ممبئی (این این آئی) بالی ووڈ کے سپرسٹار سلمان خان نوے کی دہائی سے لیکر اب تک کئی فلموں میں بہترین اداکاری کرچکے ہیں،انکے مداحوں کو انکی ہر نئی آنے والی فلم کا بے صبری سے انتظار ہوتا ہے۔

سلمان خان نے اپنے انسٹاگرام اکاؤنٹ پر ”ٹائیگر 3” کا نیا پوسٹر جاری کیا۔ اس تصویر میں سلمان خان ہاتھ میں بندوق لیے بیٹھے ہیں۔جس میں انہوں نے جیکٹ، کالی پینٹ، اور گلے میں سفید اور سیاہ اسکارف پہن رکھا ہے۔

فلم میں وہ اویناش سنگھ راٹھور عرف ٹائیگر کا کردار ادا کریں گے۔بالی وڈ کے دبنگ اداکار سلمان خان اپنی نئے فلم ‘ٹائیگر3’ کی کہانی میں بھی پاکستان آئیں گے۔

ذرائع کے مطابق نئی ایکشن تھرلر فلم میں سلمان خان اور عمران ہاشمی پاکستانی اور انڈین خفیہ ایجنٹوں کا کردار ادا کریں گے اورشائقین کو ایکشن سے بھرپور مناظر دیکھنے کو ملیں گے۔

منیش شرما کی ہدایت کاری میں بننے والی فلم 10 نومبر کو ریلیز کیلئے پیش کیا جائے گی۔فلم میں شاہ رخ خان بھی ایک کومیو جھلک دیں گے۔

لاہور(این این آئی) پاکستانی اور بھارتی فنکاروں پر مشتمل پنجابی فلم ‘اینی ہاؤ مٹی پاؤ’ 6 اکتوبر کو پوری دنیا میں ریلیز کی جائے گی۔

فلم کے حوالے سے لاہور میں پریس کانفرنس کا اہتمام کیا گیا جس میں اکرم اداس، وکی کوڈو، افتخار ٹھاکر، قیصر پیا، اظہر بٹ، شیخ عابد رشید، روبی انعم اور شاہد خان نے شرکت کی۔

اس موقع پر پاکستانی اداکار اکرم اداس کا کہنا تھا کہ یہ سب کے لئے خوشی کا مقام ہے کہ ہمارے آرٹسٹ ہمسایہ ملک کی فلموں میں کام کرکے پاکستان کا نام روشن کررہے ہیں۔

افتخار ٹھاکر نے کہا کہ ہمارے ہاں پنجابی فلمیں بن تو رہی ہیں لیکن وہ انٹرنیشنل لیول کی نہیں ہیں اور ہمارے فنکاروں نے ہمسایہ ملک کی فلموں میں کام کرکے ایک معیار بنایا ہے۔

انہوں نے مزید کہا کہ فلم ‘اینی ہاؤ مٹی پاؤ’ کا اصل فلسفہ یہ ہے کہ بے لوث ہوجاؤ، آپ کو کبھی نقصان نہیں ہوگا، فلم میں پاکستان سے اکرم اداس اور وکی کوڈو نے کام کیا ہے، ہم سب یہاں ان کی تحسین کے لئے آئے ہیں۔وکی کوڈو نے بتایا کہ فلم ‘اینی ہاؤ مٹی پاؤ’ میں کام کرکے بڑی خوشی ہوئی اور اکرم اداس نے انہیں فلم میں چانس دیا ہے۔

لاہور( این این آئی) سینیئر کامیڈین اداکار افتخار ٹھاکر نے کہا ہے کہ 1979 سے 1982 تک پاکستان پوسٹ گارڈ میں ملازمت کی ،اس کے بعد اسلام آباد پولیس میں نوکری کی جسے بعد میں چھوڑ دیا۔

ایک انٹرویو میں انہوں نے کہاکہ میں نے زندگی میں ایک چیز سیکھی ہے انسان اللہ کی بہترین مخلوق ہے اور انسان کو تمام انسانوں سے پیار کرنا چاہیے، اللہ کی خوبصورت اور مکمل تخلیق چاہے وہ کسی بھی شکل یا حالت میں ہوں وہ کامل ہو سکتے ہیں وہ نامکمل ہو سکتے ہیں وہ نارمل ہو سکتے ہیں یا ان میں عیب ہو سکتے ہیں لیکن دوسرے انسانوں کو ان سے پیار ہونا چاہیے۔

انہوں نے کہا کہ میں نے کئی بھارتی پنجابی فلموں میں اداکاری کی جس میں میری اداکاری کو پسند کیا گیا۔ عزت اور ذلت خدا کے ہاتھ میں ہے، اگر خدا کسی کو عزت دینا چاہے کوئی اسے کم نہیں کر سکتا۔

لاہور( این این آئی) سینیئر کامیڈین اداکار آغا ماجد نے کہا ہے کہ امان اللہ خان جیسا کامیڈین دوبارہ پیدا نہیں ہوسکتا، میں نے عابد خان مرحوم کے فن سے متاثر ہو کر کام شروع کیا تھا اور اور انہی کی طرز پر کام کرتا ہوں۔

ایک انٹرویو میں آغا ماجد نے کہا کہ قدرتی طور پر میری ان سے مشابہت بھی ہے۔ کامیابی کبھی بھی پلیٹ میں رکھ کر نہیں ملتی بلکہ اس کے لیے بڑی جدوجہد کرنا پڑتی ہے، جتنے بھی کامیاب لوگ ہیں ان سے پوچھ لیں وہ اپنی کامیابی کا راز مسلسل محنت ہی بتائیں گے۔

انہوں نے کہا کہ جو شخص تسلسل کے ساتھ محنت کا راستہ نہیں چھوڑتا کامیابی بالآخر اس کے قدم چومتی ہے ۔