آسٹریلیا نے نیدر لینڈ کو ایک روزہ کرکٹ کی تاریخ میں سب سے بدترین شکست سے دوچار کردیا۔

بھارت میں  جاری کرکٹ ورلڈ کپ کے 24 ویں میچ میں آسٹریلیا نے ٹاس جیت کر پہلے بیٹنگ کرتے ہوئے نیدر لینڈ کو 400 رنز کا پہاڑ جیسا ہدف دیا جس کے تعاقب میں نیدر لینڈ کی پوری ٹیم 90 رنز بنا کرآئوٹ ہوگئی۔

 آسٹریلیا کی طرف سے ڈیوڈ وارنر اور گلین میکسویل نے شاندار سنچریاں سکورکیں، میکسویل نے 44 گیندوں پر9 چوکوں اور8 چھکوں کی مدد سے106 رنز بنائے جبکہ ڈیوڈ وارنر93 گیندوں پر11 چوکوں اور3 چھکوں کی مدد سے104 رنز بنائے۔  سٹیون سمتھ نے 71 اورمارنس لیبوشگن نے بھی 62 رنز کی عمدہ اننگز کھیلی ۔

اس میچ میں کئی ریکارڈ بھی جن میں کسی بھی ایک روزہ کرکٹ میچ میں سب سے بڑے مارجن 309 رنزسے شکست کا ریکارڈ شامل ہے۔

اس میچ میں نیدر لینڈ کی طرف سے باس ڈی لیڈے ایک روزہ کرکٹ کے  سب سے مہنگے بولرثابت ہوئے جنہوں نے 10 اوور ز میں 115 رنز دیئے، اس سے قبل کسی ایک بولر کو سب سے زیادہ 108 رنز پڑے تھے ۔

بھارت میں جاری کرکٹ ورلڈ کپ کے  18 ویں میچ میں آسٹریلیا نے پاکستان کو62 رنز سے شکست دے کرچوتھی پوزیشن بھی چھین لی۔368 رنز کے ہدف کے تعاقب میں پاکستان کی پوری ٹیم 305 رنز بنا کرآئوٹ ہوگئی،،163 رنز بنانے والے ڈیوڈ وارنر میچ کے بہترین کھلاڑی قرار پائے۔  یہ اس ایونٹ میں پاکستان کی مسلسل دوسری شکست ہے جس کے بعد پاکستان ٹاپ فور ٹیموں سے ڈراپ ہو کر پانچویں نمبر پرآگیا ہے ۔

تاریخی ہدف کے  تعاقب میں پاکستان نے عمدہ آغاز کیا لیکن اوپنرز کے آئوٹ ہونے کے بعد کوئی بھی بلے باز ذمہ داری کامظاہرہ  نہ کرسکا۔ امام الحق70 اور عبداللہ شفیق64 رنز بنا کرآئوٹ ہوئے۔پاکستان کی پہلی وکٹ 134 کے سکور پرگری جب عبداللہ شفیق کیچ آئوٹ ہوگئے۔154 کے سکور پرامام الحق بھی ساتھ چھوڑ گئے۔175 کے سکور پر کپتان بابراعظم بھی 18 رنز بنانے کے بعد آئوٹ ہوگئے۔ محمد رضوان 46 اور سعود شکیل30 اورافتخار احمد26 رنز بناسکے، محمد نواز نے14 اور شاہین آفریدی نے 10 سکور بنائے، پاکستان کی پوری ٹیم 46 ویں اوور میں ہی آئوٹ ہوگئی۔

اس سے قبل آسٹریلیا نے پہلے بیٹنگ کرتے ہوئے 367 رنز بنائے تھے ۔ آسٹریلوی اوپنر ڈیوڈ وارنر نے چانس ملنے کے بعد163 رنز کی شاندار اننگز کھیلی۔ ڈیوڈ وارنر کا جب اسامہ میر نے  شااہین آفریدی کی گیند پرکیچ ڈراپ کیا تو آسٹریلیا کا مجموعی سکور35 سے بھی کم تھا۔

 پاکستان کی طرف سے حارث رئوف سب سے مہنگے بولر ثابت ہوئے اور انہوں نے اپنے پہلے ہی اوور میں24 رنز دیئے جبکہ ابتدائی تین اوورز میں حارث رئوف کو47 رنز پڑ گئے۔

31 ویں اوورز میں آسٹریلیا کے دونوں اوپنرز نے اپنی سنچریاں مکمل کیں۔ ڈیوڈ وارنر نے جب 85 گیندوں پر اپنی سنچری مکمل کی تواس  میں7 چوکے اور 6 شاندار چھکے شامل تھے جبکہ مچل مارش نے 101 گیندوں پر سنچری مکمل کی جس میں 10 چوکے اور 6 شاندار چھکے شامل تھے۔

34ویں اوور میں پاکستان کو259 رنز پہلی کامیابی ملی جب شاہین آفریدی کی گیند پرمچل مارش اسامہ میر کے ہاتھوں کیچ آئوٹ ہوئے،مچل مارش نے 108 گیندوں پر121 رنز بنائے جن میں9 چھکے اور 10چوکے شامل تھے، اگلی ہی گیند پر شاہین آفریدی نے میکسویل کو بھی کپتان بابراعظم کے ہاتھوں کیچ آئوٹ کرادیا۔ میکسویل کے بعد جب سمتھ بلے بازی کے لئے آئے تو کپتان بابراعظم نے اسامہ میر کی گیند پر ان کا آسان کیچ ڈراپ کردیا۔ آسٹریلیانے 300 رنز صرف 40 اوورز میں ہی مکمل کرلئے تھے  اور اس کے صرف تین کھلاڑی آئوٹ ہوئے تھے۔ 43 ویں اوور میں حارث رئوف نے ڈیوڈ وارنر کوشاداب خان کے ہاتھوں کیچ آئوٹ کرایا تو آسٹریلیا کا سکورچار وکٹوں کے نقصان پر325 رنز ہو چکا تھا۔ ڈیوڈ وارنر نے 9 چھکوں اور 14 چوکوں کی مدد سے 124 گیندوں پر 163 رنز بنائے، دونوں اوپنرز کے آئوٹ ہونے کے بعد پاکستانی بولرز نے بعد میں آنے والے بلے بازوں کو کھل کر نہ کھیلنے دیا اور367 رنز بنا کرآئوٹ ہوگئی، پاکستان کی طرف سے سب سے کامیاب بولر شاہین آفریدی رہے جنہوں نے دس اوورز میں 54 رنز دے کر5 وکٹیں حاصل کیں۔

حسن علی نے 8 اوورز میں57 رنز دیئے اور کوئی وکٹ نہ لے سکے،افتخار احمد نے 8 اوورز میں37 رنز دیئے تاہم کوئی وکٹ نہ لے سکے۔ حارث رئوف نے 8 اوورز میں83 رنز دے کر تین وکٹیں حاصل کیں، اسامہ میر نے 9 اوورز میں82 رنز دیئے اور ایک وکٹ حاصل کرسکے، محمد نواز نے 7 اوورز میں43 رنز دیئے اور کوئی وکٹ نہ لے سکے۔

بھارت میں جاری آئی سی سی ون ڈے ورلڈ کپ میں آسٹریلیا کے خلاف میچ میں پاکستان اپنے اہم کھلاڑیوں سے محروم رہے گا۔
بھارتی شہر بنگلورو میں ہونے والے میچ سے قبل پاکستانی ٹیم کے کیمپ میں وائرل انفیکشن کی وجہ سے چھ کھلاڑی متاثر ہوئے تھے
جن میں اوپنر عبداللہ شفیق، فخر زمان، محمد حارث، شاہین آفریدی، سلمان علی آغا شامل ہیں۔
عبداللہ شفیق کو تیز بخار اور فلو کی وجہ سے ہوٹل کے کمرے میں کورنٹائن کردیا گیا تھا ۔
پاکستان کرکٹ بورڈ نے کھلاڑیوں کے بیمار ہونے کی تصدیق کرتے ہوئے امید ظاہر کی تھی کہ آسٹریلیا کے خلاف میچ سے قبل تمام کھلاڑی صحت یاب ہوجائیں گے تاہم اب یہ اطلاعات آئی ہیں کہ
پاکستان ٹیم کے اوپنر فخر زمان آسٹریلیا کے خلاف میچ کیلئے دستیاب نہیں ہوں گے۔ بتایا جارہاہے کہ فخر زمان آئندہ ہفتے تک فٹ ہوجائیں گے۔ سلمان علی آغا کے بارے میں بتایا گیا ہے کہ وہ تیزی سے صحت یاب ہو رہے ہیں تاہم عبداللہ شفیق اور شاہین آفریدی کے حوالے سے ابھی کوئی حتمی فیصلہ نہیں کیاگیا۔ دوسری طرف سپن بولرشاداب خان کی اگلے میچ میں شمولیت مشکوک ہے ان کی جگہ اسامہ میر کو ٹیم میں شامل کیا جاسکتاہے ۔ شاداب خان ایشیا کپ اور ورلڈ کپ کے دوران ابھی تک خاطر خواہ کارکردگی نہیں دکھا سکے۔