بغاوت کروائی جارہی ہے،ملک توڑاجارہاہے، میاں جاویدلطیف

شیخوپورہ(این این آئی) مسلم لیگ (ن)کے سینئر رہنما میاں جاوید لطیف نے کہاہے کہ عالمی سازشوں سے جغرافیائی اور معاشی لحاظ سے ملک کو توڑا جارہا ہے، بغاوت کروائی جارہی ہے۔
میاں جاوید لطیف نے جنرل کونسل سے خطاب کرتے ہوئے کہا کہ قومی خدمت کرنے والے لوگوں سے قربانیاں لی جاتی ہیں، نواز شریف کہتا ہے میرا استقبال نہ کرو، مینار پاکستان پہنچ کر تجدید عہد کریں،ہم 2017 والا پاکستان لائیں گے۔
مسلم لیگ ن کے رہنمانے کہا کہ عالمی قوتوں کے اشارے سے اداروں میں بغاوت کرائی جارہی ہے، 2017 کے کرداروں کو سزامل جاتی تو 9مئی کا واقعہ نہ ہوتا، اداروں کو کھوکھلا کیا جا رہا ہے۔جاوید لطیف نے کہاکہ سہولت کاری کے ذریعے ملک میں بغاوت کروائی جارہی ہے، ملک کو بدنام کیا جا رہا ہے، ہمیں کہا جا رہا ہے حکومت نہ لیں ۔ انہوں نے کہا کہ جسٹس شوکت کی بات سنی جاتی تو بندیال پیدا نہ ہوتا۔