اسلام آباد (این این آئی) سابق وزیر فیصل واوڈا نے کہاہے کہ نو مئی واقعات کی معافی نہیں ہے تو نواز شریف کا طیارہ ہائی جیک کیسے معاف ہوگیا۔
سابق وزیر فیصل واوڈا نے ایک انٹرویومیں کہا کہ جو باتیں 13،14ماہ پہلے کی تھیں وہ ساری درست ثابت ہورہی ہیں۔
لوگوں کو اب احساس ہو رہا ہے، اس لیے سامنے آرہے ہیں۔فیصل واوڈا نے کہا کہ عثمان ڈارنے جوباتیں کی ہیں بالکل درست ہیں لیکن چندنام بھول گئے، 9مئی کے واقعات کی کوئی بھی صفائی نہیں دے سکتا۔
سابق وزیر نے بتایاکہ چیئرمین پی ٹی آئی کو کہا تھا آپ غلط کرنے جا رہے ہیں لیکن وہ نہیں مانے، میرااورچیئرمین پی ٹی آئی کااختلاف اسی بات پرہواتھاکہ آپ غلط کررہے ہیں۔
انہوں نے کہاکہ کیمرے کے سامنے بلی بھی شیربن جاتی ہے، کسی پر دبائو تھا تو کیمرے کے سامنے کہہ سکتا تھا کیوں نہیں کہا،9مئی میں جولوگ ملوث تھے، سب لوگ ملبہ چیئرمین پی ٹی آئی پر ڈالیں گے۔
میں نے کہا تھا کہ ان لوگوں کی قطاریں لگیں گی سب پارٹی چھوڑیں گے۔نواز شریف کی واپسی کے حوالے سے فیصل واوڈا نے کہا کہ 9مئی واقعات کی معافی نہیں ہے تو نوازشریف کی طیارہ ہائی جیک کیسے معاف ہوگیا۔
اسحاق ڈار سے متعلق بھی انہوںنے کہاکہ اسحاق ڈار بھی ایک سو چونسٹھ کا بیان ریکارڈ کرکے گئے تھے، پھر واپس آکر تمام کیسز معاف کروائے۔
سابق وزیر نے کہا کہ کسی پر دبائو ہے تو آکر ٹی وی پر بولے یا ٹوئٹ کریں کیوں نہیں کررہے۔
عارف علوی پر تنقید کرتے ہوئے فیصل واوڈا نے کہا کہ فوجی تنصیبات پرحملے عارف علوی کی بیعت لے کرہی کیے جارہے تھے، عارف علوی کے خلاف بھی کیس تیار ہیں۔
