بالی ووڈ کے معروف اداکار سنی دیول کی فلم ’غدر 2‘ نے شاندار کامیابی حاصل کی ہے اور انڈین باکس آفس پر 525 کروڑ کا بزنس کر کے پہلے نمبر پر براجمان ہو گئی ہے۔

بھارتی میڈیا کا کہنا ہے کہ فلم کی کامیابی کے بعد سنی دیول کو متعدد پراجیکٹس کی آفرز آ رہی ہیں۔ اور انہوں نے حال ہی میں اپنی ہٹ فلم ’بارڈر‘ کے سیکوئیل کیلئے معاہدہ کیا ہے۔

بھارتی میڈیا کا کہنا ہے کہ سنی دیول نے فلم میں کام کرنے کے لیے 50 کروڑ میں ڈیل فائنل کی ہے۔

فلم کی کامیابی کی صورت میں اداکار کو پروڈیوسر کی کمائی سے بھی حصہ دیا جائے گا، فلم میکرز اس حوالے سے پُرامید ہیں ہیں کہ سنی دیول کی موجودگی فلم کو چارچاند لگا دے گی۔

’بارڈر2‘ کی شوٹنگ اگلے برس کے دوسرے نصف میں شروع کی جائے گی اور اس میں سنی دیول کے ساتھ ایوش مان کھرانا، ایمی ورک اور اہان شیٹی بھی ہوں گے۔

بھارتی میڈیا کے مطابق فلم کے ڈائریکٹر کا نام ابھی تک صیغہ راز میں رکھا گیا ہے۔

ممبئی (این این آئی) بالی ووڈ کی معروف اداکارہ زرین خان کے خلاف دھوکا دہی کے الزام میں جاری ہونے والا وارنٹ گرفتاری منسوخ کردیا گیا۔

اس حوالے سے معلوم ہوا ہے کہ 2018 میں دھوکا دہی کے الزام میں ان کے خلاف کیس داخل کیا گیا تھا، تاہم کولکتہ ہائیکورٹ نے ان کی گرفتاری کا وارنٹ منسوخ کرنے کا حکم دیا۔

زرین خان کا کہنا تھا کہ وہ اس معاملے میں ملوث پولیس افسر کے خلاف قانونی چارہ جوئی کریں گی۔

بھارتی میڈیا کے مطابق زرین خان نے نہ تو ضمانت کی درخواست دائر کی اور نہ ہی عدالت کے سامنے پیش ہوئیں، ان کی بار بار غیر حاضری پر گرفتاری کا ورانٹ جاری کیا گیا۔

دوسری جانب زرین کے وکیل کا کہنا ہے کہ اداکارہ نے کسی کو دھوکا نہیں دیا، دراصل یہ بات ہی غلط فہمی کا نتیجہ ہے۔

ممبئی (این این آئی) بالی ووڈ کے سپرسٹار سلمان خان نوے کی دہائی سے لیکر اب تک کئی فلموں میں بہترین اداکاری کرچکے ہیں،انکے مداحوں کو انکی ہر نئی آنے والی فلم کا بے صبری سے انتظار ہوتا ہے۔

سلمان خان نے اپنے انسٹاگرام اکاؤنٹ پر ”ٹائیگر 3” کا نیا پوسٹر جاری کیا۔ اس تصویر میں سلمان خان ہاتھ میں بندوق لیے بیٹھے ہیں۔جس میں انہوں نے جیکٹ، کالی پینٹ، اور گلے میں سفید اور سیاہ اسکارف پہن رکھا ہے۔

فلم میں وہ اویناش سنگھ راٹھور عرف ٹائیگر کا کردار ادا کریں گے۔بالی وڈ کے دبنگ اداکار سلمان خان اپنی نئے فلم ‘ٹائیگر3’ کی کہانی میں بھی پاکستان آئیں گے۔

ذرائع کے مطابق نئی ایکشن تھرلر فلم میں سلمان خان اور عمران ہاشمی پاکستانی اور انڈین خفیہ ایجنٹوں کا کردار ادا کریں گے اورشائقین کو ایکشن سے بھرپور مناظر دیکھنے کو ملیں گے۔

منیش شرما کی ہدایت کاری میں بننے والی فلم 10 نومبر کو ریلیز کیلئے پیش کیا جائے گی۔فلم میں شاہ رخ خان بھی ایک کومیو جھلک دیں گے۔

ممبئی (این این آئی) بالی ووڈ فلم کے مشہور گانے تجھے یاد نہ میری آئی کا ریمیک بنانے کا اعلان کردیا گیا ہے۔

بھارتی میڈیا کے مطابق مقبول زمانہ فلم ‘کچھ کچھ ہوتا ہے’ کے گانے ‘تجھے یاد نہ میری آئی’ کے گانے کا ریمیک گلوکار بی پراک بنائیں گے۔ فلم کچھ کچھ ہوتا ہے کو رواں ماہ16 اکتوبر 25 سال مکمل ہوجائیں گے اس فلم میں بالی ووڈ کنگ شاہ رخ خان اور کاجول نے مرکزی کردار ادا کیا تھا۔

انسٹاگرام پر ایک پوسٹ میں گلوکار بی پراک کا کہنا تھا کہ اگر آپ پورے دل سے کوئی خواب دیکھتے ہیں تو خواب ظاہر ہونا شروع ہو جاتا ہے اور وہ سچ ہو جاتا ہے۔

ان کا کہنا تھا کہ مجھے یہ اعلان کرتے ہوئے بہت خوشی ہوہی ہے کہ مجھے شاہ رخ خان، کاجول اور رانی مکھرجی کے لیے ایک گانا گانے کا اعزاز ملا ہے مجھے امید ہے کہ آپ کو ہماری کوششیں پسند آئیں گی۔ میرا ایک ہی خواب ہے کہ اس جادوئی گیت کو دوبارہ تخلیق کروں اور اپنے انداز میں گائوں۔

انہوں نے مزید کہا کہ میری درخواست کو قبول کرنے اور ہم پر بھروسہ کرنے کے لیے کرن جوہر کا شکریہ، ہم آپ کے جادوئی گانے کے ساتھ انصاف کر سکتے ہیں۔

لاہور( این این آئی) نامور اداکارہ میرا نے کہا ہے کہ میرا کیرئیر ابھی ختم نہیں ہوا بلکہ میں نے تو ابھی بہت کام کرنا ہے، فلم انڈسٹری کے جو حالات ہیں وہ سب کے سامنے ہیں۔

اپنے بیان میں انہوں نے کہا کہ شوبز سے ہرگز دور نہیں ہو ئی، مجھے یقین ہے جب اچھی فلمیں بنیں گی تو یقینی طور پر میں بطور ہیروئن کسی بھی ہدایتکار کی پہلی ترجیح ہوں گی۔

انہوں نے کہا کہ میں وہی کردار ادا کرنا چاہتی ہوں جن کی وجہ سے مجھے مقبولیت ملی۔

میرا نے کہا کہ مجھے بھارت سے بھی کام کرنے کی پیشکش ہوئی لیکن میں نے پاکستان کو ترجیح دی ہے ۔

ممبئی (این این آئی) بالی وڈ اداکارہ ایشا گپتا نے انکشاف کیا ہے کہ انہیں جنسی تعلق بنانے سے انکار پر ایک فلم سے نکال دیا گیا تھا۔ بھارت کی کئی اداکارائیں پروڈیوسرز اور ہدایتکاروں کی جانب سے کام کے بدلے جنسی تعلقات بنانے کی پیشکش کا انکشاف کرچکی ہیں اور متعدد نے کھل کر اس معاملے پر بات کی ہے۔

اب بالی وڈ کی ایک اور اداکارہ ایشا گپتا نے بھی کاسٹنگ کاؤچ پر بات کی ہے۔ حال ہی میں بھارتی میڈیا کو دیے گئے انٹرویو میں ایشا گپتا نے انکشاف کیا کہ ایک فلم کے معاون پروڈیوسر نے جنسی تعلق بنانے کی پیش کش کی۔

انہوں نے کہاکہ ان دنوں میں ان کے ساتھ ایک فلم میں کام کر رہی تھی، اس فلم کا آدھے سے زیادہ کام ختم ہوچکا تھا لیکن میں نے جنسی تعلق بنانے سے انکار کردیا تو مجھے فلم سے نکال دیا۔

انہوں نے ایک اور واقعے کا ذکر کرتے ہوئے کہا کہ میں ایک فلم میں کام کر رہی تھی اور فلم کا آؤٹ ڈور شوٹ چل رہا تھا اور فلم سے جڑے دو لوگ آؤٹ ڈور شوٹ کے بہانے میرے ساتھ کچھ غلط کرنے والے تھے اور انہوں نے پوری منصوبہ بندی کرلی تھی۔

ان کا کہنا تھاکہ ان دونوں نے مجھے اپنے منصوبے میں پھنسانے کی پوری کوشش کی لیکن میں نے سمجھداری سے کام لیتے ہوئے اپنی خاتون میک اپ آرٹس کو ساتھ کمرے میں سلا دیا تھا جس کے باعث میں بچ گئی۔

بالی ووڈ کی سابق اداکارہ ثنا خان جنہوں نے مذہب کی خاطر فلم انڈسٹری کو خیر باد کہا، نے اپنے شوہر مفتی انس اور بیٹے طارق جمیل کے ساتھ عمرے کی سعادت حاصل کی ہے۔

سوشل میڈیا پلیٹ فارم انسٹا گرام پر ثنا خان نے ایک ویڈیو پوسٹ کی ہے جس میں انہیں اپنے شوہر اور بیٹے کے ساتھ دیکھا جا سکتا ہے، ویڈیو میں روضہ رسول ؐ پر حاضری کے مناظر بھی دکھائے گئے ہیں۔

ثنا خان نے انسٹا گرام پر لکھا کہ اللہ کا کرم ہے ہم روضہ رسول ؐ میں داخل ہو گئے ہیں۔

ثنا خان لکھتی ہیں کہ یہ میرے بیٹے کے دنیا پر آنے کی برکت ہے کہ ہمیں یہ ساعتیں دیکھنا نصیب ہوئی ہیں۔