سپریم کورٹ آف پاکستان نے 90 روز میں عام انتخابات سے متعلق کیس کی سماعت کے دوران الیکشن کمیشن پاکستان اور وفاق کو نوٹس جاری کرتے ہوئے مزید سماعت 2 نومبر تک ملتوی کر دی ہے۔

چیف جسٹس پاکستان جسٹس قاضی فائز عیسیٰ نے کیس کی سماعت کے دوران صدر سپریم کورٹ بار عابد زبیری پر اظہار برہمی کرتے ہوئے کہا کہ آپ کو غلط بیانی سے کام نہیں لینا چاہیے۔

چیف جسٹس پاکستان جسٹس قاضی فائز عیسیٰ کی سربراہی میں 3 رکنی بینچ نے 90 روز میں عام انتخابات سے متعلق کیس کی سماعت کی، بینچ کے ممبران میں جسٹس اطہرمن اللہ اور جسٹس امین الدین شامل ہیں۔

دوران سماعت پاکستان تحریک انصاف کے وکیل علی ظفر ویڈیو لنک کے ذریعے پیش ہوئے۔

صدر سپریم کورٹ بار عابد زبیری نے عدالت کے سامنے دلائل دیے کہ ہم نے 5 اگست کو مشترکہ مفادات کونسل کا فیصلہ عدالت عظمیٰ میں چیلنج کیا تھا۔ جس پر چیف جسٹس نے استفسار کیا کہ یہ فوری نوعیت کا معاملہ تھا آپ نے جلد سماعت کے لیے درخواست کیوں نہ دی؟۔

وکیل عابد زبیری کا کہنا تھا کہ جلد سماعت کے لیے ہم نے درخواست دی تھی جس پر چیف جسٹس نے کہا کہ درخواست کو بروقت مقرر کر دیا جاتا تو اب تک فیصلہ ہو جاتا۔

عابد زبیری نے مشترکہ مفادات کونسل کا فیصلہ کالعدم قرار دیتے ہوئے 90 روز میں الیکشن کرانے کا حکم دینے کا مطالبہ کیا۔

چیف جسٹس قاضی فائز عیسیٰ نے کہا کہ آپ چاہتے ہیں کہ انتخابات 2017 کی مردم شماری کے مطابق ہوں، جس پر عابدزبیری نے کہاکہ مردم شماری اور حلقہ بندیوں کی وجہ سے الیکشن میں تاخیر نہیں ہونی چاہیے۔

جسٹس اطہر من اللہ نے استفسار کیا کہ اسمبلی کی تحلیل کے بعد کب 90 روز پورے ہو رہے ہیں تو عابد زبیری نے کہا کہ 3 نومبر کو 90 دن ہو جائیں گے جس پر چیف جسٹس نے کہا کہ اگر ہم 90 روز میں انتخابات کا حکم دیں تو اس پر عملدرآمد ہو جائے گا تو عابد زبیری نے کہا کہ نہیں۔ چیف جسٹس نے اس پر انہیں کہا کہ پھر درخواست میں ترمیم کر لیں۔

بعدازاں عدالت نے وفاق اور الیکشن کمیشن آف پاکستان کو نوٹس جاری کرتے ہوئے سماعت 2 نومبر تک ملتوی کر دی۔

سپریم کورٹ آف پاکستان نے 90 روز میں عام انتخابات کے انعقاد کے لیے کیس سماعت کے لیے مقرر کر دیا ہے۔

چیف جسٹس پاکستان جسٹس قاضی فائز عیسیٰ کی سربراہی میں 3 رکنی بینچ 23 اکتوبر کو کیس کی سماعت کرے گا۔ بینچ میں جسٹس اطہر من اللہ اور جسٹس امین الدین خان شامل ہوں گے۔

واضح رہے کہ ملک میں 3 ماہ کے اندر عام انتخابات کرانے کے لیے سپریم کورٹ بار اور پاکستان تحریک انصاف سمیت دیگر نے درخواستیں دائر کر رکھی ہیں۔

پاکستان تحریک انصاف (پی ٹی آئی) کے سابق سیکریٹری جنرل اسد عمر نے کہا ہے کہ نواز شریف اور عمران خان دونوں کو آئندہ عام انتخابات میں حصہ لینے کا موقع ملنا چاہیے۔

انسداد دہشتگردی عدالت لاہور کے باہر میڈیا سے گفتگو کرتے ہوئے اسد عمر نے کہا کہ ملک میں عام انتخابات جلد سے جلد ہونے چاہئیں۔

اسد عمر نے کہا کہ پیٹرول کی قیمتوں میں کمی کا فائدہ عام آدمی تک پہنچنا چاہیے۔ عالمی مارکیٹ میں تیل کی قیمتیں نیچے آئی ہیں اس لیے ضروری تھا کہ پاکستان میں بھی قیمتیں کم ہوں۔

سابق وزیر خزانہ نے کہا کہ تحریک انصاف کو جلسے کی اجازت نہیں دی گئی، اس حوالے سے درخواست عدالت میں موجود ہے۔ ہمارا موقف ہے کہ تمام پارٹیوں کو جلسے کرنے کی اجازت ہونی چاہیے۔

اسد عمر نے فلسطین کے عوام کی حمایت کرتے ہوئے کہا کہ اگر نگران حکومت کا یہ خیال ہے کہ فلسطین کے معاملے پر خاموشی کی صورت میں انہیں باہر سے کوئی آشیر باد مل جائے گی تو یہ ان کی غلط فہمی ہے۔ پاکستان کو چاہیے کہ ہر مظلوم کے حق میں آواز اٹھائے۔

ملک بھر میں 90 روز کے اندر عام انتخابات نہ کرانے کے اقدام کو لاہور ہائیکورٹ میں چیلنج کر دیا گیا ہے۔

لاہور ہائیکورٹ میں دائر کی گئی درخواست میں صدر مملکت، الیکشن کمیشن آف پاکستان اور وفاقی حکومت سمیت دیگر کو فریق بنایا گیا ہے۔

درخواست گزار نے عدالت میں موقف اختیار کیا ہے کہ آئین کے مطابق ضروری ہے کہ 90 روز میں انتخابات کا انعقاد ہو لیکن الیکشن کمیشن کی جانب سے تاحال ایسا کوئی اقدام نہیں کیا گیا۔

اسمبلیاں تحلیل ہونے کے بعد 3 ماہ میں الیکشن کرانے کے لیے اب وقت بہت کم رہ گیا ہے۔

درخواست گزار کی جانب سے استدعا کی گئی ہے کہ عدالت 90 روز میں انتخابات کرانے کے احکامات جاری کرے۔ یہ بھی استدعا کی گئی ہے کہ صدر پاکستان کو انتخابات کی تاریخ کا اعلان کرنے کا حکم دیا جائے۔

90 روز میں انتخابات کرانے کے لیے درخواست جوڈیشل ایکٹوازم پینل کی جانب سے دائر کی گئی ہے۔