اسرائیل کی جانب سے غزہ کی سول آبادی کو نشانہ بنانے کا سلسلہ جاری ہے، اب تک کی کارروائیوں میں شہید فلسطینیوں کی تعداد 2 ہزار 300 تک پہنچ گئی  ہے۔

اسرائیل کے طیاروں نے غزہ سے نقل مکانی کرنے والے 3 قافلوں پر بمباری کی ہے جس کے نتیجے میں 70 فلسطینی شہید ہو گئے جبکہ سینکڑوں زخمی ہو گئے ہیں۔

غزہ کے شہریوں سے اظہاریکجہتی کے لیے مغربی کنارے پر کیے گئے مظاہرے پر بھی اسرائیلی فورسز نے فائرنگ کی ہے جس سے 16 فلسطینی شہید ہو گئے ہیں۔

دوسری جانب غیرملکی میڈیا کا کہنا ہے کہ اسرائیل کی جانب سے غزہ پر بمباری کے بعد یرغمال بنائے گئے اسرائیلیوں کی لاشیں بھی ملنے لگی ہیں۔

میڈیا رپورٹس کے مطابق اسرائیلی فوج نے لبنانی سرحد پر فائرنگ کی ہے جس کے نتیجے میں ایک صحافی بھی جان سے ہاتھ دھو بیٹھا جب کہ 6 زخمی ہو گئے۔

دوسری جانب لبنان کی مزاحمتی تنظیم حزب اللہ نے اسرائیلی فوج کے 4 ٹھکانوں پر دھاوا بولا ہے۔ اب تک ہلاک ہونے والے اسرائیلیوں کی تعداد 1300 ہے۔

اسرائیل اور فلسطین کے درمیان جاری جارحیت میں حماس کی کارروائیوں کے دوران اب تک ہلاک ہونے والے اسرائیلیوں کی تعداد 1400 سے تجاوز کر گئی ہے جبکہ 3 ہزار سے زیادہ اسرائیلی زخمی ہو چکے ہیں۔

حماس کی جانب سے اسرائیلی بمباری کا جواب دیتے ہوئے تل ابیب، عسقلان، اشدود اور سیدروت پر راکٹ برسائے گئے ہیں۔

حماس کی جانب سے کیے گئے حملوں میں 22 امریکی شہریوں اور اس کے علاوہ 188 اسرائیلی فوجیوں کے مارے جانے کی تصدیق کی گئی ہے۔

دوسری جانب حزب اللہ کی جانب سے اسرائیلی فوجیوں کو نشانہ بنانے کی ویڈیو بھی جاری کر دی گئی ہے۔

اسرائیلی میڈیا اعتراف کر رہا ہے کہ حماس کے حملوں میں تل ابیب سمیت دیگر شہروں میں کئی اہداف کو نقصان پہنچا ہے۔