دنیا کی کسی بھی زبان میں خبریں پڑھنے کے لیے یہاں کلک کریں۔
کرکٹ کے عالمی مقابلے بھارت میں جاری ہیں، آج کے میچ میں آسٹریلیا اور نیدرلینڈ کی ٹیمیں آمنے سامنے ہیں۔
آج کے میچ میں آسٹریلیا نے نیدرلینڈ کے خلاف ٹاس جیت کر پہلے بیٹنگ کا فیصلہ کیا ہے جس کے بعد کھیل جاری ہے۔
آسٹریلیا اور نیدرلینڈ کی ٹیموں کے درمیان میچ ارجن جیٹلی کرکٹ اسٹیڈیم میں ہو رہا ہے۔
میگا ایونٹ میں آسٹریلیا کی ٹیم نے اب تک 4 میچز کھیلے ہیں جن میں سے 2 میں کامیابی حاصل کی اور 2 میں ناکامی کا سامنا کرنا پڑا۔ جبکہ نیدر لینڈ کی ٹیم نے 4 میچز کھیل کر صرف ایک میں کامیابی حاصل کی ہے۔
بھارت نے ورلڈ کپ مقابلوں میں 20 برس بعد نیوزی لینڈ کو شکست دے کر سیمی فائنل کے لئے اپنی پوزیشن پکی کرلی ۔
نیوزی لینڈ نے پہلے بیٹنگ کرتے ہوئے بھارت کو274 رنز کاہدف دیا تھا جسے بھارت نے ویراٹ کوہلی کی شاندار اننگزکی بدولت آسانی کے ساتھ پورا کرلیا۔
بھارت کی طرف سے ویرات کوہلی نے95رنز کی شاندار اننگز کھیلی تاہم وہ محض 5 رنز کے فرق سے اپنی 49 ویں سنچری نہ بناسکے۔ روہت شرما نے 46، شبمن گل نے 26، شہریاس نے33 اور کے ایل راہول نے27 رنز بنائے۔ بھارت نے 4 وکٹوں سے ایونٹ کی پانچویں جیت اپنے نام کرتے ہوئے اب تک ناقابل شکست رہنے کااعزاز برقراررکھا اور نیوزی لینڈ کو ایونٹ میں پہلی شکست کا سامنا کرنا پڑا۔
بھارتی ریاست ہماچل پردیش کے دھرم شالا کرکٹ سٹیڈیم میں کھیلے جانے والے میچ میں بھارتی کپتان روہت شرما نے ٹاس جیت کر مہمان ٹیم کو پہلے بیٹنگ کی دعوت دی۔
نیوزی لینڈ کی ٹیم اچھی پارٹنر شپ اور ڈیرل مچل کی سنچری کے باوجود بڑا سکور کرنے میں ناکام رہی ۔
بھارتی بولرز جسپریت بمرا، سراج اور محمد شامی کی عمدہ بولنگ کے سامنے کیویزابتدا میں مشکلات کاشکاررہے اور 19 کے سکور پر ہی ان کی دووکٹیں گر گئی تھیں تاہم دونوں اوپنرز کے جلد آئوٹ ہونے کے باوجود رچن رویندرا اور مچل کی شراکت نے اپنی ٹیم کو مشکلات سے نکال کر ایک اچھے سکور کی راہ پر گامزن کردیا۔
نیوزی لینڈ کی تیسری وکٹ 178 رنز پر گری جب بھارتی نژاد کیوی بلے باز رچن رویندرا75 رنز بنا کرآئوٹ ہوئے۔
ڈیرل مچل نے 130رنز کی شادار اننگز کھیلی جس میں 5 چھکے اور9 چوکے شامل تھے تاہم بڑی شراکت اور ایک سنچری کے باوجود بعد میں آنے والے بلے باز مخالف ٹیم کو ایک بڑا ہدف دینے میں ناکام رہے۔
صرف فلپ نے 23 رنز بنائے جبکہ دیگر بلے بازوں میں سے کوئی بھی ڈبل فگر میں بھی داخل نہ ہوسکا۔
بھارت کی طرف محمد شامی نے پانچ کھلاڑیوں کو آئوٹ کیا، آخری 6 اوورز میں نیوزی لینڈ کی 6 وکٹیں گریں،محمد سراج، جسپریت بمرا نے ایک وکٹ حاصل کی جبکہ کلدیب یادیو نے دو کھلاڑیوں کوآئوٹ کیا۔
نیوزی لینڈ کی ٹیم ورلڈ کپ مقابلوں میں بھارت کے خلاف شاندار ریکارڈ رکھتی تھی ،گزشتہ 20سال میں بھارت نیوزی لینڈ کے خلاف فتح حاصل نہیں کرسکا۔ 2019 کے ورلڈ کپ میں بھی نیوزی لینڈ نے ہی بھارت کو شکست دے کر فائنل کی دوڑ سے آئوٹ کیا تھا۔
ورلڈ کپ میں دونوں ٹیمیں گزشتہ چار بار جب بھی آمنے سامنے آئیں تو جیت نیوزی لینڈ کے نام رہی۔ ہندوستان نے 2003 کے ورلڈکپ میں آخری بار کیویز کو شکست دی تھی۔1992 سے ورلڈ کپ مقابلوں میں بھارت نیوزی لینڈ سے صرف ایک بار جیت سکا۔
ورلڈ کپ مقابلوں میں بھارت کے خلاف شاندار ریکارڈ رکھنے والی نیوزی لینڈ کی ٹیم آج ایک اور فتح کے لئے پرعزم ہے جبکہ بھارت 20 سال میں پہلی فتح کی تلاش میں ہے۔
بھارت میں جاری آئی سی سی ورلڈ کپ 2023 کے 21ویں میچ میں میگاایونٹ کی اب تک ناقابل شکست رہنے والی دونوں ٹیمیں بھارت اور نیوزی لینڈ مدمقابل ہیں۔
نیوزی لینڈ کی ٹیم ورلڈ کپ مقابلوں میں بھارت کے خلاف شاندار ریکارڈ رکھتی ہے اور گزشتہ سال میں بھارت نیوزی لینڈ کے خلاف فتح حاصل نہیں کرسکا۔ 2019 کے ورلڈ کپ میں بھی نیوزی لینڈ نے ہی بھارت کو شکست دے کر فائنل کی دوڑ سے آئوٹ کیا تھا۔
ورلڈ کپ میں دونوں ٹیمیں گزشتہ چار بار جب بھی آمنے سامنے آئیں تو جیت نیوزی لینڈ کے نام رہی۔ ہندوستان نے 2003 کے ورلڈکپ میں آخری بار کیویز کو شکست دی تھی۔1992 سے ورلڈ کپ مقابلوں میں بھارت نیوزی لینڈ سے صرف ایک بار جیت سکا۔
ویرات کوہلی نے میچ سے قبل اسٹار سپورٹس کوایک انٹرویو میں کہا تھا کہ نیوزی لینڈایک بہت ہی پروفیشنل سائیڈ ہے ان کا کرکٹ کھیلنے کا بہت ہی منظم انداز ہے یہی ان کی مسلسل کامیابی کی وجہ ہے۔ وہ بہت مستقل مزاج ہیں۔
نیوزی لینڈ نے دفاعی عالمی چیمپئن انگلینڈ کو شکست دے کر بھارت میں اپنی مہم کا آغاز کیا۔ اس کے بعد کیویز نے نیدرلینڈز (99 رنز سے) اور بنگلہ دیش (آٹھ وکٹوں سے) کو شکست دی اور افغانستان کو 149 رنز سے شکست دی۔ دوسری جانب بھارت نے پانچ مرتبہ کے چیمپئن آسٹریلیا کو 6 وکٹوں سے، روایتی حریف پاکستان کو 7 وکٹوں سے،افغانستان کو 69 رنز اور بنگلہ دیش کو سات وکٹوں سے شکست دی ۔
آئی سی سی کرکٹ ورلڈ کپ کے 19ویں میچ میں سری لنکا نے نیدر لینڈ کو شکست دے کر ایونٹ میں پہلی کامیابی اپنے نام کر لی تاہم پہلی کامیابی کے باوجود سری لنکا کی پوائنٹس ٹیبل پر نویں پوزیشن ہے۔
سری لنکا اور نیدر لینڈ کا میچ بھارتی شہر لکھنئو کے اکانا سپورٹس سٹی میں کھیلا گیا۔ نیدر لینڈ نے ٹاس جیت کر پہلے بیٹنگ کرتے ہوئے سری لنکا کو جیت کے لیے 263 رنز کا ٹارگٹ دیا جسے سری لنکا نے 49 ویں اوور میں 5 وکٹوں کے نقصان پر پورا کرلیا۔
نیدر لینڈ کی پوری ٹیم 49.4 اوورز میں 262 رنز بنا کر آئوٹ ہو گئی، ہدف ک تعاقب میں سری لنکا کی پہلی تین وکٹیں گرنے کے بعد ٹیم قدرے دبائو میں آگئی تاہم اس کے بعدسدیرا سمارا وکرما کی91 رنز کی شاندار اننگز کی بدولت سری لنکن ٹیم میچ جیتنے میں کامیاب ہوئی۔اسالانکا نے بھی44 رنز بنائے جبکہ اوپنرنیسانکا54 رنز بنا کرآئوٹ ہوئے۔ اختتامی اوورز میں ڈی سلوا نے بھی 30 رنز کی عمدہ اننگز کھیلی اور اپنی ٹیم کی فتح میں اہم کردار ادا کیا۔
یہ ایونٹ میں سری لنکا کی پہلی فتح ہے اس سے قبل سری لنکن ٹیم اپنے تینوں میچز میں شکست سے دوچار ہوئی تھی۔ سری لنکن ٹیم اب تک ٹورنامنٹ میں چار میچز کھیل چکی ہے جن میں سے صرف ایک میچ جیت سکی جبکہ نیدر لینڈ کی ٹیم بھی چار میچز میں سے صرف ایک میچ ہی جیت سکی ہے جب انہوں نے جنوبی افریقہ کو شکست دی تھی۔
کینیڈا کے وزیراعظم جسٹن ٹروڈو نے کہا ہے کہ بھارت کی جانب سے لاکھوں افراد کی زندگی مشکل بنائی جا رہی ہے۔
بھارت سے اپنے 41 سفارتکاروں کو واپس بلانے کے بعد اپنے ایک بیان میں جسٹن ٹروڈو نے کہا کہ بھارتی حکومت کی جانب سے کینیڈین سفارتکاروں کے خلاف کریک ڈائون سے لاکھوں افراد کی زندگی مشکل ہو جائے گی۔
غیرملکی میڈیا کا کہنا ہے کہ بھارت نے کینیڈا کو دھمکی دی تھی کہ یکطرفہ طور پر اس کے سفارتکاروں کی حیثیت کو منسوخ کر دیا جائے گا، جس کے بعد کینیڈین حکومت نے اپنے سفارتکار واپس بلا لیے تھے۔
واضح رہے کہ کینیڈا اور بھارت کے درمیان تنازع سکھ رہنما ہردیپ سنگھ نجر کے قتل کے بعد شروع ہوا تھا۔
کینیڈین وزیراعظم نے سکھ رہنما کے قتل کا الزام براہِ راست بھارتی خفیہ ایجنسی را پر عائد کیا تھا۔
بھارت میں جاری کرکٹ ورلڈ کپ کے 18 ویں میچ میں آسٹریلیا نے پاکستان کو62 رنز سے شکست دے کرچوتھی پوزیشن بھی چھین لی۔368 رنز کے ہدف کے تعاقب میں پاکستان کی پوری ٹیم 305 رنز بنا کرآئوٹ ہوگئی،،163 رنز بنانے والے ڈیوڈ وارنر میچ کے بہترین کھلاڑی قرار پائے۔ یہ اس ایونٹ میں پاکستان کی مسلسل دوسری شکست ہے جس کے بعد پاکستان ٹاپ فور ٹیموں سے ڈراپ ہو کر پانچویں نمبر پرآگیا ہے ۔
تاریخی ہدف کے تعاقب میں پاکستان نے عمدہ آغاز کیا لیکن اوپنرز کے آئوٹ ہونے کے بعد کوئی بھی بلے باز ذمہ داری کامظاہرہ نہ کرسکا۔ امام الحق70 اور عبداللہ شفیق64 رنز بنا کرآئوٹ ہوئے۔پاکستان کی پہلی وکٹ 134 کے سکور پرگری جب عبداللہ شفیق کیچ آئوٹ ہوگئے۔154 کے سکور پرامام الحق بھی ساتھ چھوڑ گئے۔175 کے سکور پر کپتان بابراعظم بھی 18 رنز بنانے کے بعد آئوٹ ہوگئے۔ محمد رضوان 46 اور سعود شکیل30 اورافتخار احمد26 رنز بناسکے، محمد نواز نے14 اور شاہین آفریدی نے 10 سکور بنائے، پاکستان کی پوری ٹیم 46 ویں اوور میں ہی آئوٹ ہوگئی۔
اس سے قبل آسٹریلیا نے پہلے بیٹنگ کرتے ہوئے 367 رنز بنائے تھے ۔ آسٹریلوی اوپنر ڈیوڈ وارنر نے چانس ملنے کے بعد163 رنز کی شاندار اننگز کھیلی۔ ڈیوڈ وارنر کا جب اسامہ میر نے شااہین آفریدی کی گیند پرکیچ ڈراپ کیا تو آسٹریلیا کا مجموعی سکور35 سے بھی کم تھا۔
پاکستان کی طرف سے حارث رئوف سب سے مہنگے بولر ثابت ہوئے اور انہوں نے اپنے پہلے ہی اوور میں24 رنز دیئے جبکہ ابتدائی تین اوورز میں حارث رئوف کو47 رنز پڑ گئے۔
31 ویں اوورز میں آسٹریلیا کے دونوں اوپنرز نے اپنی سنچریاں مکمل کیں۔ ڈیوڈ وارنر نے جب 85 گیندوں پر اپنی سنچری مکمل کی تواس میں7 چوکے اور 6 شاندار چھکے شامل تھے جبکہ مچل مارش نے 101 گیندوں پر سنچری مکمل کی جس میں 10 چوکے اور 6 شاندار چھکے شامل تھے۔
34ویں اوور میں پاکستان کو259 رنز پہلی کامیابی ملی جب شاہین آفریدی کی گیند پرمچل مارش اسامہ میر کے ہاتھوں کیچ آئوٹ ہوئے،مچل مارش نے 108 گیندوں پر121 رنز بنائے جن میں9 چھکے اور 10چوکے شامل تھے، اگلی ہی گیند پر شاہین آفریدی نے میکسویل کو بھی کپتان بابراعظم کے ہاتھوں کیچ آئوٹ کرادیا۔ میکسویل کے بعد جب سمتھ بلے بازی کے لئے آئے تو کپتان بابراعظم نے اسامہ میر کی گیند پر ان کا آسان کیچ ڈراپ کردیا۔ آسٹریلیانے 300 رنز صرف 40 اوورز میں ہی مکمل کرلئے تھے اور اس کے صرف تین کھلاڑی آئوٹ ہوئے تھے۔ 43 ویں اوور میں حارث رئوف نے ڈیوڈ وارنر کوشاداب خان کے ہاتھوں کیچ آئوٹ کرایا تو آسٹریلیا کا سکورچار وکٹوں کے نقصان پر325 رنز ہو چکا تھا۔ ڈیوڈ وارنر نے 9 چھکوں اور 14 چوکوں کی مدد سے 124 گیندوں پر 163 رنز بنائے، دونوں اوپنرز کے آئوٹ ہونے کے بعد پاکستانی بولرز نے بعد میں آنے والے بلے بازوں کو کھل کر نہ کھیلنے دیا اور367 رنز بنا کرآئوٹ ہوگئی، پاکستان کی طرف سے سب سے کامیاب بولر شاہین آفریدی رہے جنہوں نے دس اوورز میں 54 رنز دے کر5 وکٹیں حاصل کیں۔
حسن علی نے 8 اوورز میں57 رنز دیئے اور کوئی وکٹ نہ لے سکے،افتخار احمد نے 8 اوورز میں37 رنز دیئے تاہم کوئی وکٹ نہ لے سکے۔ حارث رئوف نے 8 اوورز میں83 رنز دے کر تین وکٹیں حاصل کیں، اسامہ میر نے 9 اوورز میں82 رنز دیئے اور ایک وکٹ حاصل کرسکے، محمد نواز نے 7 اوورز میں43 رنز دیئے اور کوئی وکٹ نہ لے سکے۔
ورلڈ کپ میں آسٹریلیا کے خلاف اہم میچ میں ڈیوڈ وارنر کا کیچ ڈراپ کرنا پاکستان کو مہنگا پڑگیا۔
فاسٹ بولر شاہین آفریدی کی گیند پر جب اسامہ میر نے ڈیوڈ وارنر کا آسان کیچ ڈراپ کیا توآسٹریلیا کا اسکور35 سے بھی کم تھا۔ چانس ملنے کے بعد ڈیوڈ وارنر نے حارث رئوف، افتخار احمد ، اسامہ میر اور محمد نواز کے خلاف ایسا جارحانہ کھیل پیش کیا کہ پاکستانی بولرز لائن ولینتھ ہی بھول گئے۔ڈیوڈ وارنر نے 7 چوکوں اور6 شاندار چھکوں کی مدد سے سنچری سکور کی اور مچل مارش کے ساتھ مل کر ورلڈ کپ کی سب سے بڑی اوپننگ پارٹنر شپ بھی قائم کی۔ ڈیوڈ وارنر نے سنچری کے لئے 85 گیندوں کاسامنا کیا۔ ڈیوڈ وارنر کو سنچری مکمل کرنے کے بعد دوسرا چانس ملا جب اسامہ میر کی گیند پر عبداللہ شفیق نے کیچ ڈراپ کردیا۔
ڈیوڈ وارنر کے ساتھ مچل مارش نے بھی پاکستانی بولرز کے خلاف کھل کر وکٹ کے چاروں اطراف شارٹس لگائیں، مچل مارش نے بھی سنچری سکور کی جب ان کی سنچری مکمل ہوئی تو وہ 10 چوکے اور 6 شاندار چھکے لگاچکے تھے ۔
کینیڈا میں سکھ رہنما ہردیپ سنگھ کے قتل کے بعد کینیڈا اور بھارت کے درمیان پیدا ہونے والی کشیدگی ختم نہ ہو سکی۔
کینیڈا نے اپنے 62 میں سے 41 سفارتکار بھارت سے واپس بلانے کا اعلان کر دیا ہے۔
کینیڈا کی وزیر خارجہ میلان جولی کے مطابق بھارتی حکام نے 20 اکتوبر کو 21 کینیڈین سفارتکاروں اور ان کے اہل خانہ کے سفارتی استثنیٰ ختم ہونے سے متعلق آگاہ کیا ہے۔
یاد رہے کہ ہردیپ سنگھ کے کینیڈا میں قتل ہونے کے بعد کینیڈین وزیراعظم نے پارلیمنٹ سے خطاب میں سکھ رہنما کے قتل کی ذمہ داری بھارتی خفیہ ایجنسی را پر عائد کی تھی۔
کینیڈا نے سکھ رہنما کے قتل کا الزام را پر عائد کرنے کے بعد بھارتی سفارتکار کو ملک چھوڑنے حکم دیا تھا جس کے جواب میں بھارت نے بھی کینیڈا کے سفارتکار کو ملک سے نکال دیا تھا۔
بھارت جھوٹی خبریں، من گھڑت پروپیگنڈا اور افواہیں پھیلانے میں دنیا میں پہلے نمبر پر آگیا ہے، دنیا میں 18 فیصد جھوٹی خبریں بھارت سے پھیلائی جاتی ہیں۔
امریکی آزاد اشاعتی کمپنی ’سیج پبلی کیشنز‘ نے اپنی رپورٹ میں بتایا ہے کہ حالیہ اسرائیل فلسطین تنازعے میں بھارت کی طرف سے اسرائیل کی حمایت میں حیران کن پروپیگنڈا کیا گیا، روس یوکرین جنگ میں بھارت نے ایک ویڈیو گیم کلپ دکھا کر جھوٹا پروپیگینڈا کیا، 28 جون کو فرانس میں ہونے والے حادثے کا الزام بھی بھارتی میڈیا نے مسلمانوں پر لگایا۔
اشاعتی ادارے کے مطابق جھوٹی خبریں، من گھڑت پروپیگنڈا اور افواہیں پھیلانے میں ہندوستان پہلے نمبر پر ہے، اور دنیا میں 18 فیصد جھوٹی خبریں بھارت سے پھیلائی جاتی ہیں۔
رپورٹ میں بتایا گیا ہے کہ حالیہ اسرائیل فلسطین تنازعے میں بھارت نے اسرائیل کی حمایت میں حیران کن پروپیگنڈا کیا گیا، اور حماس پر بچوں کو اغواء کرنا، سر قلم کرنا، لاشوں کو جلانے کو بھارتی اکاؤنٹس سے پھیلایا گیا۔
کرکٹ کا عالمی مقابلہ بھارت میں جاری ہے، ایونٹ کے 17ویں میچ میں آج بھارت اور بنگلا دیش کی ٹیمیں مد مقابل ہیں۔
بنگلا دیش نے بھارت کے خلاف ٹاس جیت کر پہلے بیٹنگ کا فیصلہ کیا ہے جس کے بعد کھیل جاری ہے۔
کرکٹ ورلڈ کپ کا 17واں میچ بنگلا دیش اور بھارت کی کرکٹ ٹیموں کے درمیان بھارتی شہر پونے میں مہاراشٹرا کرکٹ ایسوسی ایشن کرکٹ سٹیڈیم میں ہو رہا ہے۔
بھارت کی کرکٹ ٹیم نے اب تک 3 میچز کھیلے ہیں اور ناقابل شکست ہے جبکہ بنگلا دیش کی ٹیم نے 3 میچز کھیل کر ایک میں کامیابی حاصل کی ہے اور 2 میچوں میں اسے شکست کا سامنا کرنا پڑا ہے۔
آج کے میچ کے لیے بھارتی اسکواڈ میں روہت شرما، شبمن گل، ویرات کوہلی، شریاس، کے ایل راہول، ہاردک پانڈیا، جدیجا، شردل، بمراہ، کلدیپ یادیو، محمد سراج شامل ہیں۔
بنگلا دیش کے اسکواڈ میں نجم الحسین، لٹن داس، مہدی حسن مرزا، مشفیق الرحیم، توحید، محمداللہ، نسوم احمد، حسن محمود، مستفیظ الرحمان، شریف الاسلام شامل ہیں۔
سری لنکا کو 5 وکٹوں سے شکست کے بعد آسٹریلیا کو ورلڈ کپ میں پہلی کامیابی مل گئی۔
لکھنئو اسٹیڈیم میں کھیلے گئے ورلڈ کپ کے 14 ویں میچ میں سری لنکا نے پہلے کھیلتے ہوئے 209 رنز بنائے ، آسٹریلیا نے پانچ وکٹوں ۔کے نقصان پر 35.2 اوورز میں ہدف پورا کر لیا۔
سری لنکن اوپنرز کی جانب سے 125 رنز کا شاندار آغاز فراہم کرنے کے باوجود سری لنکا کی پوری ٹیم 43.3 اوورز میں 209 رنز پر آؤٹ ہوگئی۔ سری لنکا کے 8 بلے باز ڈبل فگرز میں بھی داخل نہیں ہوسکے۔
ہدف کے تعاقب میں آسٹریلیا کا آغاز مایوس کن رہا اور چوتھے اوور میں ہی 24 رنز کے مجموعی اسکور پر دو وکٹیں گر گئیں،چوتھے اوور میں 24 رنز کے مجموعی اسکور پر دلشان مدوشناکا نے آسٹریلیا کے دو بلے بازوں کو پویلین کی راہ دکھا دی۔ ڈیوڈ وارنر 11 اور اسٹیون اسمتھ صفر پر آؤٹ ہوئے۔
پندرہویں اوور میں 81 کے مجموعی اسکور پر مچل مارش 52 رنز بناکر رن آؤٹ ہوگئے۔ 29 ویں اوور میں 158 کے مجموعی اسکور پر مارنوس لبوشین 40 رنز بنا کر مادھو شناکا کی گیند پر کیچ آؤٹ ہو گئے۔ 34 ویں اوور میں جوش انگلس 58 رنز بناکر دونیتھ ویلالگے کی گیند پر آؤٹ ہوئے، چھٹی وکٹ کی پارٹنر شپ نے آسٹریلیا کو کامیابی دلوا دی۔
آسٹریلیا کے ایڈم زمپا نے 4، مچل اسٹارک اور پیٹ کمنز نے 2، 2 جبکہ گلین میکسویل نے ایک وکٹ حاصل کی۔
افغانستان نے کرکٹ ورلڈ کپ میں بڑا اپ سیٹ کرتے ہوئے دفاعی چیمپئن انگلینڈ کو 69 رنز سےشکست دے دی اورجیت کا ایسا جشن منایا کہ چند منٹوں میں جشن کی تصاویر اور ویڈیوز دنیا بھر میں وائرل ہوگئیں، آج ہونے والے میچ میں افغانستان نے انگلینڈ کو جیت کے لئے 285 رنز کا ہدف دیا تھاجس کے جواب میں انگلینڈ کی ٹیم 215 رنز پر ڈھیر ہوگئی۔
افغانستان کے خلاف انگلینڈ کی بیٹنگ لائن بری طرح ناکام ہوئی، انگلینڈ کی طرف سے ہیری بروک 66 رنز کے ساتھ نمایاں رہے۔ افغان بائولرز نے انگلینڈ کو شروع سے ہی دبائو میں رکھا،3 کے سکور پر ہی جونی بیرسٹو فضل حق فاروقی کی گیند پر ایل بی ڈبلیو آئوٹ ہوگئے،33 کے سکور پر مجیب الرحمان نے جوئے روٹ کو بولڈ کردیا۔68 کے سکور پر ڈیوڈ ملان بھی 32 رنز بناکرآئوٹ ہوگئے،91 کے سکور پر جوز بٹلر کو نوین الحق نے بولڈ کردیا،بٹلر صرف9 رنز بناسکے،117 کے سکور پر راشد خان نے لیونگسٹن کو راشد خان نے آئوٹ کیا تو انگلینڈ کی آدھی ٹیم پویلین جا چکی تھی۔
138 کے سکور پرمحمد نبی نے اپنی ٹیم کو چھٹی وکٹ بھی دلوادی،160 رنز پر کرس ووکرز کو مجیب نے بولڈ کردیا،سکور 169 پر پہنچا تو ہیری بروک بھی 60 رنز بنانے کے بعد ٹیم کاساتھ چھوڑ گئے، عادل رشید بھی 20 رنز بنانے کے بعد محمد نبی کو وکٹ دے بیٹھے، مارک ووڈ کو راشد خان نے بولڈ کیا تو انگلینڈ کی اننگز215 رنز پر تمام ہوچکی تھی۔
یہ افغانستان کی ورلڈکپ کی تاریخ میں دوسری کامیابی ہے، اس سے قبل افغانستان نے ورلڈ کپ میں 17 میچز کھیلے تھے جن میں سے 16 میں شکست ہوئی اور صرف ایک میں کامیابی ملی تھی۔
آج کے میچ میں افغانستان کی طرف سے اوپنر رحمان اللہ گرباز نے 80 رنز کی شاندار اننگز کھیلی جبکہ ابراہیم زدران نے 28 رنز بنائے، اکرام الخیل نے 58 رنز، مجیب الرحمان 28 رنز اور راشد خان 23 رنز بناکرٹیم کو ایک اچھا سکور بنانے میں مدد فراہم کی۔
انگلینڈ نے افغانستان کے خلاف ٹاس جیت کر پہلے فیلڈنگ کا فیصلہ کیاتھا۔
