افغانستان کرکٹ ٹیم کے باؤلر راشد خان نے افغان صوبے ہرات میں زلزلہ متاثرین کیلئے ورلڈ کپ کے میچز کی فیس دینے کا اعلان کر دیا۔
سماجی رابطے کی ویب سائٹ ایکس پر جاری کردہ ٹویٹ میں انہوں نے بدترین زلزلے سے ہونے والے جانی نقصان پر دکھ کا اظہار کیا۔ انہوں نے اپنے اکاؤنٹ سے زلزلہ متاثرین کی کچھ دل دہلا دینے والی تصاویر شیئر کیں۔
راشد خان نے لکھا کہ میں نے افغانستان کے مغربی صوبوں (ہرات، فراہ اور بادغیس) میں آنے والے زلزلے کے المناک نتائج کے بارے میں سنا جس کا مجھے بے حد افسوس ہے۔
افغان کرکٹر کا کہنا تھا کہ ‘میں متاثرہ لوگوں کی مدد کیلئے کرکٹ ورلڈکپ کی اپنی تمام میچ فیس عطیہ کر رہا ہوں۔ جلد ہی ہم ان لوگوں سے رابطہ کرنے کیلئے ایک فنڈ ریزنگ مہم شروع کریں گے ۔
خیال رہے کہ ہفتے کو افغانستان میں ہولناک زلزلے کے نتیجے میں کئی دیہات صفحہ ہستی سے مٹ گئے ہیں ، جبکہ ہلاکتوں کی تعداد 2 ہزار سے زائد ہو گئی ہے۔
