کراچی(این این آئی)اسمگلنگ کی روک تھام اور مقامی صنعت کے تحفظ کیلئے 5 درآمدی اشیا پر 10 فیصد پروسیسنگ فیس عائد کردی گئی۔ یہ اشیا افغان ٹرانزٹ ٹریڈ کے تحت درآمد ہوتی ہیں۔
ایف بی آر کے مطابق پاکستان کسٹمز نے ایس آر نمبر 1380 جاری کرتے ہوئے اسمگلنگ کی روک تھام اور مقامی صنعت کے تحفظ کیلئے افغان ٹرانزٹ ٹریڈ کے تحت درآمد ہونے والی 5 اشیا پر 10 فیصد پروسسنگ فیس عائد کردی۔
ایف بی آرکے مطابق پاکستان کسٹمز کے نوٹیفکیشن کا اطلاق فوری طور پر ہوگا، جس کے تحت چاکلیٹ اور ٹافیوں کی 10 ٹیرف لائنز کی درآمد پر پروسسنگ فیس عائد کی گئی ہے۔
ایف بی آر کے مطابق جوتوں کی 21 ٹیرف لائنز پر بھی پروسسنگ فیس عائد کی گئی ہے جبکہ ایس آر کے تحت ہر قسم کی مشینری ماسوائے مکمل ہوم اپلائنسز پر پروسسنگ فیس عائد ہوگی۔
فیڈرل بورڈ آف ریونیو کے مطابق کمبل اور ہوم ٹیکسٹائل کی 10 ٹیرف لائنز پر بھی پروسسنگ فیس عائد ہوگی، ملبوسات کی 33 ٹیرف لائنز پر پروسسنگ فیس عائد کردی گئی ہے۔
