لاہورمیں سابق وزیراعظم شہبازشریف کے’’ مہمانوں‘‘ پرمقدمہ درج کرنے کا معاملہ سنگین صورت اختیار کرگیا۔
پاکستان مسلم لیگ ن کے صدر شہبازشریف گزشتہ دنوں اپنے حلقہ این اے 132 کے دورے پر پہنچے تو روہی نالہ کی بحالی کے لئے آواز بلند کرنے والے مظاہرین نے ان کی گاڑی روک کر احتجاج ریکارڈ کرایا تھا۔ اس دوران بدنظمی بھی دیکھنے کو ملی ۔شہباز شریف نے مظاہرین سے ملاقات کی اور انہیں اپنے ہاں مدعو بھی کیا۔
شہبازشریف کی دعوت پرایک وفد شہباز شریف کے گھر پہنچا، وفد میں شریک ناصر علی خان اور احمد علی کے مطابق شہباز شریف نے مطالبات غور سے سنے، مہمان نوازی کی چائے بھی پلائی لیکن اب ہم پر ہی مقدمہ درج کردیا گیا ہے جس میں راستہ بند کرنے کا الزام عائد کیا گیا ہے ، یہ دوغلی پالیسی ہے۔
واضح رہے کہ فیروز پور پرانا کاہنہ میں تقریباً آٹھ کلومیٹر نالہ ہے جس پربااثرمافیا قابض ہے۔ یہ نالہ 1964 سے موجود ہے۔
یہ 80 فُٹ نالہ ہے جس پر مختلف لوگوں نے قبضہ کر رکھا ہے، مقامی افراد چاہتے ہیں کہ نالہ اصل حالت میں بحال کیا جائے اسی مطالبے کو لے کر لوگ احتجاج کررہے تھے۔ مقدمے میں نامزد افراد نے ضمانت کروانے کی بجائے اجتماعی طورپر گرفتاری دینے کا فیصلہ کیا ہے جس کے باعث علاقے میں صورتحال کشیدہ ہو گئی ہے ۔ یہ کشیدگی ایک ایسے وقت پر سراٹھا رہی ہے جب ن لیگ سابق وزیراعظم نوازشریف کے استقبال کی تیاریوں میں مصروف ہے

چیف جسٹس پاکستان قاضی فائز عیسیٰ نے ریمارکس دیئے ہیں کہ لگتاہے پولیس اب کرائے کی پولیس بن کررہ گئی ہے اس کی کوئی عزت نہیں رہی ۔
70 تولہ سونے کی کمیٹی نکلنے پرسونا فراہم نہ کرنے سے متعلق کیس کی سماعت کے دوران چیف جسٹس نے غیر معیاری تفتیش پر پراسیکیوشن پر برہمی کا اظہار کرتے ہوئے کہا کمیٹی گرفتار ملزم نے بنائی اور تفتیش اہلخانہ سے ہوئی۔
ایڈیشنل پراسیکیوٹر نے عدالت کو بتایا کہ 10 گرام سونے کی کمیٹی نکلنے پر سونا ادا نہیں کیا گیا جس پر عدالت نے استفسار کیا کہ گرفتار سنار نے کتنا سونا کمیٹی کے ذریعے دینا تھا؟ مدعی نے بتایا کہ کمیٹی سے نکلنے والا 70 تولہ سونا نہیں دیا گیا۔
چیف جسٹس پاکستان نے ریمارکس دیے کہ ڈیڑھ کروڑ مالیت سونے کا کوئی انکم ٹیکس ادا نہیں کیا گیا، یہ سونا کہاں سے آتا ہے؟ اس کی قانونی حیثیت کیا ہے؟ ریاست کرپشن اور اسمگلنگ کرنے میں معاونت کرتی ہے۔
جسٹس قاضی فائز عیسیٰ کا کہنا تھا اس کیس میں اصل ملزم تو پولیس کو بنانا چاہیے، لگتا ہے پولیس اب کرائے کی پولیس بن گئی، پولیس کی اب اپنی عزت نہیں رہی، ادارے کی عزت ہونی چاہیے، پولیس اور پٹواری کا شاہی سسٹم ختم ہونا چاہیے۔
سپریم کورٹ نے سونے کی کمیٹی میں گرفتار ملزم کی ضمانت منظور کرتے ہوئے ملزم کو 2 لاکھ روپے کے مچلکے جمع کروانے کا حکم دیا۔

مکوآنہ (این این آئی) ایف آئی اے سائبر کرائم سرکل فیصل آباد نے کارروائی کرتے ہوئے آن لائن مالی فراڈ میں ملوث 2 ملزمان حیدر سلطان اور محمد عرفان کوفیصل آباد سے گرفتار کرلیا۔

حکام کے مطابق ملزمان نے خود کو شکایت کنندہ کا رشتہ دار ظاہر کرتے ہوئے لاکھوں روپے بٹورے۔

ملزمان نے شکایت کنندہ کو کال کی اور خود کو بیرون ملک مقیم ظاہر کیا۔ملزمان نے متاثرہ سے 4 لاکھ 10 ہزار روپے بٹور رکھے تھے۔

ملزمان نے من گھڑت کہانیوں کا احوال بتاتے ہوئے مذکورہ رقم ہتھیائی۔ ملزمان کے قبضے سے واردات میں استعمال شدہ 2 موبائل فون برآمد کر لیے گئے جس کے بعد ملزمان کے خلاف مقدمہ درج کر لیا گیا ہے۔