نگران وزیراعظم انوارالحق کاکڑ کو برطانوی وزیر خارجہ جیمز کلیورلی نے ٹیلیفون کیا ہے اور دہشت گرد حملوں کی شدید مذمت کی ہے۔

برطانوی وزیر خارجہ جیمز کلورلی نے مستونگ اور ہنگو میں ہونے والے دہشتگردی کے واقعات میں جاں بحق افراد کے لواحقین سے ہمدردی کا اظہار کیا۔ اور اس امید کا اظہار کیا کہ زخمی افراد جلد صحت یاب ہوں گے۔

اس موقع پر نگراں وزیراعظم انوارالحق کاکڑ نے برطانوی حکومت کی جانب سے اظہار یکجہتی کرنے پر برطانیہ کی حکومت کا شکریہ ادا کیا۔

وزیراعظم انوارالحق کاکڑ نے کہاکہ حکومت دہشتگردی کے خاتمے کے لیے پُر عزم ہے، جو لوگ ان واقعات میں ملوث ہیں ان کو کٹہرے میں لایا جائے گا۔

امریکا نے واضح طور پر کہا ہے کہ ٹی ٹی پی خطے کے امن کےلئے براہ راست خطرہ ہےامریکی نمائندہ خصوصی برائے افغانستان تھامس ویسٹ کا کہناہے کہ افغان سرزمین کے دہشتگردی کیلئے استعمال ہونے کے واقعات میں اضافہ ہو رہا ہے ۔ بلوچستان کے علاقے مستونگ میں حالیہ خود کش حملہ اس کی تازہ مثال ہے۔

تھامس ویسٹ نے ٹی ٹی پی کے پاکستان میں دہشتگردی کی کارروائیوں میں ملوث ہونے کے پاکستانی موقف کی حمایت کرتے ہوئے کہا کہ سب اس بات سے واقف ہیں کہ ٹی ٹی پی پاکستان سے نکالے جانے پر افغان طالبان کی حامی بن کر جنگ لڑتی رہی۔ افغان طالبان اور ٹی ٹی پی آپریشنل اور مالی معاونت میں ایک پیج پر ہیں۔ افغان طالبان ٹی ٹی پی کو لاجسٹک سپورٹ بھی فراہم کرتے آئے ہیں۔

تھامس ویسٹ نے کہاکہ پاکستان خطے میں امن کے لیے ہمیشہ مددگار رہا ہے۔ پاکستان نے سیکیورٹی مسائل کی نشاندہی اور افغان مہاجرین کے معاملے پر بہت مدد کی۔

ہنگو کی مسجد میں جمعہ کو ہونے والے خود کش دھماکے کا مقدمہ درج کر لیا گیا ہے، پولیس کی جانب سے حملہ آور کے جسم کے نمونے بھی حاصل کر لیے گئے ہیں۔

پولیس نے بتایا ہے کہ ہنگو میں خود کش دھماکے کی ایف آئی آر ایس ایچ او دوآبہ کی مدعیت میں درج کی گئی ہے۔

نامعلوم افراد کے خلاف درج کیے گئے مقدمے میں دہشتگردی، قتل اور اقدام قتل کی دفعات درج کی گئی ہیں۔

ایف آئی آر میں لکھا گیا ہے کہ 2 نامعلوم موٹرسائیکل سواروں کی جانب سے پولیس اہلکار اور تھانے کے گیٹ پر فائرنگ کی گئی، اس دوران ڈیوٹی پر موجود اہلکار نے جوابی فائرنگ کی، اہلکار کی جانب سے دہشتگرد سے بندوق چھینی گئی۔

مقدمے میں درج ہے کہ ایک خود کش بمبار نے گیٹ کے قریب پہنچ کر خود کو دھماکے سے اڑا لیا۔

لاہور ہائیکورٹ نے چیئرمین پاکستان تحریک انصاف (پی ٹی آئی) عمران خان کی توہین الیکشن کمیشن کی کارروائی کے خلاف درخواستیں سماعت کے لیے مقرر کر دی ہیں۔

عدالت العالیہ لاہور نے عمران خان کی درخواستوں پر سماعت کے لیے بینچ تشکیل دے دیا ہے، جس کی سربراہی جسٹس عالیہ نیلم کریں گی۔

بینچ میں جسٹس شہرام سرور اور جسٹس اسجد جاوید شامل ہوں گے جو 4 اکتوبر کو سماعت کرے گا۔

عمران خان کی جانب سے دائر درخواستوں میں موقف اختیار کیا گیا ہے کہ الیکشن کمیشن کو توہین عدالت کی کارروائی کرنے کا کوئی اختیار نہیں۔

عمران خان کی جانب سے ہائیکورٹ سے استدعا کی گئی ہے کہ توہین عدالت کی کارروائی کو کالعدم قرار دیا جائے۔

واضح رہے کہ لاہور ہائیکورٹ نے الیکشن کمیشن کو حتمی فیصلہ کرنے سے روک رکھا ہے۔

اسلام آباد/لاہور( این این آئی)موٹرویز اور ہائی ویز پولیس نے ڈرائیوروں پر قانون کے خلاف ورزی پر جرمانوں میں اضافہ کردیا۔

حد رفتار سے تجاوز پر چالان 700 روپے سے بڑھا کر 2500 روپے کردیا گیا جبکہ دوسری گاڑی کو راستہ نہ دینے پر 1ہزار روپے جرمانہ عائد کیا گیا ہے۔

پولیس کے مطابق رات کے وقت کم روشنی کی گاڑی چلانے پر 5ہزار روپے جرمانہ ہوگا جبکہ اسٹاپ لائن کی خلاف ورزی پر جرمانے کی رقم 500سے بڑھا کر 3ہزار روپے مقرر کردی گئی ۔

نئے اعلامیے کے مطابق اگلی گاڑی کے بہت قریب گاڑی چلانے پر 1ہزار روپے جرمانہ ہوگا جبکہ پہلی اسکرین ڈھانپ کر گاڑی چلانے پر 750 روپے کا جرمانہ دینا ہوگا۔

ڈرائیونگ کے دوران ٹریفک لائن توڑنے پر جرمانہ 500 سے بڑھا کر ایک ہزار روپے جبکہ ٹریفک روانی میں خلل ڈالنے پر 2ہزار روپے جرمانہ عائد کیا جائے گا۔