اسرائیل اور فلسطین کی مزاحمتی تنظیم حماس کے درمیان ہونے والی کشیدگی کے بعد غزہ پر اسرائیلی بمباری کا سلسلہ جاری ہے اور 7 اکتوبر سے اب تک شہید ہونے والے فلسطینیوں کی تعداد 5800 سے تجاوز کر گئی ہے۔

غیرملکی میڈیا رپورٹس کے مطابق اسرائیلی فورسز نے ایک روز میں 182 بچوں سمیت 704 فلسطینیوں کو شہید کر دیا ہے، اسرائیلی فوج پناہ گزینوں کے کیمپوں کو بھی نشانہ بنا رہی ہے۔

اسرائیلی بمباری سے زخمی ہونے والے فلسطینیوں کی تعداد 15 ہزار سے زیادہ ہو چکی ہے اور غزہ میں اس وقت صورت حال انتہائی گھمبیر ہے۔

سیکریٹری جنرل اقوام متحدہ کی جانب سے جنگ بندی کی اپیل کے باوجود اسرائیل کی ہٹ دھرمی برقرار ہے اور دھمکی دی جا رہی ہے کہ کسی بھی وقت فلسطین پر زمینی فوج کے ذریعے حملہ کر دیا جائے گا۔

دوسری جانب حماس نے اسرائیلی فوج کو خبردار کر رکھا ہے کہ اگر زمینی حملہ کیا گیا تو آپ کی فوج کو نیست و نابود کر دیا جائے گا۔

اقوام متحدہ کے سیکرٹری جنرل انتونیو گوتریس کی جانب سے فلسطین کے مظلوم کی حمایت کرنے پر اسرائیل سیخ پا ہو گیا اور ان سے استعفیٰ دینے کا مطالبہ کر دیا ہے۔

غیرملکی میڈیا رپورٹس کے مطابق اسرائیل نے سیکرٹری جنرل اقوام متحدہ کے فلسطین کے حق میں بیان پر احتجاج کیا ہے۔

اسرائیلی وزیر خارجہ نے انتونیو گوتریس سے ملاقات کرنے سے انکار کر دیا ہے جبکہ اقوام متحدہ میں اسرائیلی مندوب نے مطالبہ کیا ہے کہ سیکریٹری جنرل اپنے عہدے سے استعفیٰ دیں۔

واضح رہے کہ سیکرٹری جنرل اقوام متحدہ نے اپنے خطاب میں فلسطین کے عوام کی حمایت کی تھی اور کہا تھا کہ بین الاقوامی انسانی حقوق کی خلاف ورزیاں روکی جائیں۔

اسرائیل اور فلسطین کی مزاحمتی تنظیم حماس کے درمیان کشیدگی کے بعد اسرائیلی فوج کی جانب سے غزہ پر بمباری کا سلسلہ جاری ہے، اور شہادتوں کی تعداد 5 ہزار سے تجاوز کر گئی ہے۔

غیرملکی میڈیا رپورٹس کے مطابق اسرائیلی حملوں میں مزید 436 فلسطینی شہید ہو گئے ہیں جن میں شامل بچوں کی تعداد 182 ہے۔7 اکتوبر سے اب تک 2 ہزار 55 بچے شہید ہو چکے ہیں۔

اسرائیلی فضائیہ نے غزہ کہ الشاتی کیمپ پر بمباری کی ہے جس کے نتیجے میں بچوں اور خواتین سمیت 436 فلسطینی شہید ہوئے۔

اس کے علاوہ اسرائیلی فورسز نے خان یونس میں بمباری کرتے ہوئے 23 افراد کو شہید کر دیا، الفلوجہ میں 17 اور دیر البلاح میں بھی 10 افراد کو شہید کیا گیا ہے۔

اسرائیلی فضائیہ کی جانب سے 3 مساجد پر بھی بمباری کی گئی ہے، حالیہ کشیدگی کے دوران اب تک 31 مساجد شہید ہو چکی ہیں۔

اسرائیل کی بمباری کے باعث غزہ میں صورتحال تشویشناک ہے، دوسری جانب اسرائیل کی ہٹ دھرمی برقرار ہے اور دھمکی دی گئی ہے کہ کسی بھی وقت غزہ پر زمینی حملہ کر دیں گے۔

اسرائیل کی جانب سے نہتے فلسطینیوں پر بمباری کا سلسلہ جاری ہے اور غزہ میں قیامت صغریٰ کا منظر ہے۔ اب تک ہونے والی بمباری میں شہید فلسطینیوں کی تعداد 4700 تک پہنچ گئی ہے۔ جبکہ 14 ہزار سے زیادہ افراد زخمی ہیں۔

غزہ پر اسرائیلی بمباری سے شہید ہونے والوں میں 2 ہزار کے قریب بچے، ایک ہزار سے زیادہ خواتین شامل ہیں جبکہ فرائض کی انجام دہی کے دوران 21 صحافیوں نے بھی جام شہادت نوش کیا ہے۔

اسرائیلی جارحیت کے باعث غزہ میں قیامت صغریٰ کا منظر ہے، علاقے میں غذا کی شدید قلت پیدا ہو گئی ہے، اس کے علاوہ ادویات ناپید ہیں۔ ڈاکٹرز کو ہسپتالوں میں زخمیوں کے آپریشنز کرنے میں مشکلات پیش آ رہی ہیں۔

دوسری جانب اسرائیلی فوج کی غزہ میں داخلے کی پہلی کوشش ناکام ہو گئی ہے اور حماس کے عسکری ونگ نے اسرائیل کے 2 بلڈوزر اور ایک ٹینک تباہ کر دیا ہے۔

اس کے علاوہ مشرق وسطیٰ کی صورتحال کو دیکھتے ہوئے چین نے بھی اپنے 6 بحری جہاز تعینات کر دیئے ہیں جبکہ امریکی بحری بیڑا پہلے سے ہی مشرق وسطیٰ میں موجود ہے۔

اسرائیل اور فلسطین کی مزاحمتی تنظیم حماس کے درمیان کشیدگی کے بعد غزہ پر اسرائیلی فوج کی بمباری کا سلسلہ بدستور جاری ہے۔

اسرائیل کی جانب سے غزہ پر بمباری کے نتیجے میں فلسطین کی معروف شاعرہ، مصنفہ و ناول نگار حباابوندا بھی شہید ہو گئیں۔

غیرملکی میڈیا رپورٹس کے مطابق فلسطینی شاعرہ نے اپنی شہادت سے ایک روز قبل سوشل میڈیا پر لکھا تھا ”اگر ہم مرجائیں تو جان لیں کہ ہم ثابت قدم ہیں اور ہم سچے ہیں‘‘۔

حبا کو اپنے ناول ’’آکسیجن ازناٹ فاردی ڈیڈ‘‘سے شہرت ملی تھی، انہوں نے سوشل میڈیا پر جاری کی گئی پوسٹ میں یہ بھی لکھا تھا کہ ہم کس جہنم میں رہ رہے ہیں اور ایسا کب تک چلتا رہے گا۔

اسرائیل اور فلسطین کے جاری تنازعے میں دن بدن شدت آ رہی ہے، چینی وزارت دفاع نے بھی کشیدگی میں اضافے کو دیکھتے ہوئے مشرق وسطیٰ میں 6 بحری جنگی جہاز تعینات کر دیے ہیں۔

چینی اخبار کی رپورٹ کے مطابق عمان کی بحریہ کے ساتھ مشرکہ مشقوں کے اختتام پر چینی ٹاسک فورس نے نامعلوم مقام کا رخ کیا ہے۔

برطانوی میڈیا کا کہنا ہے کہ خطے میں کشیدگی میں اضافہ دیکھنے میں آ رہا ہے اور چین کی جانب سے 6 بحری جنگی جہاز تعینات کرنا انتہائی غیر معمولی پیشرفت ہے۔

واضح رہے کہ چین نے اسرائیل اور فلسطین کے تنازع کا حل آزاد فلسطینی ریاست کا قیام قرار دیا ہے۔ چینی صدر نے گزشتہ ہفتے کہا تھا کہ اسرائیل اور فلسطین کے درمیان جنگ بندی ضروری ہے۔

ادھر امریکا اس سے پہلے ہی اپنا جنگی بحری جہاز مشرق وسطیٰ میں تعینات کر چکا ہے جبکہ امریکی صدر جوبائیڈن کھل کر اسرائیل کی حمایت کر رہے ہیں۔

مصر کی سربراہی میں ہونے والے امن اجلاس میں سعودی عرب سمیت دیگر عرب ممالک نے غزہ پر اسرائیلی فوج کی بمباری کی مذمت کی ہے اور لوگوں کو جبری طور پر بے دخل کرنے کی کوششوں کو مسترد کر دیا ہے۔

قاہرہ میں ہونے والے امن اجلاس میں فلسطین کے صدر محمود عباس نے کہا کہ ہمیں کوئی بھی اپنی زمین سے بے دخل نہیں کر سکتا، نہ ہی ہم اپنی سرزمین چھوڑیں گے۔

سعودی وزیر خارجہ شہزادہ فیصل بن فرحان نے کہا کہ فلسطین میں فوری جنگ بندی ناگزیر ہے، غزہ میں بسنے والوں کو بے گھر کرنے کی کوششیں کسی صورت قابل قبول نہیں۔ انہوں نے مطالبہ کیا کہ عالمی برادری اسرائیل کو پابند بنائے کہ وہ بین الاقوامی قوانین کا احترام کرے۔

اردن کے شاہ عبداللہ نے کہاکہ فلسطینیوں کو جبری طور پر غزہ سے نکالنا جنگی جرم ہے۔

اجلاس کے میزبان مصر کے صدر عبدالفتاح السیسی نے کہا کہ مسئلہ فلسطین کا مستقل حل ناگزیر ہے، آزاد فلسطینی ریاست کے قیام سے ہی مسئلہ حل ہو گا، امید ہے شرکا اس سلسلے میں اقدامات کریں گے۔

اجلاس میں عرب ممالک کے علاوہ برطانیہ، فرانس اور جرمنی کے وزرائے خارجہ نے بھی شرکت کی اور غزہ کی صورت حال پر اپنا موقف سامنے رکھا۔

فلسطین کی مزاحمتی تنظیم حماس نے اسرائیل پر حملے کے دوران یرغمال بنائے گئے افراد میں سے امریکی ماں بیٹی کو رہا کر دیا ہے۔

غیرملکی میڈیا کے مطابق حماس کے ترجمان نے بتایا ہے کہ قطری حکومت کے ساتھ ایک معاہدے کے تحت امریکی ماں بیٹی کو رہا کیا گیا ہے۔

امریکی خاتون جوڈتھ تائیرانان اور ان کی 17 سالہ بیٹی نتالی کو جمعہ کو غزہ کی پٹی کی سرحد پر اسرائیلی فورسز کے حوالے کیا گیا تھا، یہ وہ پہلی قیدی ہیں جن کی رہائی کی حماس کی جانب سے تصدیق کی گئی ہے۔

واضح رہے کہ اسرائیل اور فلسطین کے درمیان کشیدگی کے بعد صورت حال سنگین ہے اور اسرائیل کی جانب سے غزہ پر بمباری کی جا رہی ہے۔

اسرائیل کی بمباری سے اب تک شہید ہونے والے فلسطینیوں کی تعداد 4 ہزار سے تجاوز کر گئی جبکہ حماس کے حملے میں مرنے والے اسرائیلیوں کی تعداد 2 ہزار ہے۔