24 ویں روز بھی اسرائیل کی غزہ پر بموں کی بارش ، وحشیانہ بمباری سے مزید سینکڑوں فلسطینی شہید ہو گئے ہیں۔
عالمی میڈیا رپورٹس کے مطابق وسطی غزہ میں اسرائیلی بمباری سے دیرالبلا کی مسجد بلال بن رباح بھی شہید ہو گئی ہے۔
مسجد کے ساتھ بے گھروں کی پناہ گاہ بنے مکانات بھی کھنڈر بن گئے، اسرائیلی طیاروں نے غزہ کے سب سے بڑے الشفا اسپتال کے قریب بم برسا کر القدس اسپتال کی جانب آنے والے راستوں کو تباہ کر دیا۔
غزہ میں بمباری سے ایک روز پہلے دنیا میں آنے والا بچہ بھی شہید ہو گیا۔ڈاکٹرز ود آوٹ بارڈرز کے مطابق اسپتال زخمیوں سے اور مردہ خانے لاشوں سے بھرے پڑے ہیں، شمالی غزہ کا علاقہ ملبے کے ڈھیر میں تبدیل ہو چکا ہے۔
7 اکتوبر سے اسرائیلی حملوں میں شہدا کی تعداد 9ہزار سے زیادہ ، زخمیوں کی 20 ہزار تک جا پہنچی ہے۔
