انٹرنیشنل کرکٹ کونسل نے چیمپئنز ٹرافی 2025 کے لیے کوالیفیکیشن کے طریقہ کار کا اعلان کردیا۔
آئی سی سی ترجمان کے مطابق پاکستان کی میزبانی میں ہونے والی چیمپئنز ٹرافی 2025 میں ورلڈ کپ 2023 کی ٹاپ سات ٹیمیں کوالیفائی کریں گی جبکہ پاکستان میزبان کی حیثیت سے ٹورنامنٹ میں شامل ہوگا۔
آئی سی سی ترجمان کا کہنا ہے کہ چیمپئنز ٹرافی 2025 کے لیے اہلیت کے نظام کی 2021 میں آئی سی سی بورڈ نے منظوری دی تھی۔ اس پیشرفت کے بعد زمبابوے، آئرلینڈ اور ویسٹ انڈیز جیسی ٹیمیں جو ورلڈ کپ 2023 میں کوالیفائی نہیں کرسکی تھیں وہ چیمپئنز ٹرافی 2025 بھی نہیں کھیل سکیں گی۔
ورلڈ کپ کے پوائنٹس ٹیبل پرنظر دوڑائیں توانگلینڈ اوربنگلہ دیش کی بھی چیمپئنز ٹرافی میں شرکت مشکوک نظرآتی ہے۔
واضح رہے کہ یہ پیشرفت اُن ٹیموں کیلئے بھی حیران کن ہے جو 2025 کی چیمپئنز ٹرافی کے لیے کوالیفائی کرنے کے بارے میں لاعلم تھیں۔ ہفتہ کو ورلڈ کپ میں نیدرلینڈز سے شکست کھانے کے بعد بنگلادیش کے کپتان شکیب الحسن نے کہا کہ اگرچہ ہم ورلڈ کپ میں سیمی فائنل کی دوڑ سے باہر ہیں لیکن ہم اپنے باقی تین میچز جیت چیمپئنز ٹرافی میں جگہ پکی کرنے کی کوشش کریں گے۔
