پشاور : نگران وزیراعظم انوارالحق کاکڑ نے واضح کیا ہے کہ غیر قانونی غیر ملکیوں کوہرصورت واپس جانا ہوگا۔وہ جمعہ کو دورہ پشاور کے موقع پر ایوان صنعت وتجارت کے وفد اور میڈیا سے گفتگو کر رہے تھے۔ انہوں نے کہا کہ ہم نے یہ فیصلہ کرنا ہے کہ کیا ایک نسل کی قربانی دے کر ہم آنے والی نسلوں کے مستقبل کو محفوظ کر سکے ہیں۔ انہوں نے کہا کہ اس ملک کیلئے لوگوں نے اپنی جانیں دی ہیں تاہم کچھ لوگ ٹیکس دینے کو تیارنہیں اورحق سمگلنگ مانگ رہے ہیں ۔
ایک سوال کے جواب میں وزیراعظم نے کہا کہ تحریک طالبان پاکستان سے کسی قسم کے مذاکرات نہیں ہوں گے۔ غیر قانونی مقیم باشندوں کو اپنے ملکوں کو واپس جانا ہو گا۔ یہ واپسی کسی انتقام یا دشمنی کی وجہ سے نہیں بلکہ جرائم، دہشت گردی اور سماجی برائیوں سمیت دیگر چیلنجز کی وجہ سے ہے ۔
اس موقع پر وزیراعظم کامزید کہنا تھا کہ ڈالر کی قیمت میں کمی سے پاکستان پر بیرونی قرضوں میں 4 ہزار ارب روپے کی کمی آئی ہے، چینی، گھی سمیت دیگر بہت سی اشیاء خوردونوش کی قیمتوں میں کمی آئی ہے جس کا ریلیف عوام کو مل رہا ہے۔ایک سوال کے جواب میں انہوں نے کہا کہ کسی رجسٹرڈ جماعت کو انتخابی عمل سے باہر نہیں رکھا جا سکتا۔
قبل ازیں نگران وزیراعظم کی زیر صدارت خیبر پختونخوا سے متعلق امور پر اہم اجلاس گورنر ہاؤس پشاور میں منعقد ہوا۔
اجلاس کے شرکاء سے گفتگو کرتے ہوئے وزیراعظم نے کہا کہ حکومت کے بروقت اقدامات کی وجہ سے امریکی ڈالر کی قیمت میں کمی آئی ہے۔ سمگلنگ اور کرپشن کو بالکل برداشت نہیں کیا جائے گا
۔انہوں نے کہا ہدایت کی کہ امن و امان اور سیکورٹی کی صورت حال کی بہتر بنانے کے لیے ہر ممکن وسائل بروئے کار لائے جائیں۔انہوں نے ہدایت کی کہ پولیس کو جدید آلات سے لیس کیا جائے تا کہ دہشت گردی کی عفریت سے بہتر انداز میں نمٹا جا سکے۔
