سابق بھارتی کرکٹر سید کرمانی نے کہا ہے کہ پاکستانی ٹیم ورلڈ کپ کے سیمی فائنل میں رسائی حاصل کر لے گی۔

نجی ٹی وی سے گفتگو کرتے ہوئے انہوں نے کہا کہ پاکستان اور بھارت کے درمیان ہونے والے احمد آباد کے میچ میں پاکستانی شائقین کی کمی محسوس کی گئی، ہونا تو یہ چاہیے تھا کہ دونوں ملکوں کے شائقین اسٹیڈیم میں موجود ہوتے۔

سید کرمانی نے کہا کہ کسی بھی ٹیم کو جب کارکردگی دکھانے پر داد نہ ملے تو حوصلہ پست ہو جاتا ہے، پاکستانی شائقین کرکٹ کی بھارت میں عدم موجودگی ایک بہت بڑا سوال ہے۔

انہوں نے مزید کہا کہ بابر اعظم دنیا کے بہترین بیٹر ہیں، وہ مستقل مزاجی سے کھیلتے ہیں، اس کے علاوہ پاکستان کی بولنگ لائن بھی بہت مضبوط ہے۔

کرکٹ ورلڈ کپ کے اہم میچ میں قومی کرکٹ ٹیم کو بھارت کے ہاتھوں شکست کے بعد جہاں شائقین کرکٹ مایوس ہیں وہیں کرکٹرز ایکسپرٹس کی جانب سے بھی قومی ٹیم پر تنقید کے نشتر برسائے جا رہے ہیں۔

کرکٹ ایکسپرٹس نے سوال اٹھایا کہ کیا پاکستانی ٹیم صرف کمزور ٹیموں کے خلاف ہی پرفارم کر سکتی ہے۔

بابرالیون کو بھارت کے ہاتھوں شرمناک شکست کے بعد سابق ٹیسٹ کرکٹر سکندربخت نے کہا کہ ورلڈ کپ کے اہم میچ میں بڑے سمجھے جانے والے بیٹرز ٹیسٹ کرکٹ سمجھ کر کھیلے، اس کے علاوہ شاہین آفریدی کا سوئنگ کہیں نظر نہیں آیا۔

سابق آل رائونڈر عبدالرزاق نے کہا کہ پاکستان کو بھارت کے خلاف میچ میں نیدرلینڈز اور سری لنکا والی پرفارمنس دکھانی چاہیے تھی مگر ہمارے بیٹرز نے چھکا مارنے کی کوشش ہی نہیں کی اور بولرز ٹی ٹوئنٹی والی بولنگ کر رہے تھے۔

قومی آل رائونڈر عماد وسیم کا کہنا تھا کہ قومی کرکٹ ٹیم نے پچ کے حساب سے آدھے رنز بنائے، جبکہ محمد عامر نے ٹیم کو مشورہ دیا کہ تھوڑا نہیں زیادہ سوچنے کی ضرورت ہے۔