پاکستان کرکٹ ٹیم کے سابق کپتان شاہد آفریدی نے ورلڈ کپ کے دوران قومی ٹیم کی ناقص کارکردگی پر تنقید کی ہے۔

نجی ٹی وی سے گفتگو کرتے ہوئے شاہد آفریدی نے کہا ہے جب کپتان میدان میں کچھ اچھا کرنے کی کوشش کرتا ہے تو پھر کھلاڑی اسے 200 فیصد دیتے ہیں۔

سابق کپتان نے ورلڈ کپ کے دوران قومی ٹیم کی فیلڈنگ پر تنقید کرتے ہوئے کہا کہ کپتان میچ میں متحرک ہو تو دیگر کھلاڑیوں کو شرم آتی ہے کہ ہم بھی ایسا کریں۔

شاہد آفریدی نے ماضی کی مثال دی کہ میں اپنی کپتانی کے دوران جب کھلاڑیوں کی سپورٹ کرتا تھا تو ٹیم چارج ہو جاتی تھی۔

انہوں نے نام لیے بغیر بابر اعظم پر طنز کرتے ہوئے کہا کہ پاکستانی ٹیم کی کپتانی کرنا کوئی مذاق نہیں ہے، اچھا کریں گے تو ہر کوئی تعریف کرے گا لیکن برا کرنے پر تنقید بھی ہوتی ہے۔

راولپنڈی ایکسپریس کے نام سے مشہور قومی کرکٹ ٹیم کے سابق فاسٹ بولر شعیب اختر نے قومی کرکٹ ٹیم اور مینجمنٹ کو شدید تنقید کا نشانہ بنایا ہے۔

سوشل میڈیا پر جاری اپنی ایک ویڈیو میں شعیب اختر نے کہا کہ قومی کرکٹ ٹیم کا آج جو مقام ہے یہ اِس کی اپنی وجہ سے ہے۔

بابر الیون کو ورلڈ کپ میں افغانستان کے ہاتھوں شکست پر شعیب اختر نے ٹیم مینجمنٹ کو کھری کھری سنائی ہیں۔

دوسری جانب بھارتی میڈیا سے گفتگو کرتے ہوئے انہوں نے کہا کہ قومی ٹیم ابھی بھی سنبھل سکتی ہے۔ 1992 میں بھی یہی صورت حال تھی مگر دیکھنا ہو گا کہ بابر اعظم عمران خان بن سکتا ہے یا نہیں۔

پاکستان کرکٹ ٹیم کے آل راؤنڈر افتخار احمد نے کہا ہے کہ ورلڈ کپ کے باقی میچوں میں کامیابی حاصل کر کے سیمی فائنل میں جگہ بنانے کی کوشش کریں گے۔

میڈیا سے گفتگو کرتے ہوئے انہوں نے کہا کہ اس وقت ہماری بولنگ لائن پرفارم نہیں کر پا رہی، ہمیں افغانستان کے خلاف 300 سے زیادہ رنز اسکور کرنے چاہیے تھے۔

انہوں نے کہا کہ اس وقت ہمارے اسپنرز کارکردگی دکھانے میں ناکام ہیں، ہمارے ہاتھ میں صرف کوشش ہے اور چاہتے ہیں کہ ٹیم کو اوپر اٹھائیں۔

افتخار احمد نے کہا کہ کسی بھی ٹیم کو جب مار پڑ رہی ہو تو پھر اس کا مورال ڈائون ہو جاتا ہے۔

کرکٹ ورلڈ کپ کے دوران قومی ٹیم کی ناقص کارکردگی پر جہاں شائقین کرکٹ مایوس ہیں وہیں سابق کرکٹرز کو بھی شدید غصہ ہے۔

قومی کرکٹ ٹیم کے سابق کپتان وسیم اکرم نے ٹیم مینجمنٹ کو آڑے ہاتھوں لیتے ہوئے کھلاڑیوں کی فٹنس پر سوال اٹھا دیا ہے۔

نجی ٹی وی کے پروگرام میں گفتگو کرتے ہوئے سابق کپتان نے کہا کہ افغانستان جیسی ٹیم سے قومی ٹیم کو شکست ہوئی جو باعث شرمندگی ہے۔

انہوں نے کہا کہ ہم تو کب سے ٹی وی اسکرینوں پر کہہ رہے ہیں کہ 2 سال سے کھلاڑیوں کا فٹنس ٹیسٹ کیوں نہیں کیا گیا۔

وسیم اکرم نے کہا کہ اب مجھے کھلاڑیوں کے انفرادی طور پر نام لینے پڑیں گے، جنہیں دیکھ کر لگتا ہے کہ جیسے روزانہ 8،8 کلو کڑاہی کھاتے ہیں۔

سوئنگ کے سلطان نے ناراضی کا اظہار کرتے ہوئے کہا کہ آخر کھلاڑیوں کے لیے کوئی تو اصول ہونے چاہئیں۔

قومی کرکٹ ٹیم کے فاسٹ بولر شاہین شاہ آفریدی نے کہا ہے کہ ہم ورلڈ کپ جیت کر تاریخ رقم کرنے کے لیے تیار ہیں۔

پی سی بی ڈیجیٹل سے بات کرتے ہوئے شاہین شاہ آفریدی نے کہا کہ آخری دومیچوں میں ہم نے جو کچھ سیکھا اس کی بنیاد پر آگے ہمیں مدد ملے گی، ہم بے چین ہیں کہ شائقین کی توقعات پر پورا اتریں۔

ان کا کہنا تھا کہ ہمارے لیے بہت اہم ہے کہ آنے والے دومیچوں میں کامیابی حاصل کریں، ہمیں افغانستان کے خلاف میچ میں بھرپور مہارت دکھانا ہو گی کیوں کہ وہ انگلینڈ کو ہرا چکے ہیں۔

فاسٹ بولر نے کہا کہ آسٹریلیا کے خلاف میچ کے لیے ذہنی طور پر تیار تھا، لینتھ کا خیال رکھا جس کا فائدہ ہوا اور پانچ وکٹیں لیں۔

انہوں نے اسامہ میر کا دفاع کرتے ہوئے کہا کہ کیچ کا ڈراپ ہونا کھیل کا حصہ ہوتا ہے۔

پاکستان کرکٹ ٹیم کے سابق فاسٹ بولر عمر گل نے ورلڈ کپ کھیلنے والی قومی ٹیم کو مشورہ دیا ہے کہ غلطیوں سے سیکھ کر آگے بڑھیں، اتنے بڑے ایونٹ میں غلطی کی کوئی گنجائش نہیں ہوتی۔

نجی ٹی وی سے گفتگو کرتے ہوئے عمر گل نے کہاکہ قومی کرکٹ ٹیم بھرپور صلاحیتوں کی مالک ہے، ہماری ٹیم سپر فور میں جگہ بنا سکتی ہے۔

سابق فاسٹ بولر نے کہا کہ نسیم شاہ کے ورلڈ کپ میں نہ ہونے کی وجہ سے ہمارے بولنگ اٹیک پر فرق پڑا ہے۔

ان کا کہنا تھا کہ شاہین آفریدی نے پچھلے میچ میں پانچ وکٹیں لی ہیں جس سے ان کو کافی اعتماد ملا ہو گا، بولرز کو چاہیے کہ پچھلے میچز بھول جائیں اور مستقبل پر نظر رکھیں۔

عمر گل نے کہا کہ بھارتی وکٹیں بولرز کے لیے زیادہ سود مند ثابت نہیں ہوتیں مگر امید ہے کہ ہمیں اگلے میچز میں کوئی مسئلہ نہیں ہو گا۔

قومی کرکٹ ٹیم کے کپتان بابراعظم نے کہا ہے کہ کھلاڑی ٹریننگ سیشن میں جیسا کرتے ہیں ویسے ہی میچ کے دوران کریں، اس میں زیادہ سوچنے کی ضرورت نہیں۔

جمعہ 20 اکتوبر کو آسٹریلیا کے خلاف میچ سے قبل قومی کپتان بابراعظم نے کھلاڑیوں کے ساتھ بات چیت کی ہے۔

بابراعظم نے کھلاڑیوں کو اعتماد دیتے ہوئے کہا کہ مجھے آپ پر 100 فیصد یقین ہے، لہٰذا آپ بھی یقین کے ساتھ میدان میں اتریں۔

قومی کرکٹ ٹیم آج چناسوامی اسٹیڈیم میں ٹریننگ سیشن میں حصہ لے رہی ہے جبکہ کل آسٹریلیا کے ساتھ سامنا ہو گا۔

واضح رہے کہ قومی کرکٹ ٹیم نے اس سے قبل 3 میچ کھیلے ہیں جن میں 2 میچوں میں کامیابی سمیٹی ہے جبکہ ایک میں شکست کا سامنا کرنا پڑا تھا۔