عالمی شہرت رکھنے والے پاکستان کے معروف گلوکار عاطف اسلم نے ایک شخص کی جانب سے نوٹ پھینکنے کے موقع پر کنسرٹ روک دیا۔

پاکستانی گلوکار ان دنوں امریکا کے دورے پر ہیں جہاں پر وہ مداحوں کو اپنی جادو بھری آواز سے محظوظ کر رہے ہیں۔

سوشل میڈیا پر ایک ویڈیو وائرل ہے جس میں دیکھا جا سکتا ہے کہ گلوکار پر کنسرٹ کے دوران جب نوٹ پھینکے جاتے ہیں تو وہ غصہ کرنے کے بجائے مداح سے کہتے ہیں کہ اپنے پیسے آ کر سمیٹ لو اور کسی اچھی جگہ پر عطیہ کر دینا۔

عاطف اسلم مزید کہتے ہیں کہ آپ کے امیر ہونے کا مجھے علم ہے لیکن ضروری ہے کہ پیسے کی عزت کی جائے اور اسے اچھے مقاصد کے لیے استعمال کیا جائے۔

سوشل میڈیا پر ویڈیو وائرل ہونے پر صارفین نے عاطف اسلم کے اس عمل کو بہت پسند کیا ہے۔

بالی ووڈ کے معروف اسٹار سلمان خان کی ایک ڈانس ویڈیو سامنے آنے کے بعد ان کے مداحوں کو پریشانی لاحق ہو گئی ہے۔

سلمان خان نے ایک بھارتی صنعتکار کے پوتے کی سالگرہ میں ڈانس کی ہے جس میں تھکے ہوئے نظر آ رہے ہیں اور ڈانس میں خوبصورتی نظر نہیں آئی جس کے لیے وہ مشہور ہیں۔

ویڈیو سوشل میڈیا پر وائرل ہونے کے بعد سلمان خان کے مداحوں کو ان کی صحت کے حوالے سے تشویش لاحق ہوگئی ہے اور ان کو اپنا خیال رکھنے کا مشورہ دیا جا رہا ہے۔

ایک چاہنے والے نے سوشل میڈیا پر سلمان خان کو مشورہ دیا کہ کام سے بریک لیں، آپ کو اپنی صحت پر توجہ دینی چاہیے۔

ایک اور فین نے کہاکہ آپ تھکے ہوئے لگ رہے ہیں۔ مداحوں نے جہاں سلمان خان کو صحت کا خیال رکھنے کا مشورہ دیا ہے وہیں یہ امید بھی ظاہر کی ہے کہ وہ جلد اپنی پرانی فارم میں نظر آئیں گے۔

پاکستان کے معروف کامیڈین اور تھیٹر کے بادشاہ عمر شریف کو دنیا سے کوچ کیے 2 برس بیت گئے ہیں۔

عمر شریف کئی دہائیوں تک اپنی اداکاری اور غیرروایتی انداز سے لوگوں کے چہروں پر مسکراہٹیں بکھیرتے رہے۔

عمر شریف نے 19 اپریل 1955 کو کراچی میں آنکھ کھولی تھی۔ 1980 میں پہلی بار انہوں نے آڈیو کیسٹ کے ذریعے ڈرامے ریلیز کیے۔

عمر شریف کو یہ اعزاز حاصل ہے کہ انہوں نے 70 سے زیادہ ڈراموں کے اسکرپٹ لکھے جو بے حد مقبول بھی ہوئے۔

پاکستان کے نامور کامیڈین کا انتقال 2 اکتوبر 2021 کو ہوا تھا۔ جب وہ دنیا سے رخصت ہوئے تو ان کی عمر 66 برس تھی۔ آج دنیا سے گزرے 2 برس گزرنے کے باوجود وہ لوگوں کے دلوں میں زندہ ہیں۔