نئی دہلی (این این آئی)بھارتی میڈیا نے کہاہے کہ انٹرنیشنل کرکٹ کونسل (آئی سی سی) ورلڈ کپ کے لیے پاکستانی فینز اور صحافیوں کو محدود ویزے جاری کیے جائیں گے اس حوالے سے بھارتی کرکٹ بورڈ (بی سی سی آئی) نے کہا کہ پاکستانی صحافیوں اور شائقین کو کتنے ویزے جاری کیے جائیں گے؟

اس ضمن میں ابھی اندازہ نہیں، وزارتِ خارجہ اور آئی سی سی کے ساتھ مل کر ویزوں کی تعداد پر کام کر رہے ہیں۔

بی سی سی آئی نے کہا کہ کچھ پاکستانی شائقین کو ورلڈ کپ کے میچز کے لیے ویزے جاری کر دیے جائیں گے۔

پاکستانی شائقین اور صحافیوں کو متعدد شہروں کا ویزا جاری کیا جائے گا۔بھارتی میڈیا کے مطابق 2016ء میں ہونے والے ٹی ٹوئنٹی ورلڈ کپ کی طرز پر اس ورلڈ کپ کے لیے بھی ویزے جاری کیے جائیں گے۔واضح رہے کہ 2016ء میں بھارتی حکومت نے پاکستانی شائقین کو ایک میچ کے 250 ویزے جاری کیے تھے۔

اسلام آباد (این این آئی)کرکٹ ورلڈ کپ میں شرکت کے لئے پاکستانی کھلاڑی اور آفیشلز ویزوں کے منتظر ہیں تاہم بھارتی ہائی کمیشن نے پاکستانی اسکواڈ کو تاحال ویزے جاری نہیں کئے۔

کرکٹ ورلڈ کپ کا میگا ایونٹ شروع ہونے میں ابھی چند ہی دن باقی رہ گئے ہیں تاہم بھارت کی ہٹ دھرمی ابھی بھی برقرار ہے اور ابھی تک بھارتی ہائی کمیشن نے پاکستانی اسکواڈ کو ویزے جاری نہیں کئے ۔

ورلڈ کپ میں شرکت کے لئے پاکستانی کھلاڑی اور آفیشلز ویزوں کے منتظر ہیں تاہم بھارت نے ویزے سیکیورٹی کلیئرنس سے مشروط کر دیئے ہیں ۔

پاکستانی اسکواڈ نے 25 ستمبرکو بھارت روانہ ہونا ہے، اور قومی ٹیم نے ایونٹ شروع ہونے سے قبل نیوزی لینڈ اور آسٹریلیا کے خلاف وارم اپ میچزبھی کھیلنے ہیں ۔

اسلام آباد (این این آئی)پاکستان اور نیوزی لینڈ کے درمیان ورلڈ کپ 2023 کا وارم اپ کھیل 29 ستمبر کو بغیر تماشائیوں کے بھارتی ریاست حیدرآباد میں راجیو گاندھی انٹرنیشنل اسٹیڈیم میں کھیلا جائے گا۔

میڈیا کی رپورٹس کے مطابق 29 ستمبر کو بھارتی شہر حیدرآباد کے راجیو گاندھی انٹرنیشنل اسٹیڈیم میں پاکستان اور نیوزی لینڈ کے درمیان کرکٹ ورلڈ کپ 2023 کے لیے وارم اپ میچ کھیل کھیلا جائے گا۔

رپورٹ کے مطابق پولیس نے حیدرآباد کرکٹ ایسوسی ایشن (ایچ سی اے) سے سیکیورٹی خدشات کی وجہ سے وارم اپ میچ ملتوی کرنے کے لیے کہا تھا کیونکہ پولیس 28 ستمبر کو ختم ہونے والے مذہبی تہوار پر اپنی توجہ مرکوز رکھے گی۔

رپورٹ میں کہا گیا کہ شیڈول کے سخت ہونے کی وجہ سے عہدیداروں نے تماشائیوں کے داخلے پر پابندی عائد کرنے کا فیصلہ کیا ہے۔بھارتی میڈیا رپورٹ کے مطابق میچ کے ٹکٹ حاصل کرنے والوں کو رقم واپس کردی جائے گی۔

بورڈ آف کنٹرول فار کرکٹ ان انڈیا (بی سی سی آئی) کے ایک عہدیدار نے بتایا کہ میچ تماشائیوں کے بغیر کھیلا جائے گا اور جنہوں نے اپنے ٹکٹ بک کرائے ہیں، ان کے پیسے واپس کر دیے جائیں گے۔

انہوں نے کہا کہ 29 ستمبر کو ہونے والے وارم اپ میچ کے سیکیورٹی انتظامات کے حوالے سے گزشتہ چند دنوں سے بات چیت چل رہی ہے کیونکہ اس درمیان دو مذہبی تہواروں کی آمد ہے۔

پولیس نے کہا کہ مذہبی تہوار کی وجہ سے ان پر اس میچ کے لیے سیکیورٹی فراہم کرنے کے لیے سخت دباؤ ہوگا۔