پاکستان تحریک انصاف کی کور کمیٹی کا اجلاس ہوا جس میں انتخابی نشان کے معاملے پر تشویش کا اظہار کیا گیا

کور کمیٹی اجلاس کے اعلامیہ میں کہا گیا ہےکہ پاکستان تحریک انصاف کی کورکمیٹی نے انتخابات سے قبل ملک میں انتخابی ماحول پر تحفظات کا اظہار کیا ہے۔

کور کمیٹی نے الیکشن کمیشن آف پاکستان سے “ بلے“ کے انتخابی نشان کے حوالے سے 3 اگست 2023 کے زبانی اعلان کے بعد تحریری فیصلے کے بلا تاخیر اجراء کا مطالبہ کیا۔ کمیٹی نے مزید کہا کہ تحریک انصاف ملک کی ایک سیاسی قوت ہے جبکہ بلے کا انتخابی نشان عوامی امنگوں کی علامت ہے۔

کور کمیٹی نے کہا کہ تکنیکی وجوہات پر ”بلے“ کے نشان کو بیلٹ پیپر سے ہٹانے یا تحریک انصاف کو اس سے محروم کرنے کی کوشش ووٹ کے حق، انتخاب کی شفافیّت اور جمہوریت کیخلاف سازش ہوگی جسے قوم کسی طور قبول نہیں کرے گی۔

پاکستان تحریک انصاف سے تعلق رکھنے والے خیبر پختونخوا کے سابق وزیر صوبائی وزیر قانون فضل شکور خان اور پی ٹی آئی چارسدہ کے ضلعی صدر عزیز خان کو گرفتار کرلیا گیا۔
سابق وزیر قانون فضل شکور خان اور پی ٹی آئی کے ضلعی صدر کے خلاف 9 مئی واقعات میں ملوث ہونے کا الزام ہے اور دونوں کو مختلف مقدمات کا بھی سامنا ہے ۔
بدھ کے روز ایڈیشنل سیشن جج چارسدہ نصرت ناز کی عدالت میں 9 مئی حملوں سے متعلق مقدمے کی سماعت ہوئی۔
عدالت نے پی ٹی آئی رہنما فضل شکور خان اورضلعی صدر عزیز خان کی ضمانت کی درخواستیں مسترد کردیں جس پر انہیں احاطہ عدالت سے گرفتار کرلیا گیا۔

پاکستان تحریک انصاف (پی ٹی آئی) کے سابق ڈپٹی اسپیکر خیبرپختونخوا اسمبلی محمود جان کو جسمانی ریمانڈ پر پولیس کے حوالے کر دیا گیا۔

سابق ڈپٹی اسپیکر خیبرپختونخوا اسمبلی محمود جان کو قتل کے الزام میں پشاور کی انسداد دہشت گردی عدالت میں پیش کیا گیا، عدالت نے پولیس کی استدعا پر ملزم کا 2 روزہ جسمانی ریمانڈ منظور کر لیا۔

تفتیشی آفیسر نے سماعت کے دوران عدالت کو بتایا کہ محمود جان پر الزام ہے انہوں نے زمین کے تنازع پر ایک شخص کو قتل جبکہ دوسرے کو زخمی کیا ہے۔

تفتیشی آفیسر نے کہا کہ ملزم کے خلاف قتل اور اقدام قتل کے دفعات کے تحت مقدمہ درج ہے اور اب تفتیش کے لیے جسمانی ریمانڈ کی ضرورت ہے۔

عدالت نے تفتیشی آفیسر کی استدعا پر ملزم کا 2 روزہ جسمانی ریمانڈ منظور کر لیا اور پولیس کے حوالے کر دیا۔

پاکستان تحریک انصاف( پی ٹی آئی) نے سیاسی مفاہمت کے لئے رضا مندی ظاہر کردی ۔
پاکستان میں عام انتخابات سے قبل سیاسی جماعتوں کے درمیان مفاہمت کی کوششوں میں تیزی دیکھی جارہی ہے اس حوالے سےنگران وزیر اطلاعات مرتضیٰ سولنگی اور پی ٹی آئی رہنما شفقت محمود کی ملاقات کو ایک بڑی پیشرفت قرار دیا جارہاہے۔
میڈیا رپورٹس کے مطابق منگل کے روز مرتضیٰ سولنگی اور شفقت محمود کی ملاقات میں صاف شفاف انتخابات کے انعقاد، سیاسی جماعتوں کیلئے انتخابات میں شرکت کے مساوی مواقع پر تفصیلی بات چیت کی گئی۔
اس موقع پر شفقت محمود کا کہنا تھا کہ پی ٹی آئی کی شمولیت کے بغیر کوئی بھی قومی مفاہمت ممکن نہیں ۔ پی ٹی آئی کو برابری کی سطح پر سیاسی سرگرمیوں کے مواقع نہیں مل رہے،انتخابی مہم چلانے کی اجازت بھی نہیں جبکہ دیگر جماعتوں کو جلسے اور جلوسوں کی کھلی آزادی ہے ۔ ایسے ماحول میں کرائے گئے انتخابات کی کوئی ساکھ اور قبولیت نہیں ہو گی ۔
ان کا کہنا تھا کہ تحریک انصاف انتخابات کے صاف شفاف انعقاد کیلئے ہر ممکن تعاون کرنے کو تیار ہے۔
واضح رہے کہ شفقت محمود اور نگران وزیراطلاعات سے ملاقات ایک ایسے موقع پر ہوئی ہے جب پی ڈی ایم سربراہ مولانا فضل الرحمان نے
تمام سیاسی جماعتوں سے ایک دوسرے کے لئے گنجائش پیدا کرنے کی تجویز پیش کی ہے ۔
منگل کے روز ہی پاکستان تحریک انصاف کے سیکرٹری اطلاعات رؤف حسن اور بیرسٹر عمیر نیازی نے ایوان صدر میں صدر مملکت عارف علوی کے ساتھ بھی ایک اہم ملاقات کی ہے ۔
ذرائع کے مطابق 40 منٹ تک جاری رہنے والی اس ملاقات میں صدر مملکت سے استدعا کی گئی ہے کہ وہ پی ٹی آئی کو آزادی کے ساتھ انتخابی مہم چلانے کا راستہ ہموار کرنے کے لئے کردار ادا کریں۔

پاکستان تحریک انصاف (پی ٹی آئی) کے وائس چیئرمین شاہ محمود قریشی نے جیل ٹرائل کے خلاف اسلام آباد ہائیکورٹ سے رجوع کر لیا ہے۔

شاہ محمود قریشی نے عدالت العالیہ سے استدعا کی ہے کہ 9 اکتوبر کا ٹرائل کورٹ کا حکم کالعدم قرار دیا جائے، اس کے علاوہ آج ہی درخواست پر سماعت کی استدعا کی گئی ہے۔

درخواست کے مطابق عدالت سے کہا گیا ہے کہ ٹرائل کورٹ کو فرد جرم عائد کرنے سے روکا جائے، شاہ محمود نے موقف اختیار کیا ہے کہ بغیر کسی نوٹیفکیشن میرا جیل ٹرائل کیا جا رہا ہے اس لیے عدالت اوپن ٹرائل کے لیے ہدایت جاری کرے۔

وائس چیئرمین پی ٹی آئی شاہ محمود قریشی کی جانب سے بیرسٹرتیمور ملک اور فائزہ اسد کے ذریعے درخواست دائر کی گئی ہے۔

پاکستان تحریک انصاف (پی ٹی آئی) کے چیئرمین عمران خان کی جانب سے سائفر کیس میں جیل ٹرائل کے خلاف درخواست پر فیصلہ کل سنایا جائے گا۔

اسلام آباد ہائی کورٹ کے رجسٹرار نے کاز لسٹ جاری کر دی ہے جس کے مطابق چیف جسٹس عامر فاروق عمران خان کی جیل ٹرائل کے خلاف درخواست پر محفوظ کیا گیا فیصلہ کل سنائیں گے۔

واضح رہے کہ چیئرمین پی ٹی آئی عمران خان نے جیل کے بجائے عدالت میں سائفر کیس کی سماعت کی استدعا کر رکھی ہے، اسلام آباد ہائیکورٹ کے چیف جسٹس عامر فاروق نے کچھ روز قبل فیصلہ محفوظ کیا تھا۔

دوسری جانب آفیشل سیکرٹ ایکٹ کے تحت قائم اسلام آباد کی خصوصی عدالت نے بھی چیئرمین پی ٹی آئی عمران خان پر فرد جرم عائد کرنے کے لیے 17 اکتوبر کی تاریخ دے رکھی ہے۔