کراچی(این این آئی)کراچی ایئرپورٹ پر ناکارہ طیارے کھڑے کھڑے کباڑ میں تبدیل ہوگئے، شاہین ایئر لائن کے مالکان واجبات ادا کیے بغیر ملک سے چلے گئے۔
تفصیلات کے مطابق شاہین ایئرلائن کے درجنوں گرائونڈ کیے گئے طیارے کئی برس سے کراچی ایئرپورٹ پر کھڑے کباڑ بن گئے ہیں، ایئرپورٹ پر کھڑے طیاروں سے پرزہ جات چوری بھی ہوگئے ہیں۔
کسٹمز اور سی اے اے کے واجبات کی عدم ادائیگی کے باعث گرائونڈ کیے گئے ناکارہ طیارے پرندوں کی آماجگاہ بن گئے جس کی وجہ سے ایئر پورٹ آنے اور جانے والے جہازوں کے لئے بھی خطرہ پیدا ہوگیا ہے۔
مذکورہ طیاروں کا مسئلہ حل کرنے کیلئے کسٹمز حکام نے ڈی جی سی اے اے سے ملاقات کی۔
اس حوالے سے ذرائع نے بتایا کہ واجبات کی وصولی کیلئے کسٹمز اور سی ایاے طیاروں کو نیلام کرنا چاہتے ہیں۔
ذرائع کے مطابق شاہین ایئرلائن پر کسٹمز اور سی اے اے کے2ارب روپے سے زائد کے واجبات ہیں جبکہ شاہین ایئرلائن کے مالکان واجبات ادا کیے بغیر ملک سے باہر چلے گئے ہیں۔
