کسی سے بدلہ نہیں لینا،سعدرفیق کاپی ٹی آئی سے بات چیت کااعلان

تلہ گنگ(این این آئی)مسلم لیگ نکے رہنما خواجہ سعد رفیق نے کہاہے کہ ہم کسی سے انتقام نہیں لیں گے، حکومت میں آنے کے بعد پی ٹی آئی سمیت تمام سیاسی جماعتوں سے بات چیت کریں گے۔
خواجہ سعد رفیق نے کارکنوں سے خطاب کرتے ہوئے کہا کہ میاں نوازشریف کی قیادت میں حکومت میں آنے کے بعد ہم تمام سیاسی جماعتوں سے بات کریں گے، پی ٹی آئی سے بھی گفتگو کریں گے، تمام سیاسی جماعتوں سے بات چیت پاکستان کو آگے لے جانے کیلئے ضروری ہے، اکیس اکتوبر محض نواز شریف کی واپسی کا دن نہیں ہے بلکہ یہ پاکستان کی تاریخ کا دھارا بدلنے کا دن ہے۔سابق وفاقی وزیر نے کہا کہ ہم کسی سے انتقام نہیں لیں گے، ہم بدلے کی بات نہیں کریں گے۔
انہوں نے کہا کہ ملک کے ساتھ ظلم کرنے والے بے نقاب ہو چکے ہیں،وہ وہ قبروں میں بھی اتر جائیں ان کا جرم معاف نہیں ہو گا۔ خواجہ سعد رفیق نے کہا کہ جس طرح چند سابق جرنلز، سابق ججز اور صحافیوں نے مل کر ایک غیر سنجیدہ اور ناتجربہ کار کو پرموٹ کیا اور ملک کا مہاتما بنایا اس سے پاکستان کو ناقابل تلافی نقصان پہنچا۔