نریندر مودی سٹیڈیم میں موجود عزیر گزشتہ برس ٹی20 ورلڈ کپ کے پاکستان انڈیا میچ میں بھی موجود تھے۔
انڈیا کی جانب سے ویزوں کے اجراء میں تاخیر کے باعث پاکستانی مداح انڈیا نہیں جا سکے ہیں۔

بھارت کے نریندرا مودی سٹیڈیم میں بھی ” پاکستان کا مطلب کیا لاالہ الا اللہ” کے نعرے لگ گئے۔
آئی سی سی کرکٹ ورلڈ کپ کے پاک بھارت میچ کے دوران بھارتی وزیراعظم کی آبائی ریاست گجرات کے شہراحمد آباد میں واقع نریندرا مودی سٹیڈیم ایک لاکھ کے لگ بھگ شائقین نے براہ راست میچ دیکھا۔
پاکستانی شائقین کوویزے جاری نہ ہونے کی وجہ سے گرائونڈ بھارتی شائقین سے ہی کھچا کھچ بھرا ہوا تھا لیکن اس دوران گرائونڈ سے ایسے نعرے بلند ہوئے جو بھارت میں کسی جرم سے کم نہیں ۔
گرائونڈ میں موجود شائقین کی کچھ ٹولیاں مسلسل پاکستانی ٹیم کے حق میں نعرے بازی کررہی تھیں۔ شائقین باربار یہ نعرہ لگاتے دیکھے جاسکتے ہیں” پاکستان کامطلب کیالا الہ الا اللہ، جیتے گا بھئی جیتے گا پاکستان جیتے گا۔ پاکستان زندہ باد۔

بھارتی شہراحمد آباد کے نریندرا مودی کرکٹ سٹیڈیم میں پاکستانی ترانے کی گونج اور سبزہلالی پرچم لہرانے پرسٹیڈیم میں موجود ہزاروں تماشائیوں کوسانپ سونگھ گیا ۔
کرکٹ کے عالمی کپ کے موقع پر دنیا کے مختلف ممالک سے شائقین اپنی ٹیموں کو سپورٹ کرنے بھارت کارخ کررہے ہیں لیکن بھارت کی مسلم دشمنی میگاایونٹ کی میزبانی کے دوران بھی کم نہ ہوسکی ۔ بھارت نے پاکستانی شائقین کے ساتھ ساتھ میگاایونٹ کی کوریج کرنے والے پاکستانی صحافیوں کو بھی ویزے جاری نہیں کئے۔
14 اکتوبر کو ورلڈ کپ کے ایک ہائی وولٹیج میچ کے دوران جب پاکستانی ٹیم میدان میں اتری تو گرائونڈ بھارتی شائقین سے کھچا کھچ بھرا ہوا تھا اور پاکستانی شائقین کی کمی پوری شدت کے ساتھ محسوس کی جارہی تھی۔ ایسے میں جب دونوں ٹیموں کے کھلاڑی قومی ترانے کے احترام میں کھڑے ہوئے پاکستان کا سبز ہلالی پرچم بھارت کے متعصب وزیراعظم کے آبائی شہر اوربھارتی وزیراعظم کے نام سے ہی منسوب نریندرا مودی سٹیڈیم میں پوری شان وشوکت کے ساتھ لہرا رہاتھا۔
سٹیڈیم میں پاکستان کے قومی ترانے کی گونج نے پوری دنیا کو پاکستان کی موجودگی کااحساس دلایا۔