قومی ایئرلائن پی آئی اے اور پاکستان اسٹیٹ آئل (پی ایس او)کے درمیان معاملات طے پاگئے۔

 پی آئی اے نے پی ایس او کو 48 کروڑ روپے کی ادائیگی کردی۔ ترجمان پی آئی اے کے مطابق پی ایس او کو باقی واجبات کی ادائیگی کا شیڈول بھی طے پاگیا۔

پی ایس او نے مدینہ پرواز پی کے 747 سمیت پی آئی اے کے طیاروں کو ایندھن سپلائی شروع کردی ہے۔

مسلم لیگ ( ن ) کی سینئر نائب صدر اور چیف آرگنائزر مریم نواز نے کہا ہے کہ  نواز شریف 21 اکتوبر کو وطن واپسی پر پاکستان کی ترقی کا ویژن دیں گے۔

مریم نواز کی زیر صدارت پارٹی کے اقلیتی ونگ کا مشاورتی اجلاس ہوا جس میں مسیحی ، سکھ اور ہندو برادری سے تعلق رکھنے والے عہدیداران نے شرکت کی،اجلاس سے خطاب کرتے ہوئے مریم نواز نے کہا  کہ کوئی اقلیت کوئی اکثریت نہیں، ہم سب پاکستانی ہیں، نوازشریف عوام اور ملک کو مشکلات سے نکالنے آ رہے ہیں، 21 اکتوبرکو پاکستان کے اچھے دن واپس آ رہے ہیں۔

انہوں نے کہا کہ نوازشریف کو نکالا تو ملک سے ترقی اور خوشحالی اور امن وسکون بھی نکل گیا، نواز شریف مینار پاکستان پر پاکستان کو معاشی آزادی دلانے کا ایک اور تاریخی عہد کریں گے۔

مریم نواز کا کہنا تھا کہ  اقلیتوں کے حقوق کی خلاف ورزی نظریہ پاکستان اور قائد اعظم کے فرمودات کی خلاف ورزی ہے، قومی فیصلہ سازی میں اقلیتوں کے کردار اور آواز کو بڑھانا ہے، پاکستان کے نوجوانوں کو مذموم مقاصد کے لئے استعمال کیا گیا، اللہ تعالیٰ کے فضل سے تمام سازشی کردار اپنے انجام کو پہنچ چکے ہیں،انہوں نے کہا کہ سانحہ جڑانوالہ نے ہمارے سر شرم سے جھکا دئیے ، سانحہ میں ملوث عناصر کو سزا ملنی چاہیے۔

مسلم  لیگ ن کا مفاہمتی پالیسی کا حامی گروپ نواز شریف کی واپسی مؤخر کرانے میں سرگرم ہو گیا جبکہ پارٹی کے دوسرے گروپ کی خواہش ہے کہ واپسی ملتوی نہ ہو۔

پارٹی ذرائع  کا کہنا ہے کہ مفاہمتی گروپ نے وطن واپسی ملتوی کرنے کی تجویز دی ہے، تاہم قائد ن لیگ  نے اس تجویز پر فوری ردعمل دینے سے گریز کیا ہے۔

 ذرائع کے مطابق  مفاہمتی گروپ کا مؤقف ہے کہ مہنگائی، بے روزگاری سے پریشان عوام کو نواز شریف کی وطن واپسی میں زیادہ دلچسپی نہیں، موجودہ حالات میں عوام کی جانب سے نواز شریف کے شایان شان استقبال کی توقع رکھنا مناسب نہیں۔

ذرائع نے مزید بتایا کہ الیکشن کے قریب یا اس کی باقاعدہ تاریخ کا اعلان ہونے کے بعد نواز شریف کو واپس آنا چاہئے۔

عدالت نے دہشتگردی کے مقدمے میں  پی ٹی ایم کے رہنما علی وزیر کی درخواستِ ضمانت 50 ہزار مچلکوں کے عوض منظور کر لی۔

” اسلام آباد کی انسداد دہشتگردی کی عدالت میں علی وزیر کی جانب سے تھانہ ترنول میں درج مقدمے میں درخواستِ ضمانت قبل از گرفتاری پر سماعت ہوئی۔ وکیل عطاء اللّٰہ کنڈی نے عدالت کو بتایا کہ 3 سال تک علی وزیر کو گرفتار نہ کرنے کی کوئی وضاحت تفتیشی افسر کے پاس نہیں، علی وزیر کو جب گرفتار کیا تھا تو تھانہ ترنول میں درج مقدمے میں شامل تفتیش کیوں نہیں کیا گیا؟

جج ابوالحسنات ذوالقرنین نے فیصلہ سناتے ہوئے کہا کہ پولیس علی وزیر کو گرفتار کرنے سے متعلق کوئی جواز پیش نہیں کر سکی، علی وزیر کی ضمانت قبل از گرفتاری کی درخواست منظور کی جاتی ہے۔