غزہ ہسپتال پر حملہ: بی بی سی اور امریکی ٹی وی نے اسرائیلی دعویٰ مسترد کر دیا

برطانوی اور امریکی میڈیا نے غزہ میں ہسپتال پر بمباری کا الزام فلسطینی تنظیم پرعائد کرنے کا اسرائیلی دعویٰ مسترد کردیا۔
منگل کو غزہ کے ایک ہسپتال پر اسرائیل کے حملے میں 500 کے قریب فلسطینی شہید ہوئے ہیں جب کہ سیکڑوں زخمی ہیں۔
اسرائیل سمیت امریکی صدر نے غزہ کے ہسپتال پرحملے کی ذمہ داری فلسطینی گروپوں پر عائد کی ہے۔
تل ابیب میں اسرائیلی وزیراعظم نیتن یاہو سے ملاقات کے موقع پر گفتگو کرتے ہوئے امریکی صدر بائیڈن کا کہنا تھا کہ غزہ کے ہسپتال پر حملہ بظاہر آپ نے نہیں دوسری سائیڈ نے کیا، البتہ امریکی صدر نے اس حوالے سے کسی ثبوت کا کوئی ذکر نہیں کیا۔
برطانوی نشریاتی ادارے نے غزہ میں ہسپتال پر فلسطین کی مزاحمتی تحریک حماس کے حملے کے اسرائیلی دعوؤں کو مسترد کر دیاہے۔
بی بی سی نے کہا کہ کسی بھی راکٹ حملے سے ایسی بھیانک تباہی نہیں ہوتی، جیسی آج دیکھی۔
اس کے علاوہ امریکی چینل ایم ایس این بی سی نے کہا کہ اسرائیل دعوے اب تک صرف بیانات کی حد تک ہی محدود رہے ہیں، حماس یا اسلامی جہاد کے ہسپتال پر حملے کا اب تک کوئی ٹھوس ثبوت سامنے نہیں لایا گیا۔