اسرائیل نے معصوم لوگوں کے قتل کی تمام حدیں پارکردیں، صدرعلوی

اسلام آباد: پاکستان کے صدرمملکت ڈاکٹر عارف علوی نے غزہ میں فلسطینیوں پر ہونے والے مظالم اور قتل عام کی شدید مذمت کی ہے ۔
اتوارکوسماجی رابطے کی ویب سائٹ ایکس پراپنے پیغام میں صدر عارف علوی نے کہا کہ اسرائیل نے بچوں ، خواتین اور معصوم لوگوں کو قتل کرکے تمام حدیں پار کر دی ہیں، انسانی تاریخ میں کبھی بھی اتنے بڑے پیمانے پر ظلم اور بربریت نہیں دیکھی گئی جس کا مظاہرہ اسرائیل کررہا ہے،یہاں تک کہ پانی، بجلی، خوراک اور ادویات کی فراہمی بھی منقطع کر دی گئی ہے۔
صدرعارف علوی نے کہا کہ یہ امر افسوسناک ہے کہ عالمی برادری اسرائیل کو فلسطینی عوام کی نسل کشی سے روکنے میں ناکام رہی ہے،میں اقوام متحدہ اور او آئی سی پر زور دیتا ہوں کہ وہ ان وحشیانہ کاروائیوں کو روکنے کے لیے فوری اجلاس بلائیں اور فلسطین میں مزید بربادی اور انسانی تباہی کو روکنے کے لیے ضروری طبی امداد، خوراک اور دیگر سامان فوری طور پر روانہ کریں ۔
پاکستان فلسطینی عوام کے لیے ایک آزاد ریاست کے قیام کی حمایت کرتا ہے جو خطے میں پائیدار امن و استحکام کا واحد حل ہے۔