اسلام آباد (این این آئی) پاکستان تحریک انصاف نے پریکٹس اینڈ پروسیجرایکٹ کے بارے میں عدالتی فیصلے پر اطمینان کااظہار کرتے ہوئے انتخابات کے لئے بھی سپریم کورٹ سے امید لگالی۔
اڈیالہ جیل میں چیئرمین پی ٹی آئی عمران خان سے ملاقات کے بعد بیرسٹر علی ظفر نے میڈیاسے گفتگو کرتے ہوئے کہا کہ چیئرمین پی ٹی آئی سپریم کورٹ کے کل کے فیصلے سے مطمئن ہیں کہ ماضی کے کیس نہیں کھلیں گے اور انہوں نے کہا کہ الیکشن کمیشن نے تو الیکشن نہیں کرائے اب ساری نظریں سپریم کورٹ پر ہیں، انہوں نے کہا اپیل کا حق ہونا چاہیے یہ درست فیصلہ ہے۔
انہوں نے کہا کہ چیئرمین پی ٹی آئی کامطالبہ ہے 90 دن میں انتخابات سے متعلق پٹیشن کو سماعت کیلئے مقرر کیا جائے، الیکشن وقت پرہوں اورسپریم کورٹ کی سپر ویژن میں ہوں۔
علی ظفرکاکہناتھا کہ چیئرمین پی ٹی آئی کی صحت بالکل ٹھیک ہے، انہوں نے پیغام دیا ہے کہ ملک معاشی بحران کا شکارہے اور ملک کو اس وقت مقبول رہنما کی ضرورت ہے، مقبول لیڈر صرف انتخابات کے ذریعے آسکتا ہے۔

حکومت نے عالمی مالیاتی ادارے (آئی ایم ایف) کے ساتھ شیئر کیے جانے والے پلان میں 2 ایل این جی پاورپلانٹس کی نجکاری نہ کرنے کا فیصلہ کیا ہے۔
ذرائع کے مطابق آئی ایم ایف کے ساتھ حویلی بہادرشاہ اور بلوکی پاور پلانٹس کی نجکاری کی کمنٹمنٹ تھی لیکن نگران حکومت کے دوران ان پاورپلانٹ کی نجکاری نہیں کی جائے گی۔ذرائع کا کہنا ہےکہ آئی ایم ایف نے پاورپلانٹس سمیت حکومتی ملکیتی اداروں کی نجکاری کامطالبہ کیا ہے اور پاورپلانٹس کی نجکاری نہ ہونے پرآئی ایم ایف اقتصادی جائزے میں سخت مطالبات کر سکتا ہے۔
ذرائع کے مطابق آئی ایم ایف کی تجویزتھی کہ پاورپلانٹس کی نجکاری سے زرمبادلہ ذخائر بڑھیں گے تاہم ان دونوں دونوں پاور پلانٹس کی نجکاری کا فیصلہ آئندہ منتخب حکومت کرے گی۔

محکمہ موسمیات نے 14 تا 17 اکتوبر بارش اور پہاڑوں پر برف باری کی پیش گوئی کردی۔
محکمہ موسمیات کے مطابق 13 اکتوبر کو مغربی ہوائیں ملک کے بالائی علاقوں میں داخل ہوں گی، یہ ہوائیں 14 اکتوبر کی رات تک ملک کے بالائی اور وسطی علاقوں تک پھیل جائیں گی، 13 سے 17 اکتوبرکے درمیان خیبرپختونخوا کے بلند پہاڑوں پر برف باری اور میدانی علاقوں میں ژالہ باری کی توقع ہے۔
محکمہ موسمیات کے مطابق چترال، دیر، سوات، مالاکنڈ، شانگلہ، بونیر ، مانسہرہ، ایبٹ آباد، مردان، نوشہر اور ڈیرہ اسماعیل خان میں بارش اور آندھی متوقع ہے، 13 سے 17 اکتوبر کے دوران اسلام آباد، خطہ پوٹھوہار، مری، گلیات، لاہور، سیالکوٹ، گوجرانوالہ میں بارش اور ژالہ باری متوقع ہے۔
مزید کہاگیا ہے کہ 16 سے 18 اکتوبر کے دوران لیہ، بھکر، کوٹ ادو، راجن پور، بہاولپور اور رحیم یارخان میں بارش متوقع ہے۔

لاہور ہائیکورٹ نے لاہور کی ضلعی انتظامیہ کو ہدایت کی ہے کہ وہ پاکستان تحریک انصاف کی جانب سے شہر میں جلسے کی اجازت سے متعلق فیصلہ کر کے جمعہ 13 اکتوبر کے روز رپورٹ عدالت میں جمع کروائے۔
تحریک انصاف کی جانب سے ہائیکورٹ میں دائر درخواست میں مؤقف اختیار کیا گیا ہے کہ ملک میں عنقریب عام انتخابات کا انعقاد ہونے جا رہاہے اور تحریک انصاف اس ضمن میں الیکشن کے لیے اپنے منشور کا اعلان جلسے میں کرنا چاہتی ہے۔
پی ٹی آئی کے مطابق 15 اکتوبر کو لاہور میں اس متوقع جلسہ کے لیے ‏ڈپٹی کمشنر سمیت دیگر ذمہ داران کو درخواستیں دی گئیں تاکہ اجازت نامہ مل سکے تاہم لبرٹی چوک میں جلسے کی اجازت نہیں دی گئی۔
درخواست میں مزید کہا گیا ہے کہ الیکشن کے لیے آئین ہر سیاسی جماعت کو عوامی رابطے کی اجازت دیتاہے اور ضلعی انتظامیہ کی جانب سے ‏اجازت نہ ملنے سے جلسے کے انتظامات کرنے کے لیے مشکلات کا سامنا ہو سکتا ہے ۔ درخواست میں استدعا کی گئی ہے کہ عدالت ڈپٹی کمشنر لاہور کو یہ جلسہ کرنے کی اجازت دینےکا حکم دے۔
عدالت نے ڈپٹی کمشنرلاہور کو جلسے کی درخواست پر فیصلہ کرنے کی ہدایت کرتے ہوئے رپورٹ عدالت میں جمع کروانے کی ہدایت کی ہے۔

شیخوپورہ میں ڈکیتی کے دوران 2 بہنوں سے زیادتی کرنے والے 5 ڈاکو پولیس مقابلے میں ہلاک ہوگئے۔
ڈی پی او شیخو پورہ زاہد نواز کے مطابق سرگودھا شیخوپورہ بائی پاس پر پولیس مقابلے کے دوران ملزمان نے پولیس وین پر فائرنگ کی تو پولیس نے گھیراؤ کرلیا ۔ فائرنگ کے تبادلے کے دوران زیر حراست ملزمان اپنے ساتھیوں کی فائرنگ سے ہلاک ہوگئے۔ حملہ آوروں کی گرفتاری کے لیے سرچ آپریشن جاری ہے۔
ڈی پی او کا مزید کہنا تھا کہ ہلاک ملزمان دوران ڈکیتی خواتین سے زیادتی کرتے تھے اور اس طرح کے متعدد واقعات میں ملزمان کی شناخت ہوئی ہے اور ڈی این اے بھی میچ ہوئے ہیں۔ ملزمان نے ایک ماہ قبل ڈکیتی کے دوران 2 بہنوں کا ریپ کیا تھا۔

لاہور میں پولیس نے احتجاج کرنے والے سرکاری ملازمین پردھاوا بول کر خواتین سمیت 100 سے زائد مظاہرین کوگرفتارکرلیا۔سرکاری ملازمین پنشن رولز میں ترامیم کے خلاف سول سیکرٹریٹ کے باہر احتجاج کررہے تھے ۔
پولیس کادعویٰ ہے کہ سیکرٹریٹ چوک میں موجود مظاہرین ڈنڈوں سے لیس تھے۔ پولیس نے مظاہرین کے کیمپ پر رات کے وقت دھاوا بول کر49 افراد کو موقع سے حراست میں لے لیاجبکہ بعض اطلاعات کے مطابق 100 سے زائد افراد کی گرفتاری عمل میں لائی گئی۔ مظاہرین کے خلاف تھانہ اسلام پورہ میں مقدمہ درج کرلیا گیا ہے ، مقدمے میں کار سرکار میں مداخلت، اقدام قتل، پولیس پر حملے سمیت دیگردفعات کوشامل کیا گیا ہے۔
ایف آئی آر کے مطابق ڈنڈوں سے لیس افراد نے پولیس پارٹی پر حملہ کیا ، سرکاری ہیلمٹ اور دیگر سامان چھین کر پولیس اہلکاروں کی وردیاں پھاڑ دیں۔
دوسری طرف یہ بھی اطلاعات ہیں کہ دھرنے کے منتظمین پولیس آپریشن سے قبل ہی غائب ہوگئے تھے ۔