اشیاء خورونوش کی قیمتوں میں اضافہ: روٹی، چاول، دالیں مزید مہنگی کردی گئیں

لاہور (این این آئی)ضلعی انتظامیہ نے اشیائے خورونوش کی قیمتوں میں اضافہ کر دیا، روٹی، چاول، 6 اقسام کی دالیں، سفید چنے، بیسن کی قیمتیں بڑھا دی گئیں۔ضلعی انتظامیہ کے نوٹیفکیشن کے مطابق سادہ روٹی 2 روپے اضافہ سے 18 سے بڑھا کر 20 روپے کر دی گئی، دال چنا باریک 5 روپے اضافہ سے 210، دال چنا سپیشل 225 روپے کلو ہوگئی، دال مسور 50 روپے اضافہ سے 270 روپے سے بڑھ کر 320 روپے کی ہوگئی، دال ماش دھلی ہوئی 20 روپے اضافہ سے 530 روپے کی کر دی گئی۔نوٹیفکیشن کے مطابق دال مونگ 30 روپے اضافہ سے 220 روپے سے بڑھا کر 250 کردی گئی، سفید چنے 320 روپے سے بڑھا کر 340 روپے کلو کردیئے، بیسن 15روپے اضافہ کے ساتھ 215 روپے سے بڑھا کر 230 روپے کر دیا گیا، چاول کی قیمت میں 5 روپے کا اضافہ کیا گیا، قیمت 310 سے 315 تک جا پہنچی، دودھ کی قیمت فی لٹر 160، دہی کی قیمت 180 روپے فی کلو مقرر کی گئی۔ڈی سی لاہور کے مطابق اشیائے خورونوش کے ہول سیل و پرچون قیمتوں کا تعین کیا گیا، کمپنیوں کی پراڈکٹس پرنٹ شدہ قیمتوں پر فروخت کی جائیں گی، سرکاری نرخ ناموں پرعمل نہ کرنے والوں کیخلاف سخت کارروائی ہو گی۔