عالمی مارکیٹ میں خام تیل کی قیمتوں میں کمی کا سلسلہ بدستور جاری ہے، آج تیل کی قیمتوں میں 4 ڈالر فی بیرل سے زیادہ کی کمی ریکارڈ کی گئی ہے۔

امریکی خام تیل ویسٹ ٹیکساس انٹرمیڈیٹ 85.59 ڈالر فی بیرل کی سطح پر آ گیا، اس کی قیمت میں 4 فیصد کمی ہو ئی ہے۔

اس کے علاوہ برطانوی خام تیل برینٹ کروڈ آئل 87.40 ڈالر فی بیرل پر آ گیا ہے، اس کی قیمت میں 3.8 فیصد کمی ریکارڈ کی گئی ہے۔

15 روز کے دوران ریکارڈ کی گئی قیمتوں میں برینٹ کروڈ آئل کی قیمت 7 ڈالر فی بیرل سے زیادہ گر گئی ہے۔

غیر ملکی میڈیا کا کہنا ہے کہ تیل پیدا کرنے والے ممالک کی تنظیم اوپیک پلس نے تیل کی پیداوار میں کمی یا زیادتی کے حوالے سے فی الحال کوئی فیصلہ نہیں کیا۔

ماہرین کا خیال ہے کہ اگر قیمتوں میں کمی کا سلسلہ برقرار رہا تو پاکستان میں بھی پیٹرولیم مصنوعات کی قیمتوں میں کمی آ سکتی ہے۔

مہنگائی کے مارے عوام کے لیے خوشخبری سامنے آئی ہے اور یکم اکتوبر سے پیٹرولیم مصنوعات کی قیمتوں میں کمی ہو سکتی ہے۔

میڈیا رپورٹس کے مطابق پیٹرول کی فی لیٹر قیمت میں 5 سے 19 روپے تک کی کمی ہو سکتی ہے۔

اگر ایسا ہوا تو گزشتہ 2 ماہ کے دوران پہلی بار پیٹرولیم مصنوعات کی قیمتوں میں کمی ہو گی۔

پیٹرولیم مصنوعات کی قیمتوں میں کمی کو ڈالر سے جوڑا جا رہا ہے کیوں کہ کرنسی مارکیٹ میں ڈالر کی اسمگلنگ کے خلاف کریک ڈائون کے بعد روزانہ کی بنیاد پر امریکی کرنسی کی قیمت میں کمی واقع ہو رہی ہے اور اب امکان ظاہر کیا جا رہا ہے کہ اس کا ریلیف عام آدمی کو بھی دیا جائے گا۔