ورلڈ کپ میں نیدر لینڈ سے اپ سیٹ شکست کے باوجود پوائنٹس ٹیبل پر جنوبی افریقہ کی پوزیشن کو فرق نہیں پڑا التبہ رن ریٹ میں تنزلی ہوئی ہے ۔
ورلڈ کپ کے 15 ویں میچ کے اختتام پرایونٹ کی تمام ٹیموں نے اپنے تین تین میچزمکمل کرلئے ہیں بھارت تینوں میچز میں فتح کے ساتھ پوائنٹس ٹیبل پرسرفہرست ہے اور نیوزی لینڈ کی ٹیم بھی تینوں میچز جیت چکی ہے لیکن کم رن ریٹ کی وجہ وہ پوائنٹس ٹیبل پر دوسرے نمبر پر ہے۔
جنوبی افریقہ کی ٹیم نیدر لینڈ سے اپ سیٹ شکست کے باوجود تیسرے نمبر پر ہے البتہ اس کا نیٹ رن ریٹ1.385 ہوگیا ہے ۔ پوائنٹس ٹیبل پر چوتھی پوزیشن پاکستان کی ہے ۔

ایونٹ میں شریک تمام ٹیموں نے فتح کا مزہ چکھ لیا ہے تاہم سری لنکا واحد ٹیم ہے جسے اب تک ایک بھی فتح حاصل نہیں ہوسکی اور وہ تینوں میچز میں شکست کے ساتھ پوائنٹس ٹیبل میں سب سے آخر پر ہے۔

سری لنکا کو 5 وکٹوں سے شکست کے بعد آسٹریلیا کو ورلڈ کپ میں پہلی کامیابی مل گئی۔

لکھنئو اسٹیڈیم میں کھیلے گئے ورلڈ کپ کے 14 ویں میچ میں سری لنکا نے پہلے کھیلتے ہوئے 209 رنز بنائے ،  آسٹریلیا نے پانچ وکٹوں ۔کے نقصان پر 35.2 اوورز میں ہدف پورا کر لیا۔

سری لنکن اوپنرز کی جانب سے 125 رنز کا شاندار آغاز فراہم کرنے کے باوجود سری لنکا کی پوری ٹیم 43.3 اوورز میں 209 رنز پر آؤٹ ہوگئی۔ سری لنکا کے 8 بلے باز ڈبل فگرز میں بھی داخل نہیں ہوسکے۔

ہدف کے تعاقب میں آسٹریلیا کا آغاز مایوس کن رہا اور چوتھے اوور میں ہی 24 رنز کے مجموعی اسکور پر دو وکٹیں گر گئیں،چوتھے اوور میں 24 رنز کے مجموعی اسکور پر دلشان مدوشناکا نے آسٹریلیا کے دو بلے بازوں کو  پویلین کی راہ دکھا دی۔ ڈیوڈ وارنر 11 اور اسٹیون اسمتھ صفر پر آؤٹ ہوئے۔

پندرہویں اوور میں 81 کے مجموعی اسکور پر مچل مارش 52 رنز بناکر رن آؤٹ ہوگئے۔ 29 ویں اوور میں 158 کے مجموعی اسکور پر مارنوس لبوشین 40 رنز بنا کر مادھو شناکا کی گیند پر کیچ آؤٹ ہو گئے۔ 34 ویں اوور میں جوش انگلس 58 رنز بناکر دونیتھ ویلالگے کی گیند پر آؤٹ ہوئے، چھٹی وکٹ کی پارٹنر شپ نے آسٹریلیا کو کامیابی دلوا دی۔

آسٹریلیا کے ایڈم زمپا نے 4، مچل اسٹارک اور پیٹ کمنز نے 2، 2 جبکہ  گلین میکسویل نے ایک وکٹ حاصل کی۔

پاکستان کے سابق کرکٹر معین خان کے فرزند کرکٹر اعظم خان کی خوش خوراکی کسی سے ڈھکی چھپی نہیں، اب سابق کپتان شعیب ملک نے ان کے حوالے سے ایک دلچسپ کہانی سنا دی ہے۔

کرکٹ ورلڈ کے دوران شعیب ملک ایک ٹی وی شو میں وسیم اکرم، مصباح الحق اور معین خان کے ہمراہ شریک ہوئے، اس دوران شعیب ملک نے معین خان کے سامنے ان کے بیٹے کی کھانے سے رغبت کی دلچسپ کہانی سنا دی۔

ساتھ ہی سابق کرکٹرز نے معین خان کو پابند کیا کہ وہ اس کے بعد اعظم خان کو کچھ نہیں کہیں گے۔

شعیب ملک نے کہا کہ ایک مرتبہ رمضان کے دنوں دبئی والے گھر موجود تھا تو اعظم خان کی کال آ گئی کہ میں بھی دبئی آیا ہوں تو میں نے انہیں اپنے گھر بلا لیا۔

شعیب ملک کہتے ہیں کہ انہوں نے اعظم سے پوچھا کہ سحری میں کیا پسند کریں گے تو انہوں نے بتایا کہ جو آپ اپنے لیے بنوائیں وہی ٹھیک ہے۔

سابق کپتان نے کہا کہ میں نے اعظم خان کے لیے 4 سے 5 پراٹھے اور 6 انڈوں کا آملیٹ بنوایا، جب سحری کرنے بیٹھے تو اعظم خان نے آملیٹ 3 منٹ کے اندر ختم کر دیا۔

شعیب ملک کے مطابق ایک بار پھر 6 انڈوں کا آملیٹ بنوایا مگر وہ بھی اعظم خان نے ختم کر دیا جس کے بعد چائے کے ساتھ 2 پراٹھے کھائے۔

اس گفتگو پر مصباح الحق نے ہنستے ہوئے بات کو آگے بڑھایا کہ پاور ہٹنگ تو پھر ایسے ہی آتی ہے۔

پاکستان کرکٹ ٹیم بھارت کے شہر احمدآباد سے بنگلورو پہنچ گئی ہے۔

قومی ٹیم کپتان بابراعظم کی قیادت میں خصوصی طیارے کے ذریعے بنگلورو پہنچی ہے۔

قومی کرکٹ ٹیم اپنا اگلا میچ 20 اکتوبر کو آسٹریلیا کے خلاف کھیلے گی جو بھارتی شہر بنگلورو میں ہو گا۔

پاکستان کرکٹ ٹیم نے ورلڈ کپ میں اب تک 3 میچ کھیلے ہیں جن میں سے 2 میں فتح حاصل کی ہے جبکہ ایک میچ میں بھارت سے شکست کا سامنا کرنا پڑا ہے۔

واضح رہے کہ 14 اکتوبر کو احمدآباد میں بھارت کے خلاف ہونے والے میچ میں قومی کرکٹ ٹیم کو بھارت سے شکست کا سامنا کرنا پڑا تھا۔

کرکٹ کے عالمی مقابلے کا انتہائی اہم میچ پاک بھارت ٹاکرا کل ہونے جا رہا ہے۔

قومی کرکٹ ٹیم کے وکٹ کیپر بیٹر محمد رضوان نے بھارتی بولرز کا سامنا کرنے کے لیے نئی تکنیک اپنا لی ہے جس کے بھارتی میڈیا پر چرچے ہیں۔

بھارتی میڈیا کا کہنا ہے کہ محمد رضوان نے پریکٹس سیشن کے دوران نیٹ میں ایک گھنٹے تک کلدیپ یادیو کی طرح لیفٹ آرم اسپنر کا سامنا کیا۔

بھارتی میڈیا رپورٹ کر رہا ہے کہ پاکستانی وکٹ کیپر بیٹر محمد رضوان نے کنڈیشنز کو سامنے رکھتے ہوئے پریکٹس کی ہے اور اس دوران ٹیم ڈائریکٹر مکی آرتھر نے کھلاڑیوں کو بھارت کے خلاف میچ کے حوالے سے حکمت عملی بتائی۔

قومی ٹیم نے کل بھارت کا سامنا کرنے کے لیے بھرپور پریکٹس کی ہے، پاک بھارت ٹاکرا کل 14 اکتوبر کو بھارتی شہر احمدآباد کے نریندرا مودی اسٹیڈیم میں ہو گا۔

کرکٹ ورلڈ کپ 2023 کے اہم میچ پاک بھارت ٹاکرے کے دوران بارش کی پیشگوئی کر دی گئی۔

میڈیا رپورٹس کے مطابق پاکستان اور بھارت کے درمیان 14 اکتوبر کو ہونے والے میچ کے دوران بارش کا امکان ہے تاہم اس سے میچ میں خلل نہیں پڑے گا چونکہ بارش کا امکان صرف 35 فیصد ہے۔

پاکستان اور بھارت کے درمیان کل ہونے والے میچ کے حوالے سے تیاریاں مکمل ہیں اور سیکیورٹی کے سخت انتظامات کیے گئے ہیں۔

ورلڈ کپ کے اہم میچ پاک بھارت ٹاکرے کے دوران احمدآباد کے نریندرا مودی اسٹیڈیم میں ایک لاکھ 30 ہزار سے زیادہ تماشائیوں کی آمد کی توقع کی جا رہی ہے۔

دوسری جانب ہوٹلوں پر کمروں کی ایڈوانس بکنگ ہو چکی ہے اور ٹکٹوں کی بلیک میں فروخت کا سلسلہ بھی جاری ہے۔ شائقین کرکٹ کو پاکستان اور بھارت کے درمیان میچ کا بے صبری سے انتظار ہے۔

پاکستان کرکٹ بورڈ (پی سی بی) کی مینجمنٹ کمیٹی کے چیئرمین ذکا اشرف کرکٹ ورلڈ کپ کا اہم میچ پاک بھارت ٹاکرا دیکھنے کے لیے انڈیا پہنچ گئے ہیں۔

ذکا اشرف قومی ٹیم کا حوصلہ بڑھانے کے لیے بھارت پہنچے ہیں، ذکا اشرف 14 اکتوبر کو بھارتی شہر احمد آباد کے نریندرا مودی اسٹیدیم میں پاکستان اور بھارت کے درمیان ہونے والا اہم میچ دیکھیں گے۔

اس کے علاوہ ذکا اشرف اپنے دورے کے دوران سیکریٹری بی سی سی آئی جے شاہ اور دیگر حکام سے بھی ملاقاتیں کریں گے۔

چیئرمین پی سی بی مینجمنٹ کمیٹی ذکا اشرف نے بھارت روانگی سے قبل اپنی گفتگو میں کہا کہ پاکستانی ٹیم کی حوصلہ افزائی کرنے کے لیے بھارت جا رہا ہوں، انہوں نے قومی ٹیم کو پیغام دیا کہ بھارت کے خلاف بے خوف ہو کر کھیلیں۔

ذکا اشرف نے کہا کہ شائقین کرکٹ اور صحافیوں کو ویزے نہ ملنے پر میں نے بھارت جانے کا ارادہ ترک کر دیا تھا مگر اب معلوم ہوا ہے کہ پاکستانی صحافیوں کو ویزے حاصل کرنے کے لیے پاسپورٹ جمع کرانے کا کہا گیا ہے۔