اسلام آباد(مانیٹرنگ ڈیسک )قومی کرکٹ ٹیم کے چیف سلیکٹر انضمام الحق نے اپنے خلاف الزامات کی انکوائری شروع ہونے پر عہدے سے استعفیٰ دے دیا۔
چیف سلیکٹر انضمام الحق کے ٹیم مینجمنٹ کے ساتھ اختلافات کی خبریں کافی دنوں سے میڈیا میں گردش کررہی تھیں،اس دوران پلیئرایجنٹس کمپنی کے حوالے سے انضمام الحق خبروں میں رہے۔ ورلڈ کپ کے لئےٹیم سلیکشن کے دوران بھی اختلافات کی خبریں سامنے آئی تھیں ۔
میگا ایونٹ میں قومی ٹیم کی خراب کارکردگی کی وجہ سے ٹیم اور مینجمنٹ میں تبدیلیوں کا مطالبہ سامنے آرہا تھا ایسے میں انضمام الحق نے خود ہی سلیکشن کمیٹی کی سربراہی چھوڑنے کافیصلہ کیا ہے۔
اپنے بیان میں انضمام الحق کا کہنا تھا کہ لوگ بغیر تحقیق کے باتیں کرتے ہیں، مجھ پر سوال اٹھے تو استعفیٰ دینا بہتر سمجھا، مجھ پر سوال اٹھے گا تو بہتر ہے سائیڈ پر ہوجاؤں۔
انہوں نے کہا کہ پاکستان کرکٹ بورڈ انکوائری کرے میں دستیاب ہوں، بغیر تحقیق کے باتیں کر رہے ہیں جس نے بھی کہا ثبوت دیں۔
انضمام الحق کا کہنا تھاکہ میرا پلیئرز ایجنٹ کمپنی سے کسی قسم کا تعلق نہیں، اس طرح کے الزمات سے دکھ ہوتا ہے۔
انہوں نے کہا کہ مجھ پرالزامات لگنے پرمیں نے بورڈ سے بات کی تھی، بورڈ کوکہا کہ آپ کوکوئی شک ہے توانکوائری کرلیں، مجھے فون آیا اور بتایا گیا کہ 5 لوگوں کی کمیٹی بنائی گئی ہے، اس پر بورڈ کوکہا جب تک کمیٹی تحقیقات کرلےعہدہ چھوڑ دیتا ہوں۔
دوسری طرف پی سی بی نے سابق چیف سلیکٹرانضمام الحق کے خلاف الزامات سے متعلق تحقیقات کے لیے 5 رکنی تحقیقاتی کمیٹی قائم کردی ہے۔
پی سی بی اعلامیہ کے مطابق 5 رکنی تحقیقاتی کمیٹی قومی کرکٹ ٹیم کے انتخاب کے عمل سے متعلق میڈیا میں رپورٹ ہونے والے مفادات کے ٹکراؤ کے حوالے سے الزامات کی تحقیقات کرےگی۔
پانچ رکنی تحقیقاتی کمیٹی اپنی رپورٹ اور سفارشات پی سی بی کی انتظامیہ کو جلد پیش کرےگی۔
پی سی بی کے مطابق کمیٹی کو ان الزامات کی تحقیق کرنے کے لیے مکمل اختیار دیا گیا ہے۔
پانچ رکنی انکوائری کمیٹی میں کرنل ریٹائرڈ خالد، کرنل ریٹائرڈ اختر، ڈائریکٹر میڈیا عالیہ رشید شامل ہیں۔ لیگل اور آڈٹ ٹیم کا ایک، ایک نمائندہ بھی کمیٹی کا حصہ بنایا گیا ہے۔۔
