پاکستان کرکٹ ٹیم بھارت کے شہر حیدرآباد دکن سے احمد آباد پہنچ گئی ہے، قومی ٹیم کا احمد آباد پہنچنے پر فقیدالمثال استقبال کیا گیا ہے۔

قومی کرکٹ ٹیم کے کھلاڑیوں کو شائقین کرکٹ کی جانب سے روایتی شال پیش کر کے محبت کا اظہار کیا گیا۔

14 اکتوبر کو بھارتی شہر احمدآباد کے نریندرا مودی اسٹیڈیم میں روایتی حریف پاکستان اور بھارت کی ٹیمیں آمنے سامنے ہوں گی۔

قومی کرکٹ بورڈ کی مینجمنٹ کمیٹی کے چیئرمین ذکا اشرف بھی آج بھارت روانہ ہوں گے جہاں وہ پاکستان اور بھارت کے درمیان ہونے والا میچ دیکھیں گے اور اپنی ٹیم کی حوصلہ افزائی کریں گے۔

ذکا اشرف نے کہا ہے کہ اپنی ٹیم کو سپورٹ کرنا بہت ضروری ہے، امید ہے شاہین اپنی بہترین کارکردگی سے ہمیں فخر کرنے کا موقع فراہم کریں گے۔

انٹرنیشنل کرکٹ کونسل (آئی سی سی) ورلڈ کپ کے لیے قومی ٹیم کے ڈائریکٹر مکی آرتھر نے بھارت کے شہر حیدرآباد دکن میں پاکستان ٹیم کو جوائن کر لیا ہے۔

قومی کرکٹ ٹیم کے ترجمان نے بتایا ہے کہ مکی آرتھر انگلینڈ سے کاؤنٹی کرکٹ میں اپنی مصروفیات ختم ہونے پر بھارت پہنچ گئے اور ٹیم کو جوائن کر لیا ہے۔

ترجمان کے مطابق اب مکی آرتھر ورلڈ کپ کے دوران مکمل ٹیم کے ساتھ موجود رہیں گے۔

اس سے قبل ایشیا کپ کے دوران مکی آرتھر چند میچوں میں ہی ٹیم کے ساتھ موجود رہے۔

یاد رہے کہ قومی ٹیم اس وقت حیدرآباد دکن میں موجود ہے جہاں آج پریکٹس سیشن ہو گا۔ بابر الیون کا دوسرا وارم اپ میچ 3 اکتوبر کو آسٹریلیا کے ساتھ ہو گا۔ جبکہ ٹیم ورلڈ کا پہلا میچ نیدر لینڈ کے خلاف 6 اکتوبر کو کھیلے گی۔

کرکٹ کے عالمی مقابلے سے قبل قومی کرکٹ ٹیم کے نائب کپتان شاداب خان کو بڑا صدمہ پہنچا ہے اور ان کی پھوپھو انتقال کر گئی ہیں۔

قومی کرکٹ ٹیم کے نائب کپتان شاداب خان نے سوشل میڈیا پر جاری اپنے ایک بیان میں کہا ہے کہ میری پھوپھو انتقال کر گئی ہیں جس کی خبر مجھ تک پہنچی ہے۔ شاداب خان نے اپیل کی کہ ان کی مرحومہ پھوپھو کی مغفرت کے لیے دعا کی جائے۔

یاد رہے کہ قومی کرکٹ ٹیم اس وقت بھارت میں موجود ہے جہاں گزشتہ روز نیوزی لینڈ کے خلاف وارم اپ میچ بھی کھیلا ہے۔

قومی کرکٹ ٹیم ورلڈ کپ کا پہلا میچ نیدر لینڈ کے خلاف 6 اکتوبر کو کھیلے گی، اس سے قبل 3 اکتوبر کو آسٹریلیا کے خلاف وارم اپ میچ بھی شیڈول ہے۔