میاں بیوی کے درمیان بچی کے نام کا انوکھا تنازعہ : جج نے فیصلہ سنادیا

نئی دہلی : بھارتی ریاست کیرالہ کی عدالت عالیہ نے حال ہی میں ایک تین سالہ بچی کا نام رکھا ہے کیونکہ اس کے والدین نام رکھنے پر اتفاق قائم کرنے میں ناکام رہے ۔ والدین کے درمیان اختلاف کی وجہ سے بچی کا برتھ سرٹیفکیٹ بے نام رہ گیا تھا۔
امریکی ٹی وی کی رپورٹ کے مطابق ہائی کورٹ کا یہ فیصلہ ماں کی طرف سے دائر درخواست کے جواب میں آیا جس نے بچی کے لیے سرکاری دستاویز میں نام درج کرنے کی کوشش کی تاہم جب رجسٹرار نے دونوں والدین کی موجودگی کا مطالبہ کیا اور وہ اس معاملے پر اتفاق رائے پر پہنچنے میں ناکام رہے تو والدہ نے حل کیلئے عدالت کا رخ کیا۔
جسٹس بیچو کورین تھامس کی سنگل بنچ نے نے نوٹ کیا کہ بچی کے لیے نام کا نہ ہونا بچی کی فلاح و بہبود یا بہترین مفادات کے لیے سازگار نہیں ہے ۔ بچی کی فلاح کا تقاضا ہے کہ اسے ایک نام دیا جائے ۔
بچی کی ماں اس کا نام ”پنیا” رکھنا چاہتی تھی، جبکہ والد نے نام ”پدما” رکھا تھا۔ نتیجتاً، عدالت نے حکم دیا کہ بچی کا نام ماں کی پسند کے تحت ‘پْنیا’ رکھا جائے اور باپ کا نام کنیت کے طور پر شامل کیا جائے۔