نواز شریف کی4 سال بعد رائیونڈ آمد، والدین اور اہلیہ کی قبروں پر فاتحہ خوانی

مسلم لیگ ن کے قائد اور سابق وزیراعظم نوازشریف چار سال بعد رائے ونڈ میں اپنی رہائش گاہ جاتی امرا پہنچ گئے ۔
نوازشریف جاتی امرا پہنچے تو کارکنوں نے آتش بازی کرکے استقبال کیا اور بکرے کاصدقہ بھی کیا۔ جاتی امرا پہنچنے پر نوازشریف اپنے والدین کی قبروں پر گئے اور مرحومہ اہلیہ کلثوم نوازسمیت خاندان کے دیگر افراد کی قبروں پر بھی فاتحہ خوانی کی۔
خیال رہےکہ نواز شریف چار سال بعد ہفتہ کے روزوطن واپس پہنچے تھے، سابق وزیراعظم کے طیارے نے اسلام آباد انٹرنیشنل ائیرپورٹ پر لینڈ کیا جہاں اسحاق ڈار اور اعظم نذیر تارڑ نے پارٹی قائد کا استقبال کیا۔
ائیرپورٹ پر اسٹیٹ لاؤنج میں نواز شریف کی مسلم لیگ (ن) کی قانونی ٹیم سے مشاورت ہوئی جس کے بعد انہوں نے قانونی دستاویزات پر دستخط کیے۔
انہوں نے ایون فیلڈ اور العزیزیہ ریفرنسز میں سزا کے خلاف اپیلیں بحال کرنے کی درخواست پر دستخط کیے، ان کا بائیو میٹرک سرٹیفکیٹ بھی لیاگیا۔
اسلام آباد ائیرپورٹ پرنواز شریف نے تقریباً دوگھنٹے قیام کیا، بعدازاں نواز شریف خصوصی پرواز پر لاہور پہنچ گئے جہاں شہباز شریف سمیت کارکنوں نے ان کا استقبال کیا۔
لاہور ائیرپورٹ سے نواز شریف ہیلی کاپٹر کے ذریعے جلسہ گاہ کے لیے روانہ ہوئے۔ ان کے ہیلی کاپٹر کیلئے شاہی قلعےکے پاس دیوان خاص پر ہیلی پیڈ بنایا گیا تھا، نواز شریف نے ہیلی کاپٹر سے اترنے کے بعد نماز ادا کی۔
بعدازاں مینار پاکستان پر ایک بڑے جلسے سے خطاب کیا اور جلسے کے بعد اپنی رہائش گاہ رائیونڈ پہنچے ۔