ہر طرف موت کا رقص۔۔۔ گری ہوئی عمارتوں کےملبے کے ڈھیروں سے چیختی چلاتی آوازیں ۔۔۔آسمان سے برستی آگ کی لپیٹ میں آ کر تڑپتے انسانی لاشے۔۔۔۔ یہ مقبوضہ فلسطین کا شہرغزہ ہے۔۔۔جس پر اسرائیل قہر بن کر ٹوٹ پڑا ہے۔۔۔ سوموار کی صبح سے شروع ہونے والی اسرائیلی طیاروں کی بمباری مسلسل جاری ہے ۔ آسمان سے برستی مسلسل آگ میں غزہ کے شہریوں کیلئے کوئی جائے پناہ نہیں ہے۔ مغرب کو اسرائیل پر حماس کے حملوں سے ہونے والے نقصان پرتو دکھ ہے لیکن اسے غزہ پر ڈھائی جانے والی قیامت سے کوئی غرض نہیں ۔۔۔
اسرائیلی فضائی حملوں کی زد میں آ کر تباہ ہونے والی عمارتوں کے ملبے کے اوپر نیچے اور درمیان درجنوں فلسطینی بچوں کے لاشے پڑے اقوام عالم کا منہ چڑا رہے ہیں اور پوچھ رہے ہیں کہ کیا مسلمان کے خون کی قیمت پانی سے بھی کم ہے؟ اسرائیلی پر حملے پر میڈیا پر آنسو بہانے والے اہل مغرب کی آنکھوں سے معصوم بے گورو کفن لاشوں پر ایک آنسو بھی ٹپکنا تو درکنار ان کے منہ سے اسرائیلی بربریت پر مزمت کا ایک لفظ بھی نہیں نکلا۔۔۔
حماس فوجی چوکیوں پر حملے کرے تو ناجائز ۔۔۔لیکن اسرائیلی طیارے فلسطین کے شہریوں کا براہ راست نشانہ بنائیں تو ان کیلئے شاباش۔۔۔۔ یہ وہ دوغلا پن ہے جس کے خلاف حماس میدان میں نکلی ہے۔ ہر حملے کے وقت ایسا لگتا ہے جیسے کسی زلزلے نے عمارت کو ہلا دیا ہو۔ مجھے اپنا دل خوف سے دھڑکتا ہوا محسوس ہوتا ہے اور میرا پورا جسم کانپ جاتا ہے۔‘
بی بی سی کی ایک رپورٹ میں اسرائیلی بربریت کا احوال غزہ کے شہریوں کی زبانی بیان کیا گیا ہے
نادیہ سوموار کی صبح اپنے گھر کی کھڑکیاں اور دروازے ٹوٹنے کی آوازوں سے بیدار ہوئیں۔ صبح آٹھ بجے شروع ہونے والی بمباری کسی وقفے کے بغیر رات دیر گئے تک جاری رہی۔ نادیہ کے مطابق ’ایک سیکنڈ کے لیے بھی بمباری بند نہیں ہوئی۔اس کے خاندان نے غزہ کی پٹی کے ساحل پر حال ہی میں فلیٹ خریدا تھا۔ اس وقت وہ گھر میں اکیلی تھیں کیوں کہ ان کے شوہر، جو ایک بین الاقوامی تنظیم میں ڈاکٹر ہیں، زخمیوں کی مدد کرنے کے لئے گئے ہوئے تھے۔ اُن کا تین سال کا بیٹا کھانا نہیں کھا پا رہا اور اسے دورے پڑ رہے ہیں۔
سوموار کی رات ان کو ہمسائیوں کی چلانے کی آواز آئی جو سیڑھیوں سے نیچے اترتے ہوئے کہہ رہے تھے ’(گھر) خالی کرو، باہر نکلو۔نادیہ چند سیکنڈز تک ہچکچائیں۔ ان سے یہ فیصلہ نہیں ہو پا رہا تھا کہ وہ اپنے ساتھ گھر سے کیا لے کر جائیں۔ تب وہ مایوسی اور دہشت کے زیر اثر رو پڑیں۔اپنے دونوں بچوں کے ساتھ عمارت سے باہر نکلنے پر انھوں نے دیکھا آس پاس کی تمام عمارات زمین بوس ہو چکی تھیں۔اب وہ اپنے والدین کے گھر محفوظ طریقے سے پہنچنے کی کوشش کر رہی ہیں لیکن وہ کہتی ہیں کہ “جب آسمان سے موت برس رہی ہو تو آپ کہاں چھپ سکتے ہیں؟”نادیہ اور غزہ کے دیگر رہائشیوں نے بی بی سی سے بات چیت میں بتایا کہ اس بار ہونے والی تباہی کی ماضی سے نظیر نہیں ملتی۔ دینا ’اپنا گھر، اپنی یادیں اور اس جگہ کو کھو دینے کے صدمے‘ سے نکلنے کی کوشش کر رہی ہیں جہاں وہ خود کو محفوظ تصور کرتی تھیں۔وہ کہتی ہیں کہ اب غزہ میں کوئی جگہ محفوظ نہیں رہی۔

اسرائیل پر حماس کے پُراسرار حملے نے پوری دنیا کو چونکا کر رکھ دیا ہے یہ اتنا محتاط لیکن منظم حملہ تھا کہ دنیا کی نمبر ون آرمی ہونے کے دعویدار اسرائیلی فوجیوں کو اس وقت پتا چلا جب حماس کے جانباز ” ابابیلوں” کی طرح ان کے سروں پر آن کھڑے ہوئے تھے۔
عالمی خبر رساں ادارے کے مطابق حماس کے اسرائیل پر اچانک اور غیر متوقع حملے کی معلومات جیسے جیسے سامنے آرہی ہیں دنیا حیرت زدہ ہوتی جا رہی ہے اور اس حملے کے منصوبہ ساز نے عالمی توجہ حاصل کرلی ہے۔
اسرائیل پر آسمانی ابابیلیں بن کر حملہ کرنے کی منصوبہ بندی کرنے والے حماس کے عسکری تنظیم القسام بریگیڈ کے کمانڈر الضیف ہیں جن کے بارے میں غیر مصدقہ معلومات تو بہت ہے لیکن مصدقہ تصاویر صرف تین ہیں۔
اسرائیل کے 7 قاتلانہ حملوں میں معجزانہ طور پر زندہ بچ جانے والے الضیف کی ایک تصویر تب کی ہے جب وہ محض 20 سال کے تھے اور دوسری تصویر میں وہ نقاب لگائے ہوئے ہیں اور تیسری تصویر میں ان کا صرف سایہ ہے۔حماس کے قریبی ذرائع نے بتایا کہ اسرائیل پر اپنی نوعیت کے اس منفرد اور تاریخی حملے کی تیاری کا فیصلہ القسام بریگیڈ کے کمانڈر الضیف نے غزہ میں حماس کے رہنما یحییٰ سنوار کے ساتھ مل کر تیار کیا تھا جسے اتنا خفیہ رکھا گیا تھا کہ حماس کے بھی مٹھی بھر رہنماؤں کو اس کا معلوم تھا۔
ایک علاقائی ذریعہ کے مطابق اس آپریشن کو اتنا خفیہ رکھا گیا تھا کہ اسرائیل کے سخت ترین حریف اور حماس کی مالی و فوجی مدد کرنے والے ایران کو بھی صرف یہ بتایا گیا تھا کہ حماس کسی بڑے آپریشن کی منصوبہ بندی کر رہی ہے لیکن وہ کیا ہے اور کب کیا جائے گا اس سے ایران بھی بے خبر تھا۔حماس کے ٹی وی چینل نے جب اعلان کیا کہ ہفتے کے روز القسام کے کمانڈر الضیف اہم تقریر کرنے والے ہیں تو فلسطینیوں کو معلوم ہوگیا تھا کہ کچھ بہت خاص اور اہم ہونے والا ہے کیوں کہ الضیف نہ تو منظر عام پر آتے ہیں اور نہ اس طرح خطاب کرتے ہیں۔
القسام کے کمانڈر الضیف نے ریکارڈ شدہ پیغام میں کہا کہ آج اسرائیل کے الاقصیٰ پر حملے کا غصے کے اظہار کا دن ہے۔ ہمارے مجاہدو! آج آپ کا دن ہے کہ آپ اس مجرم (اسرائیل) کو اُس کا وقت ختم ہونے کا احساس دلائیں۔

 حماس کے سربراہ اسماعیل ہانیہ نے کہا ہے کہ  جنگ ختم ہونے تک قیدیوں کا تبادلہ نہیں کیا جائے گا۔

اسماعیل ہانیہ کا کہنا ہے کچھ ممالک کی جانب سے قیدیوں کی رہائی کے حوالے سے ثالثی کا کردار ادا کرنے کے لیے رابطہ کیا گیا ہے لیکن جنگ ختم ہونے تک قیدیوں کا تبادلہ نہیں کیا جائے گا اور جب بھی قیدیوں کا تبادلہ ہو گا تو قیدیوں کی قیمت حماس طے کرے گی۔

اسماعیل ہانیہ نے غزہ کے عوام کی فلسطین کاز کے لیے قربانیاں دینے کے جذبے اور ولولے کی تعریف کرتے ہوئے کہا کہ حماس کی کارروائیوں کے جواب میں اسرائیل کے جوابی حملے صیہونی ریاست کی شکست کی عکاسی کر  رہے ہیں۔

ادھر قطر کی وزارت خارجہ کے ترجمان کا کہنا ہے کہ اسرائیل اور حماس قیدیوں کے تبادلے سے متعلق گفتگو قبل از وقت ہے، یہ کہنا بہت مشکل ہے کہ کوئی بھی فریق ثالثی سے آغاز کر سکتا ہے۔