الیکشن کمیشن نے صدر مملکت عارف علوی کا بیان مسترد کردیا۔
ترجمان الیکشن کمیشن نے ڈاکٹر عارف علوی کے انٹرویو پر ردعمل دیتے ہوئے کہا ہے کہ صدر مملکت کے انٹرویو سے یہ تاثر گیا ہے کہ شاید الیکشن ملتوی ہو جائیں گے جب کہ ایسا نہیں ہے۔
ترجمان نے کہا کہ الیکشن کمیشن پہلے ہی پوزیش واضح کر چکا ہے حلقہ بندیوں کا پہلا مرحلہ مکمل ہوچکا ہے، اعتراضات دائر کرنے کا دوسرا مرحلہ 27 اکتوبر 2023ء کو مکمل ہو جائے گا۔
الیکشن کمیشن کا کہنا ہے کہ ابتدائی حلقہ بندی پر اعتراضات کی سماعت 30/31 اکتوبر سے شروع ہوگی، 30نومبر 2023ء کو الیکشن کمیشن کی جانب سے حلقہ بندیوں کی حتمی فہرست شائع ہو جائے گی ۔حلقہ بندی کی حتمی اشاعت کے بعد انتخابات کے شیڈول کا اعلان کر دیا جائے گا جس میں کسی قسم کا ابہام نہیں۔

الیکشن کمیشن آف پاکستان نے غیرملکی میڈیا اور مبصرین کو عام انتخابات کے جائزے کے لیے مدعو کر لیا ہے۔

الیکشن کمیشن سے جاری ایک بیان کے مطابق غیرملکی میڈیا اور مبصرین کی رجسٹریشن اوپن ڈورپالیسی کے تحت ہو گی، ایسے کسی شخص کی بطور مبصر رجسٹریشن نہیں کی جائے گی جس کی کسی سیاسی جماعت کے سے وابستگی ہو۔

غیرملکی صحافیوں اور مبصرین کے لیے لازم ہو گا کہ وہ اپنے تمام کوائف اور دستاویزات جمع کرائیں۔ رجسٹریشن کے خواہشمند مبصرین کو ادارے کا اتھارٹی لیٹر بھی فراہم کرنا ہو گا۔

اس کے علاوہ سیکیورٹی کلیئرنس کو بھی لازمی قرار دیا گیا ہے۔

پاکستان میں عام انتخابات کی تیاریاں جاری ہیں اور الیکشن کے انعقاد کے لئے الیکشن کمیشن کو تقریباً 10 لاکھ افراد کی خدمات درکار ہوں گی ۔
الیکشن کمیشن کے ابتدائی تخمینوں کے مطابق پولنگ عملے کے تقریبا سات لاکھ ارکان ہوں گے، اور سیکیورٹی اہلکاروں سمیت یہ تعداد تقریباً 10 لاکھ تک پہنچ جائے گی۔
انتخابی شیڈول کے اعلان ہونے کے بعد حتمی تعداد کی تصدیق ہو جائے گی۔
کمیشن نے پریذائیڈنگ افسران، اسسٹنٹ پریزائیڈنگ افسران اور پولنگ عملے کی فہرست مرتب کر لی ہے۔
الیکشن کمیشن کے مطابق ملک بھر میں کل 10,7361 افسران کو تعینات کیا جائے گا۔
پنجاب میں تقریباً 54,706 پریذائیڈنگ افسران، 310,968 اسسٹنٹ پریذائیڈنگ افسران اور 160,445 پولنگ سٹاف کو الیکشن ڈیوٹیاں سونپی جائیں گی۔
صوبے میں مجموعی طور پر 526,123 افسران کو تعینات کیا جائے گا۔
سندھ میں 20,315 پریذائیڈنگ افسران، 162,523 اسسٹنٹ پریذائیڈنگ افسران اور 81,262 پولنگ عملہ تعینات کیا جائے گا جس سے صوبے میں افسران کی کل تعداد 264,100 ہو جائے گی۔
خیبرپختونخوا میں 16,525 پریذائیڈنگ افسران، 100,085 اسسٹنٹ پریذائیڈنگ افسران اور 50,045 پولنگ عملہ تعینات کیا جائے گا،جس سے مجموعی طور پر 166,655 افسران ہوں گے۔
بلوچستان میں مجموعی طور پر 50,491 افسران کو نامزد کیا جائے گا، جن میں 5,266 پریذائیڈنگ افسران، 30,150 اسسٹنٹ پریذائیڈنگ افسران اور 15,075 پولنگ عملہ شامل ہیں۔
الیکشن کی حتمی تاریخ کا ابھی تک اعلان نہیں کیا گیا ہے لیکن ستمبر کے مہینے میں الیکشن کمیشن نے کہا تھا کہ عام انتخابات جنوری 2024 کے آخری ہفتے میں کرائے جائیں گے۔